ପୋଷଣ ଓ ମଧ୍ୟାହ୍ନ ଭୋଜନ ଦୁର୍ନୀତି
ଭୁବନେଶ୍ୱର:୩୧/୩-ରାଜ୍ୟରେ ସରକାରୀ ସଂସ୍ଥାଗୁଡ଼ିକର ଲାଭକ୍ଷତି ଉପରେ ସିଏଜି ରିପୋର୍ଟ ପ୍ରକାଶ ପାଇଛି। ଖଣି ନିଗମ ଲାଭରେ ଥିବା ବେଳେ ଗ୍ରୀଡକୋ, ଓଏସଆରଟିସି ସମେତ ୮ଟି ସରକାରୀ ସଂସ୍ଥା ୯ହଜାର ୪୪୯ କୋଟି ୩୮ଲକ୍ଷ ଟଙ୍କା କ୍ଷତିରେ ଚାଲିଛି। ୨୦୨୨-୨୩ରେ ରାଜ୍ୟର ୨୯ଟି ସରକାରୀ ସଂସ୍ଥା ମଧ୍ୟରୁ ୧୮ଟି ସଂସ୍ଥା ଲାଭ କରିଥିଲେ। ପୂର୍ବବର୍ଷ ଏହା ୩ହଜାର ୨୮୯କୋଟି ୮୬ ଲକ୍ଷ ଟଙ୍କା ଥିଲା। ଅଧିକ ଲାଭ କରିଥିଲା ଓଡ଼ିଶା ଖଣି ନିଗମ, ଓଡ଼ିଶା ଜଳବିଦ୍ୟୁତ ନିଗମ, ଓଡ଼ିଶା ପୋଲିସ ଗୃହ ନିର୍ମାଣ ଓ କଲ୍ୟାଣ ନିଗମ ଏବଂ ଓଡ଼ିଶା ବନ ଉନ୍ନୟନ ନିଗମ। ୭ଟି ସରକାରୀ ସଂସ୍ଥା ୭୯୪କୋଟି ୯୮ ଲକ୍ଷ କ୍ଷତି କରିଛନ୍ତି। ଗ୍ରୀଡକୋ ସର୍ବାଧିକ ୭୭୮କୋଟି ୧୮ ଲକ୍ଷ କ୍ଷତି କରିଛି। ମହଙ୍ଗା ଦରରେ ବିଦ୍ୟୁତ କିଣିବା ଯୋଗୁଁ ଏହି କ୍ଷତି ହୋଇଛି। ଓଏସଆରଟିସି ୧୦କୋଟି ୫୫ ଲକ୍ଷ ଟଙ୍କା କ୍ଷତି କରିଛି। ୭ଟି ସଂସ୍ଥା ଲାଭ କରିଥିଲେ ମଧ୍ୟ ସରକାରଙ୍କୁ ଯେତିକି ଲାଭାଂଶ ଦେବା କଥା ତାହା ଦେଇନାହାନ୍ତି ଫଳରେ ୧ହଜାର ୪୧୯କୋଟି ୩୦ ଲକ୍ଷର କମ ଲାଭାଂଶ ସରକାରଙ୍କୁ ମିଳିଛି।
ସେହିପରି ବିନିଯୋଗ ପ୍ରମାଣପତ ଦାଖଲ କରିବାରେ ୪୧୬ ଦିନ ପର୍ଯ୍ୟନ୍ତ ବିଳମ୍ବ ହେବା ଯୋଗୁଁ କେନ୍ଦ୍ର ସରକାର ୩୩୯.୨୦ କୋଟି ଟଙ୍କାର ଅନୁଦାନ କାଟି ଦେଇଥିଲେ। ପ୍ରଶାସନିକ କଳର ଅପାରଗତା ଯୋଗୁ ଓଡ଼ିଶାର ଗରିବ ଶିଶୁଙ୍କ ପୋଷଣ ଅଧିକାର ପ୍ରଭାବିତ ହୋଇଥିଲା। ରାଜ୍ୟରେ ଶିଶୁ ଓ ମାତୃ ସ୍ୱାସ୍ଥ୍ୟ ପାଇଁ ଉଦ୍ଦିଷ୍ଟ ‘ପୋଷଣ’ ଅଭିଯାନ ଓ ମଧ୍ୟାହ୍ନଭୋଜନ ଯୋଜନାରେ ବ୍ୟାପକ ହରିଲୁଟର ଚିତ୍ର ମଧ୍ୟ ସିଏଜି ରିପୋର୍ଟରେ ପଦାକୁ ଆସିଛି। ବିଜେଡି ସରକାର ସମୟରେ ୨୦୧୮ରୁ ୨୩ ଭିତରେ ଶିଶୁ, ଗର୍ଭବତୀ, ପ୍ରସୂତୀ ଓ ସ୍କୁଲ ପିଲାଙ୍କ ପାଇଁ ଉଦ୍ଦିଷ୍ଟ ଖାଦ୍ୟକୁ ହରିଲୁଟ କରି କୋଟିକୋଟି ଟଙ୍କାର ଆର୍ôଥକ ହେରଫେର କରାଯାଇଥିବା ଅଡିଟରୁ ଜଣାପଡ଼ିଛି।
