ଘର ତାଲିକା ପ୍ରସ୍ତୁତି ଏବଂ ଗୃହ ଗଣନା ସହିତ
ବିଶ୍ୱର ସବୁଠୁ ବଡ଼ ଜନଗଣନା ଅଭିଯାନ ଆରମ୍ଭ

ଭୁବନେଶ୍ୱର:୨/୪-ପ୍ରଥମ ଥର ପାଇଁ ଡିଜିଟାଲ ତଥ୍ୟ ସଂଗ୍ରହ ଏବଂ ସ୍ୱ-ଗଣନା ସହିତ ଆରମ୍ଭ ହୋଇଛି ଜନଗଣନା ୨୦୨୭ କାର୍ଯ୍ୟକ୍ରମ। ପ୍ରଥମେ ନିଜର ଜନଗଣନା କରାଇଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ। ଅନଲାଇନରେ ନିଜର ଗଣନା କରାଇ ଜନଗଣନା ପ୍ରକ୍ରିୟାରେ ଅଂଶଗ୍ରହଣ ଉପ ରାଷ୍ଟ୍ରପତି ସି.ପି. ରାଧାକୃଷ୍ଣନ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ କେନ୍ଦ୍ର ଗୃହ ଓ ସମବାୟ ମନ୍ତ୍ରୀ ଅମିତ ଶାହ।

ଦେଶର ଲୋକମାନଙ୍କୁ ସେମାନଙ୍କର ପରିବାରର ବିବରଣୀ ସ୍ୱଗଣନା କରିବା ଏବଂ ଜନଗଣନା ପ୍ରକ୍ରିୟାରେ ଅଂଶଗ୍ରହଣ କରିବାକୁ ପ୍ରଧାନମନ୍ତ୍ରୀ ନିବେଦନ କରିଛନ୍ତି। ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜ, ଗୋଆ, କର୍ଣ୍ଣାଟକ, ଲାକ୍ଷାଦ୍ୱୀପ, ମିଜୋରାମ, ଓଡ଼ିଶା, ସିକିମ ଏବଂ ଦିଲ୍ଲୀର ନୂଆଦିଲ୍ଲୀ ନଗରପାଳିକା ପରିଷଦ ଏବଂ ଦିଲ୍ଲୀ କ୍ୟାଣ୍ଟନମେଣ୍ଟ ବୋର୍ଡ ଅଞ୍ଚଳରେ ସ୍ୱ-ଗଣନା ଆରମ୍ଭ ହୋଇଛି।

ପ୍ରଥମ ଦିନରେ ଏହି ସ୍ଥାନଗୁଡ଼ିକର ପ୍ରାୟ ୫୫ ହଜାର ପରିବାର ସ୍ୱଗଣନା ସୁବିଧାର ଲାଭ ଉଠାଇଛନ୍ତି। ଜନଗଣନା ଆଇନ ୧୯୪୮ ଅନୁଯାୟୀ ସଂଗୃହିତ ସମସ୍ତ ତଥ୍ୟ ସମ୍ପୂର୍ଣ୍ଣ ଗୋପନୀୟ ଅଟେ। ଜନଗଣନା ଶାସନର ଏକ ଗୁରୁତ୍ୱପୂର୍ଣ୍ଣ ସାଧନ ଯାହା ଆଗାମୀ ଦଶନ୍ଧି ପାଇଁ ଭାରତର ବିକାଶ ଯୋଜନା ନିମନ୍ତେ ଆଧାର ପ୍ରଦାନ କରିଥାଏ। ବିଶ୍ୱର ସର୍ବବୃହତ ଜନଗଣନା ଅଭିଯାନ, ଜନଗଣନା ୨୦୨୭ ଆରମ୍ଭ ହୋଇଛି। ଭାରତ ସରକାର ଜନଗଣନା ୨୦୨୭ର ପ୍ରଥମ ପର୍ଯ୍ୟାୟ – ଗୃହ ତାଲିକା ପ୍ରସ୍ତୁତି ଏବଂ ଗୃହ ଗଣନା ଆରମ୍ଭ କରିଛନ୍ତି। ଏହା ହେଉଛି ଦେଶର ସର୍ବବୃହତ ପ୍ରଶାସନିକ ଏବଂ ପରିସଂଖ୍ୟାନ ଅଭିଯାନର ଆରମ୍ଭ। ଏହା ଭାରତର ପ୍ରଥମ ଜନଗଣନା ଯେଉଁଥିରେ ସମ୍ପୂର୍ଣ୍ଣ ଡିଜିଟାଲ ତଥ୍ୟ ସଂଗ୍ରହ ସହିତ ସ୍ୱ-ଗଣନା କରାଯାଇଛି।

ସ୍ୱ-ଗଣନା ଏକ ସୁରକ୍ଷିତ, ୱେବ-ଆଧାରିତ ସୁବିଧା ଯାହା ୧୬ ଟି ଆଞ୍ଚଳିକ ଭାଷାରେ ଉପଲବ୍ଧ। ପ୍ରଥମଥର ପାଇଁ ଗଣନାକାରୀଙ୍କ ଆଗମନ ପୂର୍ବରୁ ଉତ୍ତରଦାତାମାନେ ସେମାନଙ୍କ ସୁବିଧା ଅନୁସାରେ ଅନଲାଇନରେ ସେମାନଙ୍କର ବିବରଣୀ ପୂରଣ କରିପାରିବେ। ପୂର୍ବ ଜନଗଣନା ପରି ଗଣନାକାରୀମାନେ

ସମସ୍ତ ଆବଣ୍ଟିତ ଗୃହ ତାଲିକାଭୁକ୍ତ ବ୍ଲକରେ ଘରକୁ ଘର ଯାଇପାରିବେ କିନ୍ତୁ ସ୍ୱ-ଗଣନା ଏକ ଅତିରିକ୍ତ ବୈଶିଷ୍ଟ୍ୟ ଭାବରେ କାର୍ଯ୍ୟ କରିବ। ସ୍ୱ-ଗଣନାରେ ଅଂଶଗ୍ରହଣ କରିବା ପାଇଁ ନାଗରିକମାନେ ସେମାନଙ୍କର ମୋବାଇଲ ନମ୍ବର ଏବଂ ମୌଳିକ ସୂଚନା ବ୍ୟବହାର କରି ପୋର୍ଟାଲରେ ଲଗ ଇନ କରିପାରିବେ। ଫର୍ମ ସଫଳ ଭାବରେ ଦାଖଲ କରିବା ପରେ ଏକ ସ୍ୱତନ୍ତ୍ର ସେଲ୍ଫ ଏନୁମରେସନ ଆଇଡି (ଏସଇଆଇଡି) ସୃଷ୍ଟି ହୋଇଥାଏ ଯାହାକୁ ପରେ ଗଣନାକାରୀଙ୍କ ସହିତ ସେମାନଙ୍କର କ୍ଷେତ୍ର ପରିଦର୍ଶନ ସମୟରେ ଯାଞ୍ଚ ପାଇଁ ପ୍ରଦାନ କରାଯିବ।

ଗୃହ ତାଲିକା ପ୍ରସ୍ତୁତି ଏବଂ ଗୃହ ଜନଗଣନା ପର୍ଯ୍ୟାୟ ସମୟରେ ଗୃହର ସ୍ଥିତି, ପାରିବାରିକ ସୁବିଧା ଏବଂ ଉପଲବ୍ଧ ସମ୍ପତ୍ତି ବିଷୟରେ ବିସ୍ତୃତ ସୂଚନା ସଂଗ୍ରହ କରାଯିବ। ପ୍ରମାଣ-ଆଧାରିତ ଯୋଜନା, ନୀତି ନିର୍ଦ୍ଧାରଣ ଏବଂ ଲକ୍ଷ୍ୟଭିତ୍ତିକ କଲ୍ୟାଣ ଯୋଜନା ପାଇଁ ଆଧାର ପ୍ରଦାନ କରୁଥିବା ଏହି ପ୍ରମୁଖ ସୂଚକଗୁଡ଼ିକୁ ସଂଗ୍ରହ କରିବା ପାଇଁ ଜାନୁଆରୀ ୨୦୨୬ରେ ପ୍ରଥମ ପର୍ଯ୍ୟାୟ ପାଇଁ ମୋଟ ୩୩ଟି ପ୍ରଶ୍ନକୁ ଅଧିସୂଚିତ କରାଯାଇଛି।

ଗୃହ ତାଲିକା ପ୍ରସ୍ତୁତି ଏବଂ ଗୃହ ଜନଗଣନା ପର୍ଯ୍ୟାୟ ସାରା ଦେଶରେ ୧ ଏପ୍ରିଲରୁ ଆରମ୍ଭ ହୋଇଥିବା ବେଳେ ଏହା ୩୦ ସେପ୍େଟମ୍ବର ୨୦୨୬ ମଧ୍ୟରେ ଅନୁଷ୍ଠିତ ହେବ। ଏହି ଛଅ ମାସର ଅବଧି ମଧ୍ୟରେ ପ୍ରତ୍ୟେକ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ନିଜ ସରକାରଙ୍କ ଦ୍ୱାରା ଅଧିସୂଚିତ ୩୦ ଦିନ ମଧ୍ୟରେ ଏହି କ୍ଷେତ୍ର କାର୍ଯ୍ୟ ସମାପ୍ତ କରିବେ। ପ୍ରଥମ ଥର ପାଇଁ ଘରକୁ ଘର ସର୍ଭେ ପୂର୍ବରୁ ସ୍ୱ-ଗଣନା ପାଇଁ ୧୫ ଦିନର ଅତିରିକ୍ତ ସମୟ ପ୍ରଦାନ କରାଯାଇଛି, ଯାହା ଦ୍ୱାରା ଗଣନାକାରୀ ଆସିବା ପୂର୍ବରୁ ଲୋକମାନେ ନିଜେ ଡିଜିଟାଲରେ
ସେମାନଙ୍କର ବିବରଣୀ ଦାଖଲ କରିପାରିବେ।

ସ୍ୱ-ଗଣନାରେ ନିଜର ତଥ୍ୟ ପ୍ରଦାନ କଲେ ରାଜ୍ୟପାଳ

ଏପ୍ରିଲ ୧ ତାରିଖ ବୁଧବାର ଦିନ ଜନଗଣନା -୨୦୨୭ର ସ୍ୱ-ଗଣନା ପ୍ରକ୍ରିୟା ଆରମ୍ଭ ହେବା ଅବସରରେ ମାନ୍ୟବର ରାଜ୍ୟପାଳ ଡ. ହରିବାବୁ କମ୍ଭମପାଟି ସ୍ୱ-ଗଣନାରେ ନିଜର ଆବଶ୍ୟକୀୟ ତଥ୍ୟ ପ୍ରଦାନ କରିଛନ୍ତି। ଏହି ଅବସରରେ ରାଜ୍ୟର ପ୍ରତ୍ୟେକ ପରିବାରକୁ ଗଣନା କରିବା ସୁନିଶ୍ଚିତ କରିବା ଉପରେ ଗୁରୁତ୍ୱରୋପ କରି ଜନଗଣନା ପ୍ରକ୍ରିୟାରେ ରାଜ୍ୟର ସମସ୍ତ ଜନସାଧାରଣ ଅଂଶଗ୍ରହଣ କରିବାକୁ ନିବେଦନ କରିଛନ୍ତି। ଜନଗଣନା ୨୦୨୭ ର ସ୍ୱ-ଗଣନା ଆରମ୍ଭ ହୋଇଥିବା ପରିପ୍ରେକ୍ଷୀରେ ରାଜ୍ୟପାଳ ରାଜ୍ୟବାସୀଙ୍କୁ ହାର୍ଦ୍ଦିକ ଶୁଭେଚ୍ଛା ଜଣାଇ ଏହି ଗୁରୁତ୍ୱପୂର୍ଣ୍ଣ ଦେଶବ୍ୟାପୀ କାର୍ଯ୍ୟକ୍ରମରେ ଜନସାଧାରଣ ସକ୍ରିୟ ଭାବେ ଅଂଶଗ୍ରହଣ ପାଇଁ ଆହ୍ୱାନ ଜଣାଇଛନ୍ତି। ରାଜ୍ୟର ପ୍ରଥମ ନାଗରିକ ଭାବରେ ସେ ନିଜେ ସ୍ୱ-ଗଣନା ପ୍ରକ୍ରିୟାରେ ଦାୟିତ୍ୱ ସମାପନ କରି ଅନ୍ୟମାନଙ୍କୁ ମଧ୍ୟ ଏହା କରିବାକୁ ଉତ୍ସାହିତ କରିଛନ୍ତି।

ରାଜ୍ୟରେ ଜନଗଣନା ପାଇଁ ସରକାରଙ୍କ ପ୍ରସ୍ତୁତି
-କାର୍ଯ୍ୟରେ ନିୟୋଜିତ ଅଧିକାରୀ ଏବଂ କର୍ମଚାରୀମାନଙ୍କ ବଦଳି ବନ୍ଦ

ଭୁବନେଶ୍ୱର:୨/୪- ରାଜ୍ୟରେ ଜନଗଣନା ୨୦୨୭ କାର୍ଯ୍ୟକ୍ରମକୁ ସୁଚାରୁରୂପେ ସମ୍ପାଦନ କରିବା ପାଇଁ ଓଡ଼ିଶା ସରକାରଙ୍କ ପକ୍ଷରୁ ବ୍ୟାପକ ପ୍ରସ୍ତୁତି ଗ୍ରହଣ କରାଯାଇଛି। ଏଥିନିମନ୍ତେ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଅରବିନ୍ଦ ପାଢୀ ବିଭିନ୍ନ ବିଭାଗର ସଚିବ, ବିଭାଗୀୟ ମୁଖ୍ୟ, ସମସ୍ତ ଜିଲ୍ଲାର ଜିଲ୍ଲାପାଳ ଏବଂ ମହାନଗର ନିଗମର କମିଶନର ତଥା ମୁଖ୍ୟ ଜନଗଣନା ଅଧିକାରୀଙ୍କୁ ଚିଠି ଲେଖିଛନ୍ତି।

ଏହି ଜନଗଣନା ପ୍ରକ୍ରିୟା ଦୁଇଟି ପର୍ଯ୍ୟାୟରେ ଡିଜିଟାଲ ମାଧ୍ୟମରେ ସମ୍ପନ୍ନ କରାଯିବ। ପ୍ରଥମ ପର୍ଯ୍ୟାୟରେ ଗୃହ ତାଲିକା ଓ ଆବାସ ଜନଗଣନା ୧୬ ଏପ୍ରିଲ ୨୦୨୬ ଠାରୁ ୧୫ ମଇ ୨୦୨୬ ପର୍ଯ୍ୟନ୍ତ ୩୦ ଦିନ ଧରି ଅନୁଷ୍ଠିତ ହେବ। ଏହା ସହିତ ସ୍ୱ-ଗଣନା କାର୍ଯ୍ୟକ୍ରମ ୧ ଏପ୍ରିଲ ୨୦୨୬ ଠାରୁ ୧୫ ଏପ୍ରିଲ ୨୦୨୬ ପର୍ଯ୍ୟନ୍ତ ଚାଲିବ। ଦ୍ୱିତୀୟ ପର୍ଯ୍ୟାୟରେ ଜନସଂଖ୍ୟା ଗଣନା ୨୦୨୭ ମସିହା ଫେବୃଆରୀ ମାସରେ କରାଯିବ। ଉକ୍ତ ଜନଗଣନା କାର୍ଯ୍ୟର ସଫଳ ସମ୍ପାଦନ ସୁନିଶ୍ଚିତ କରିବା ପାଇଁ ଜନଗଣନା କାର୍ଯ୍ୟରେ ନିୟୋଜିତ ଅଧିକାରୀ ଏବଂ କର୍ମଚାରୀମାନଙ୍କ ବଦଳି ନ କରାଯିବା ନେଇ ରାଜ୍ୟ ସରକାରଙ୍କ ପକ୍ଷରୁ ସମସ୍ତ ବିଭାଗ, ଜିଲ୍ଲା ପ୍ରଶାସନ ଏବଂ ନଗର ନିଗମମାନଙ୍କୁ ନିର୍ଦ୍ଦେଶ ଜାରି କରାଯାଇଛି। ସମସ୍ତ ଜିଲ୍ଲା ଓ ନଗର ନିଗମର ମୁଖ୍ୟ ଜନଗଣନା ଅଧିକାରୀମାନେ ଜନଗଣନା କର୍ମଚାରୀମାନଙ୍କ ପ୍ରଶିକ୍ଷଣକୁ ନିର୍ଦ୍ଦିଷ୍ଟ ସମୟସୀମା ମଧ୍ୟରେ ସମାପ୍ତ କରିବେ। ଜନଗଣନା କାର୍ଯ୍ୟରେ ନିୟୋଜିତ ମାଷ୍ଟର ଟ୍ରେନର ଓ ଫିଲ୍ଡ ଟ୍ରେନରମାନଙ୍କୁ ଜନଗଣନା କାର୍ଯ୍ୟ ସମାପ୍ତି ପର୍ଯ୍ୟନ୍ତ ଅର୍ଥାତ ମାର୍ଚ୍ଚ ୨୦୨୭ ପର୍ଯ୍ୟନ୍ତ ବଦଳି କରାଯିବ ନାହିଁ। ସୁପରଭାଇଜର ଓ ଏନ୍ୟୁମେରେଟର ଭାବେ ନିଯୁକ୍ତ କର୍ମଚାରୀମାନଙ୍କ ବଦଳି ସମ୍ବନ୍ଧରେ ସମ୍ପର୍କିତ ଜିଲ୍ଲା ମୁଖ୍ୟ ଜନଗଣନା ଅଧିକାରୀଙ୍କ ପୂର୍ବାନୁମତି ବିନା କୌଣସି ପଦକ୍ଷେପ ଗ୍ରହଣ କରାଯିବ ନାହିଁ ।

ବିଭାଗୀୟ ମୁଖ୍ୟ ଅଧିକାରୀମାନଙ୍କୁ କ୍ଷେତ୍ରସ୍ତରରେ ନିୟୋଜିତ ଜନଗଣନା ଅଧିକାରୀମାନଙ୍କ ବଦଳି ନିୟନ୍ତ୍ରଣ ନିୟମାବଳୀକୁ କଡାକଡି ଭାବେ ପାଳନ କରିବାକୁ ନିର୍ଦ୍ଦେଶ ଜାରି କରାଯାଇଛି ଯାହା ଜନଗଣନା କାର୍ଯ୍ୟର ସୁସମ୍ପାଦନ ସୁନିଶ୍ଚିତ କରିବ। ଜନଗଣନା କାର୍ଯ୍ୟରେ ନିଯୁକ୍ତ ସମସ୍ତ ଅଧିକାରୀ ଓ କର୍ମଚାରୀମାନେ ଜନଗଣନା ଆଇନ,୧୯୪୮ ଓ ଜନଗଣନା ନିୟମାବଳୀ,୧୯୯୦ ଅନୁଯାୟୀ ନିଜର ନିର୍ଦ୍ଦିଷ୍ଟ କର୍ତ୍ତବ୍ୟ ସମ୍ପାଦନ କରିବେ। ଏହି ସମସ୍ତ ପଦକ୍ଷେପ ଭାରତ ସରକାରଙ୍କ ନିର୍ଦ୍ଦେଶାବଳୀ ଅନୁଯାୟୀ ଗ୍ରହଣ କରାଯାଇଥିବାବେଳେ ରାଜ୍ୟ ସରକାର ଜନଗଣନା ୨୦୨୭ କାର୍ଯ୍ୟକ୍ରମର ସଫଳ ସମ୍ପାଦନ ପାଇଁ ସମସ୍ତଙ୍କ ସହଯୋଗ ଆହ୍ୱାନ କରିଛନ୍ତି।