-ରାଜ୍ୟର ଆର୍ଥିକ ସ୍ଥିତି ଏବଂ ମହାନଗର ନିଗମ ଅଞ୍ଚଳରେ
ବର୍ଷାଜଳ ନିଷ୍କାସନ ଓ ପରିମଳ ବ୍ୟବସ୍ଥା ଉପରେ ଆଲୋଚନା
-ଗବେଷଣା ପ୍ରବନ୍ଧ ପ୍ରତିଯୋଗିତା ଘୋଷଣା
ଭୁବନେଶ୍ୱର: ୧୪/୭-ଭାରତର ନିୟନ୍ତ୍ରକ ଓ ମହାଲେଖା ପରୀକ୍ଷକ (ସିଏଜି) ଏବଂ ଭାରତୀୟ ସାମାଜିକ ବିଜ୍ଞାନ ଗବେଷଣା ପରିଷଦ (ଆଇସିଏସଏସଆର)ଙ୍କ ମିଳିତ ଆନୁକୂଲ୍ୟରେ ଆୟୋଜିତ ଦେଶବ୍ୟାପୀ ସିଏଜି–ଆଇସିଏସଏସଆର କୋଲୋକ୍ୱିୟମର ଅଷ୍ଟମ ସଂସ୍କରଣ ଭୁବନେଶ୍ୱରସ୍ଥିତ ଉତ୍କଳ ବିଶ୍ୱବିଦ୍ୟାଳୟରେ ଅନୁଷ୍ଠିତ ହୋଇଥିଲା। ଏହି କାର୍ଯ୍ୟକ୍ରମରେ ଅଡିଟ ବିଶେଷଜ୍ଞ, ଅର୍ଥନୀତିଜ୍ଞ, ଶିକ୍ଷାବିତ ଓ ଛାତ୍ରଛାତ୍ରୀମାନେ ଯୋଗଦେଇ ସାର୍ବଜନିକ ଅର୍ଥ ପରିଚାଳନା ଓ ସୁଶାସନ ସମ୍ପର୍କିତ ବିଷୟରେ ମତବିନିମୟ କରିଥିଲେ। ଏହା ‘ବିକଶିତ ଭାରତ ୨୦୪୭’ର ଲକ୍ଷ୍ୟ ପୂରଣ ଦିଗରେ ଏକ ଗୁରୁତ୍ୱପୂର୍ଣ୍ଣ ପ୍ରୟାସ। ଏହି କୋଲୋକ୍ୱିୟମରେ ସିଏଜିଙ୍କ ସମ୍ପ୍ରତି ପ୍ରକାଶିତ ‘ରାଜ୍ୟର ଆର୍ଥିକ ସ୍ଥିତି’ ଏବଂ ‘ମହାନଗର ନିଗମଗୁଡ଼ିକରେ ବର୍ଷାଜଳ ନିଷ୍କାସନ ଓ ପରିମଳ ବ୍ୟବସ୍ଥାପନ’ ସମ୍ବନ୍ଧୀୟ ଦୁଇଟି ଅଡିଟ ରିପୋର୍ଟ ଉପରେ ଆଲୋଚନା ହୋଇଥିଲା। ବକ୍ତାମାନେ ଓଡ଼ିଶାର ସୁଦୃଢ଼ ଆର୍ôଥକ ସ୍ଥିତି ଉପରେ ଆଲୋକପାତ କରିବା ସହ ଦୀର୍ଘମିଆଦୀ ଆର୍ôଥକ ଶୃଙ୍ଖଳା, ଶିକ୍ଷା ଓ ସ୍ୱାସ୍ଥ୍ୟ କ୍ଷେତ୍ରରେ ବିନିଯୋଗ ଏବଂ ନଗର ଜଳ ପରିଚାଳନାକୁ ଆହୁରି ସୁଦୃଢ଼ କରିବାର ଆବଶ୍ୟକତା ଉପରେ ଜୋର ଦେଇଥିଲେ।
ଆଇସିଏସଏସଆରର ସଦସ୍ୟ ସଚିବ ପ୍ରଫେସର ଧନଞ୍ଜୟ ସିଂହ ସିଏଜିଙ୍କ ଅଡିଟ ରିପୋର୍ଟକୁ ଗବେଷଣା ଓ ନୀତି ପ୍ରଣୟନ ପାଇଁ ଏକ ପ୍ରାମାଣିକ ସୂଚନା ଉତ୍ସ ବୋଲି ବର୍ଣ୍ଣନା କରିଥିଲେ। ସେହିପରି ପୂର୍ବାଞ୍ଚଳର ମହା ନିର୍ଦ୍ଦେଶକ କେ. ପି. ଆନନ୍ଦ ସାର୍ବଜନିକ ଅର୍ଥ ପରିଚାଳନାରେ ସ୍ୱଚ୍ଛତା ଓ ଉତ୍ତରଦାୟିତ୍ୱ ସୁନିଶ୍ଚିତ କରିବାରେ ସିଏଜିଙ୍କ ସାମ୍ବିଧାନିକ ଭୂମିକା ଉପରେ ଆଲୋକପାତ କରିଥିଲେ। କାର୍ଯ୍ୟକ୍ରମ ଶେଷରେ ବିଭିନ୍ନ ଶିକ୍ଷାନୁଷ୍ଠାନର ଛାତ୍ରଛାତ୍ରୀ ଓ ଗବେଷକମାନଙ୍କ ସହ ଏକ ପ୍ରଶ୍ନୋତ୍ତର ପର୍ବ ଅନୁଷ୍ଠିତ ହୋଇଥିଲା। ଏହି ଅବସରରେ ସ୍ନାତକ, ସ୍ନାତକୋତ୍ତର ଏବଂ ପିଏଚଡି. ଗବେଷକମାନଙ୍କ ପାଇଁ ସିଏଜି–ଆଇସିଏସଏସଆର ଗବେଷଣା ପ୍ରବନ୍ଧ ପ୍ରତିଯୋଗିତା ଘୋଷଣା କରାଯାଇଥିଲା। ଏହି ପ୍ରତିଯୋଗିତାରେ ଜାତୀୟସ୍ତରରେ ସର୍ବାଧିକ ୧.୨୫ ଲକ୍ଷ ଏବଂ ରାଜ୍ୟ/କେନ୍ଦ୍ରଶାସିତ ଅଞ୍ଚଳସ୍ତରରେ ୭୫,୦୦୦ ପର୍ଯ୍ୟନ୍ତ ନଗଦ ପୁରସ୍କାର ପ୍ରଦାନ କରାଯିବ। ଏହି କାର୍ଯ୍ୟକ୍ରମରେ ମହାଲେଖାକାର କାର୍ଯ୍ୟାଳୟର ବରିଷ୍ଠ ଅଧିକାରୀମାନେ ମଧ୍ୟ ଉପସ୍ଥିତ ଥିଲେ।
