ସିଗାରେଟ ଓ ମଦ ଠାରୁ ସୋସିଆଲ୍ ମିଡିଆ ଅଧିକ ନିଶାଯୁକ୍ତ: ପ୍ରଫେସର ଶର୍ମା
ଭୁବନେଶ୍ୱର:୨୦/୪-ବଜାର ସମସ୍ତଙ୍କୁ କରାୟତ କରିଛି। ଯୁବଗୋଷ୍ଠୀ ସେଲିବ୍ରିଟି ହେବା ପାଇଁ ଚାହୁଁଛନ୍ତି। ଇଟ୍ସ ମାଇଁ ଲାଇଫ୍ ଓ ମାଇଁ ଚଏସ ବୋଲି ନାରା ଦେଇ ନିଜ ମନ ଚାହୁଁଥିବା କଥା ସାମାଜିକ ଗଣମାଧ୍ୟମର ପ୍ରଭାବରେ କରିବାକୁ ଚାହୁଁଛନ୍ତି ସେମାନେ। ନିଜ ସ୍ୱାଧୀନତା ବୋଲି ଯାହାକୁ ଯୁବଗୋଷ୍ଠୀ କହୁଛନ୍ତି ତାହା ଏବେ ସ୍ୱେଚ୍ଛାଚାରିତା ଆଡ଼କୁ ଯାଉଛି ବୋଲି ମନୀଷ ସ୍ମାରକୀ ‘ନିର୍ଭୟ’ ଯୁବ ପୁରସ୍କାର ୨୦୨୬ ସମାରୋହର ମୁଖ୍ୟ ଅତିଥି ଭାବେ ଯୋଗ ଦେଇଥିବା କେନ୍ଦ୍ର ସାହିତ୍ୟ ଏକାଡେମୀର ଉପ ସଭାପତି ତଥା ମହାତ୍ମା ଗାନ୍ଧୀ ଆନ୍ତର୍ଜାତୀକ ହିନ୍ଦୀ ବିଶ୍ୱବିଦ୍ୟାଳୟ ୱାର୍ଦ୍ଧାର କୁଳପତି ପ୍ରଫେସର କୁମୁଦ ଶର୍ମା ତାଙ୍କ ଭାଷଣରେ କହିଛନ୍ତି।
ସମସ୍ତେ ଆଜି ଗ୍ଲୋବାଲ ବ୍ୟକ୍ତି ହେବା ପାଇଁ ଚାହୁଁଥିଲା ବେଳେ ସୋସାଆଲ୍ ମିଡିଆରେ ସେଇଥିପାଇଁ ଯୁବଗୋଷ୍ଠୀ ସକ୍ରିୟ ହୋଇଯାଇଛନ୍ତି। ସେ କହିଥିଲେ ନିଜ ସ୍ୱାଧୀନତା ନାମରେ ସ୍ୱେଚ୍ଛାଚାରୀ ହୋଇଯିବା ମାନସିକତାରେ ପଡୁଥିବା ଯୁବଗୋଷ୍ଠୀ ବିବେକବାନ ହେବା ଦରକାର। ସେ ସତର୍କ କରି କହିଥିଲେ ଆଜି ଭାରତର ଯୁବଗୋଷ୍ଠୀଙ୍କ ସକାଶେ ସବୁଠାରୁ ବଡ଼ ଚାଲେଞ୍ଜ ହେଉଛି ସୋସିଆଲ୍ ମିଡିଆର ଫାସରୁ ନିଜକୁ ମୁକ୍ତ ରଖିବା। ସିଗାରେଟ ଓ ମଦ ଠାରୁ ଅଧିକ ନିଶାବାନ ସୋସିଆଲ୍ ମିଡିଆ ବୋଲି କହିଥିଲେ ପ୍ରଫେସର ଶର୍ମା। ସେ ପ୍ରକାଶ କରିଥିଲେ ଯେ ଧନୀ ଓ ଶକ୍ତିଶାଳୀ ରାଷ୍ଟ୍ରମାନେ ଏକ ବିଶ୍ୱ ଭାଷା, ଏକ ବିଶ୍ୱ ସଂସ୍କୃତି ଓ ବିଶ୍ୱ ମାନବତା ତିଆରି କରିବା ପାଇଁ ଚାହୁଁଛନ୍ତି ନିଜ ପ୍ରଭୁତ୍ୱ ବିସ୍ତାର କରିବା ସକାଶେ। ହେଲେ ଭାରତ ଏହାକୁ ଗ୍ରହଣ କରିପାରିବ ନାହିଁ। କାରଣ ଆମର ପ୍ରତ୍ୟେକ ରାଜ୍ୟର ନିଜର ଭାଷା ରହିଛି, ସଂସ୍କୃତି ରହିଛି ଓ ଚଳଣି ରହିଛି। ତେଣୁ ଆମ ନିଜସ୍ୱ ଶକ୍ତି ଉପସ୍ଥାପିତ କରି ଆମର ସ୍ୱତନ୍ତ୍ର ପରିଚୟ ଆମେ ସୃଷ୍ଟି କରିବା। ସେ କହିଥିଲେ ବର୍ତ୍ତମାନ ଯୁବଗୋଷ୍ଠୀ ବଡ଼ ଦ୍ୱନ୍ଦ୍ୱରେ ଅଛନ୍ତି। କ’ଣ ତାଙ୍କ ପାଇଁ ସଠିକ୍, କ’ଣ ତାଙ୍କ ପାଇଁ ଭୁଲ୍ ଜାଣିପାରୁନାହାନ୍ତି। ବିଶ୍ୱ ବଜାରର ମାୟାରେ ଆଜି ଗାଁର ଯୁବକ ଭାଲେଣ୍ଟାଇନ ଡେ’ ମନାଇବାକୁ ବ୍ୟଗ୍ର ହୋଇପଡୁଥିଲା ବେଳେ ନିଜ ଅଞ୍ଚଳର ସମସ୍ୟା ଓ ଆହ୍ୱାନଠାରୁ ଦୂରେଇ ଯିବାକୁ ବସିଛନ୍ତି।
ପରିବାରର ମୁଖ୍ୟମାନଙ୍କ ପାଇଁ ଯୁବ ସମାଜକୁ ଏକ ଆଦର୍ଶ ଓ ସଠିକ୍ ମାର୍ଗ ଦେଖାଇବାର ସମୟ ଆସିଛି। ଦୈନିକ ‘ନିର୍ଭୟ’ ପକ୍ଷରୁ ଯୁବ ପୁରସ୍କାର ପ୍ରଦାନର ଧାରା ଆରମ୍ଭ କରାଯାଇଥିବାରୁ ଏହାକୁ ପ୍ରଶଂସା କରି ପ୍ରତିବର୍ଷର ବିଜେତା ମାନେ ସମାଜରେ ଏକ ଗୁଣାତ୍ମକ ପରିବର୍ତ୍ତନ ଆଣିବାରେ ସହାୟକ ହେବେ ବୋଲି ସେ ଆଶାବ୍ୟକ୍ତ କରିଥିଲେ। ‘ନିର୍ଭୟ’ ମନୀଷ ସ୍ମାରକୀ ଦ୍ୱିତୀୟ ଯୁବ ପୁରସ୍କାର ଜୟପୁରର ଦଶମ ଶ୍ରେଣୀ ଛାତ୍ରୀ ହର୍ଷିତା ପ୍ରିୟଦର୍ଶିନୀ ମହାନ୍ତିଙ୍କୁ ପ୍ରଦାନ କରାଯାଇଥିଲା। ଯିଏ ଦେଶିଅ ବିହନର ପ୍ରସାର ଦିଗରେ ଗତ ତିନିବର୍ଷ ହେଲା କାର୍ଯ୍ୟ କରି କୋରାପୁଟ ଜିଲାରେ ଏକ ବଡ଼ ବିପ୍ଲବ ଆଣି ଦେଇପାରିଛନ୍ତି। ବିଶେଷ ଟ୍ରଫି, ଉତ୍ତରୀୟ, ଅଭିନନ୍ଦନ ପତ୍ର ସହ ନଗଦ ୨୫ ହଜାର ଟଙ୍କା ହର୍ଷିତାଙ୍କୁ ପୁରସ୍କାର ଆକାରରେ ପ୍ରଦାନ କରାଯାଇଥିଲା। ‘ନିର୍ଭୟ’ ସମ୍ପାଦକ ନବୀନ ଦାସଙ୍କ ସଭାପତିତ୍ୱରେ ତଥା ସହଯୋଗୀ ସମ୍ପାଦକ ସଂବିତ ମହାପାତ୍ରଙ୍କ ସଂଚାଳନରେ ଅନୁଷ୍ଠିତ ଏହି ସମାରୋହରେ ସାନ୍ତାଳୀ ଭାଷାବିତ୍ ଫାଗୁ ବାସ୍କେ ସମ୍ମାନିତ ଅତିଥି ଭାବରେ ମଧ୍ୟ ସାମିଲ ହୋଇଥିଲେ।
