ବିଶେଷ ବାବୁଙ୍କ ଦ୍ୱାରା ପରିଚାଳିତ ହେଉଛି ବିରୋଧୀଦଳ-ମୁଖ୍ୟମନ୍ତ୍ରୀ
ଭୁବନେଶ୍ୱର:୩୧/୩- ମୁଖ୍ୟମନ୍ତ୍ରୀ ଚଳିତ ଅଧିବେଶନରେ ୨୦୨୬-୨୭ ଆର୍ôଥକ ବର୍ଷ ପାଇଁ ୩.୧୦ଲକ୍ଷ କୋଟି ଟଙ୍କାର ବଜେଟ ଉପସ୍ଥାପନ କରିଥିଲେ। ୩୧ ତାରିଖରେ ବିରୋଧୀ ଦଳ ସଦସ୍ୟଙ୍କ କକ୍ଷତ୍ୟାଗ ମଧ୍ୟରେ ଏହାଉପରେ ବ୍ୟୟମଞ୍ଜୁରୀ ବିଲ-୨୦୨୬’ ଗୃହରେ ପାରିତ ହୋଇଛି। ବ୍ୟୟମଞ୍ଜୁରୀ ବିଲ୍ ଆଲୋଚନାରେ ଭାଗ ନେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ବିରୋଧୀଙ୍କୁ ତୀବ୍ର ସମାଲୋଚନା କରିଛନ୍ତି।
ସେ କହିଥିଲେ ରାଜ୍ୟବାସୀ ସମସ୍ତଙ୍କ କାର୍ଯ୍ୟକଳାପ ଦେଖୁଛନ୍ତି। ଆଗାମୀ ନିର୍ବାଚନରେ ସେମାନେ ଏହାର ଉଚିତ ଜବାବ ଦେବେ। ସମୃଦ୍ଧ ଓଡ଼ିଶା ଗଠନ ପାଇଁ ସରକାରଙ୍କ କାର୍ଯ୍ୟକ୍ରମ ଉପରେ ମୁଖ୍ୟମନ୍ତ୍ରୀ ତଥ୍ୟ ରଖିଥିବା ବେଳେ ବିରୋଧୀଙ୍କ କାର୍ଯ୍ୟଶୈଳୀକୁ ନେଇ ପ୍ରଶ୍ନ ଉଠାଇଥିଲେ। ସେ ବିଜେଡି ସରକାର ଉପରେ ଅସନ୍ତୋଷ ବ୍ୟକ୍ତ କରିଥିଲେ। ସେ କହିଥିଲେ, ଅଫିସରମାନେ ହିଁ ସେତେବେଳେ ସରକାରଙ୍କ ପାଇଁ ନିଷ୍ପତ୍ତି ନେଉଥିଲେ। ଛୋଟ ଘଟଣାରେ ମନ୍ତ୍ରୀମାନେ ବଳି ପଡୁଥିଲେ। ବିଜେଡି ସରକାରର ‘ବିଶେଷ ବାବୁ’ଙ୍କ ଦ୍ୱାରା ଏବେ ବି ବିରୋଧୀ ଦଳ ପରିଚାଳିତ ହେଉଛି।
ପରୀ, ମମିତା ମେହେର, ମାହାଙ୍ଗା ଡବଲ ହତ୍ୟାକାଣ୍ଡ ଓ ଲକ୍ଷ୍ମଣାନନ୍ଦ ସରସ୍ୱତୀଙ୍କ ହତ୍ୟା ଭଳି ସଙ୍ଗୀନ ଘଟଣା ସମୟରେ ବିରୋଧୀଙ୍କ ନୈତିକତା କୁଆଡ଼େ ଯାଇଥିଲା ବୋଲି ମୁଖ୍ୟମନ୍ତ୍ରୀ ଶ୍ରୀ ମାଝୀ ପ୍ରଶ୍ନ କରିବାସହ କଟକ ବଡ଼ ମେଡିକାଲ ଅଗ୍ନିକାଣ୍ଡ ଘଟଣାରେ ବିରୋଧୀଙ୍କ ହଟ୍ଟଗୋଳକୁ ସମାଲୋଚନା କରିଛନ୍ତି। ସେ କହିଛନ୍ତି ପୂର୍ଣ୍ଣାଙ୍ଗ ରିପୋର୍ଟ ଆସିଲେ ହିଁ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସେତେବେଳେ ଜଣାପଡ଼ିବ କିଏ ପ୍ରକୃତରେ ସବଳ। ବିଧାନସଭା ଭିତରେ ଓ ବାହାରେ ବିଜେଡି ଓ କଂଗ୍ରେସ ଭିତରେ ବଢୁଥିବା ଘନିଷ୍ଠତାକୁ ନେଇ କଟାକ୍ଷ କରିଥିଲେ। ପିଏମଜିରେ ଦୁଇ ଦଳ ଏକାଠି ହୋଇ ଯେଉଁ ଶକ୍ତି ପ୍ରଦର୍ଶନ କଲେ ତାହା ଗଣତନ୍ତ୍ର ପାଇଁ ଶୁଭ ସୂଚନା। ଏକାଠି ହେବା ପୂର୍ବରୁ ନିଜ ନିଜ ଦଳର ବିଧାୟକମାନଙ୍କୁ ବିଶ୍ୱାସକୁ ନେଇଥିଲେ ରାଜ୍ୟସଭା ନିର୍ବାଚନ ସମୟରେ ଏତେ ସଦସ୍ୟ ଦଳର ହାତ ଛାଡ଼଼ିନଥାନ୍ତେ।
ସରିଲା ବିଧାନସଭା ବଜେଟ ଅଧିବେଶନ
-ବିଳମ୍ବିତ ରାତି ପର୍ଯ୍ୟନ୍ତ ଚାଲିଲା
-ମନ୍ତ୍ରୀ, ବିଧାୟକଙ୍କ ଦରମା ବିଲ୍ ପ୍ରତ୍ୟାହୃତ
ଭୁବନେଶ୍ୱର:୧/୪- ଓଡ଼ିଶା ବିଧାନସଭାର ବଜେଟ ଅଧିବେଶନ ମଙ୍ଗଳବାର ବିଳମ୍ବିତ ରାତ୍ରୀ ପର୍ଯ୍ୟନ୍ତ ଚାଲିବା ପରେ ବାଚସ୍ପତି ଗୃହକୁ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ମୁଲତବୀ ଘୋଷଣା କରିଛନ୍ତି।ଅଧିବେଶନରେ ୨୯ଟି କାର୍ଯ୍ୟ ଦିବସ ଥିଲା। ତେବେ ଗୃହ ୨୨ଦିନ ଚାଲିଛି। ଶେଷଦିନ ବ୍ୟୟମଞ୍ଜୁରୀ ବିଧେୟକ ପାରିତ ହୋଇଥିଲା। ମଧ୍ୟରାତ୍ରୀରେ ବିଧାୟକ, ମନ୍ତ୍ରୀ, ବାଚସ୍ପତି, ଉପ ବାଚସ୍ପତିଙ୍କ ଦରମା ଓ ଭତ୍ତା ବିଲ୍ ୨୦୨୫କୁ ପ୍ରତ୍ୟାହାର କରି ନିଆଯାଇଥିଲା।
