କେନ୍ଦ୍ର ଏବଂ ରାଜ୍ୟରେ ଆମ ସରକାର ଓଡ଼ିଶାର ବିକାଶର ଗତିକୁ ତ୍ୱରାନ୍ୱିତ କରିବା ପାଇଁ ସଂକଳ୍ପବଦ୍ଧ: ପ୍ରଧାନମନ୍ତ୍ରୀ

ଭୁବନେଶ୍ୱର: 27/9-ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଓଡ଼ିଶାର ଝାରସୁଗୁଡାଠାରେ 60,000 କୋଟି ଟଙ୍କାରୁ ଅଧିକ ମୂଲ୍ୟର ବିକାଶମୂଳକ ପ୍ରକଳ୍ପର ଉଦଘାଟନ ଏବଂ ଶିଳାନ୍ୟାସ କରିଛନ୍ତି। ପ୍ରଧାନମନ୍ତ୍ରୀ ସମାବେଶକୁ ସମ୍ବୋଧିତ କରି ସେଠାରେ ଉପସ୍ଥିତ ସମସ୍ତ ବିଶିଷ୍ଟ ବ୍ୟକ୍ତିଙ୍କୁ ଶୁଭେଚ୍ଛା ଜଣାଇଥିଲେ। ସେ କହିଥିଲେ, ବର୍ତ୍ତମାନ ନବରାତ୍ରି ପର୍ବ ପାଳନ କରାଯାଉଛି । ଏହି ପବିତ୍ର ଦିନରେ ମା’ ସମଲେଇ ଏବଂ ମା’ ରାମଚଣ୍ଡୀଙ୍କ ପବିତ୍ର ଭୂମିକୁ ଆସିବା ଏବଂ ଆଜିର କାର୍ଯ୍ୟକ୍ରମରେ ସମବେତ ଲୋକମାନଙ୍କୁ ଭେଟିବାର ସୌଭାଗ୍ୟ ତାଙ୍କୁ ମିଳିଛି। ସେ କାର୍ଯ୍ୟକ୍ରମରେ ବହୁ ସଂଖ୍ୟକ ମା’ ଏବଂ ଭଉଣୀଙ୍କ ଉପସ୍ଥିତି ବିଷୟରେ ଉଲ୍ଲେଖ କରି କହିଥିଲେ, ସେମାନଙ୍କର ଆଶୀର୍ବାଦ ହିଁ ଶକ୍ତିର ପ୍ରକୃତ ଉତ୍ସ। ଏହି ଅବସରରେ ସବୁ ଲୋକମାନଙ୍କୁ ସେ ପ୍ରଣାମ ଜଣାଇଥିଲେ।

ଶ୍ରୀ ମୋଦୀ କହିଥିଲେ, ଦେଢ଼ ବର୍ଷ ପୂର୍ବେ ବିଧାନସଭା ନିର୍ବାଚନ ସମୟରେ, ଓଡ଼ିଶାବାସୀ ନୂତନ ପ୍ରତିବଦ୍ଧତା ସହିତ ଏକ ବିକଶିତ ଓଡ଼ିଶା ଆଡ଼କୁ ଆଗକୁ ବଢ଼ିବାକୁ ସଂକଳ୍ପ ନେଇଥିଲେ। ଆଜି କେନ୍ଦ୍ର ଏବଂ ରାଜ୍ୟରେ ସେମାନଙ୍କ ସରକାରଙ୍କ ବିକାଶ ଧାରା ସହିତ ଓଡ଼ିଶା ଦ୍ରୁତ ଗତିରେ ପ୍ରଗତି କରୁଛି। ସେ ଓଡ଼ିଶା ଏବଂ ଦେଶର ବିକାଶ ପାଇଁ ହଜାର ହଜାର କୋଟି ଟଙ୍କାର ପ୍ରକଳ୍ପ ଶୁଭାରମ୍ଭ ବିଷୟରେ ଘୋଷଣା କରିଥିଲେ। ଶ୍ରୀ ମୋଦୀ ବିଏସଏନଏଲର ନୂତନ ଅବତାର ଉନ୍ମୋଚନ କରି ଏହାର ସ୍ୱଦେଶୀ 4ଜି ସେବାର ଶୁଭାରମ୍ଭ କରିଥିଲେ। ସେ କହିଥିଲେ, ଆଜି ବିଭିନ୍ନ ରାଜ୍ୟରେ ଆଇଆଇଟିର ବିସ୍ତାର ମଧ୍ୟ ଆରମ୍ଭ ହେଉଛି। ଏହା ସହିତ, ଓଡ଼ିଶାରେ ଶିକ୍ଷା, ଦକ୍ଷତା ବିକାଶ ଏବଂ ଯୋଗାଯୋଗ ସହିତ ଜଡିତ ଅନେକ ପ୍ରକଳ୍ପର ଶିଳାନ୍ୟାସ ଏବଂ ଉଦଘାଟନ ଉପରେ ସେ ଆଲୋକପାତ କରିଥିଲେ। ବ୍ରହ୍ମପୁରରୁ ସୁରଟ ପର୍ଯ୍ୟନ୍ତ ଆଧୁନିକ ଅମୃତ ଭାରତ ଟ୍ରେନକୁ ପତାକା ଦେଖାଇ ପ୍ରଧାନମନ୍ତ୍ରୀ ଶୁଭାରମ୍ଭ କରିଥିଲେ। ଏହି ଟ୍ରେନ ସ୍ଥାନୀୟ ଲୋକଙ୍କ ପାଇଁ ବ୍ୟାପକ ଲାଭ ଆଣି ଦେବ। କେନ୍ଦ୍ର ରେଳ, ସୂଚନା ଏବଂ ପ୍ରସାରଣ, ଇଲେକ୍ଟ୍ରୋନିକ୍ସ ଏବଂ ଆଇଟି ମନ୍ତ୍ରୀ ଅଶ୍ୱିନୀ ବୈଷ୍ଣବ ଗୁଜରାଟର ସୁରଟରୁ ଆଭାସୀ ମାଧ୍ୟମରେ ଏହି ସମାରୋହରେ ଯୋଗ ଦେଇଥିବା ଶ୍ରୀ ମୋଦୀ କହିଥିଲେ । ଏହି ସମସ୍ତ ବିକାଶମୂଳକ ପଦକ୍ଷେପ ପାଇଁ ସେ ଓଡ଼ିଶାବାସୀଙ୍କୁ ହାର୍ଦ୍ଦିକ ଅଭିନନ୍ଦନ ଜଣାଇଥିଲେ।

ପ୍ରଧାନମନ୍ତ୍ରୀ କହିଥିଲେ, ଆମ ସରକାର ଗରିବଙ୍କ ସେବା ଏବଂ ସଶକ୍ତୀକରଣ ପାଇଁ ସଂକଳ୍ପବଦ୍ଧ। ବଞ୍ଚିତ, ପଛୁଆ ବର୍ଗ ଏବଂ ଆଦିବାସୀ ସମ୍ପ୍ରଦାୟ ସମେତ ଅବହେଳିତ ଲୋକଙ୍କୁ ମୌଳିକ ସୁବିଧା ଯୋଗାଇବା ଉପରେ ଆମେ ଧ୍ୟାନ ଦେଉଛୁ । ଆଜିର କାର୍ଯ୍ୟକ୍ରମ ଏହି ପ୍ରତିବଦ୍ଧତାର ପ୍ରମାଣ ବୋଲି ସେ କହିଥିଲେ । ଶ୍ରୀ ମୋଦୀ ଆହୁରି କହିଥିଲେ, ଅନ୍ତ୍ୟୋଦୟ ଗୃହ ଯୋଜନା ଅଧୀନରେ ହିତାଧିକାରୀମାନଙ୍କୁ କାର୍ଯ୍ୟାଦେଶ ପ୍ରଦାନ କରିବାର ସୁଯୋଗ ତାଙ୍କୁ ମିଳିଛି। ଯେତେବେଳେ ଏକ ଗରିବ ପରିବାର ପକ୍କା ଘର ପାଏ, ଏହା କେବଳ ସେମାନଙ୍କର ବର୍ତ୍ତମାନ ନୁହେଁ ବରଂ ଭବିଷ୍ୟତ ପିଢ଼ିକୁ ମଧ୍ୟ ପରିବର୍ତ୍ତନ କରିଥାଏ। ତାଙ୍କ ସରକାର ସାରା ଦେଶରେ ଗରିବ ପରିବାରକୁ ଚାରି କୋଟିରୁ ଅଧିକ ପକ୍କା ଘର ଯୋଗାଇ ଦେଇସାରିଛି ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ, ଓଡ଼ିଶାରେ ହଜାର ହଜାର ଘର ଦ୍ରୁତ ଗତିରେ ନିର୍ମାଣ କରାଯାଉଛି । ଏହି କ୍ରମରେ ସେ ମୁଖ୍ୟମନ୍ତ୍ରୀ ମୋହନ ମାଝୀ ଏବଂ ତାଙ୍କ ସହଯୋଗୀମାନଙ୍କର ଉଲ୍ଲେଖନୀୟ ପ୍ରୟାସକୁ ପ୍ରଶଂସା କରିଥିଲେ । ଆଜି ପ୍ରାୟ ପଚାଶ ହଜାର ପରିବାର ନୂତନ ଘର ପାଇଁ ଅନୁମୋଦନ ପାଇଛନ୍ତି ବୋଲି ପ୍ରଧାନମନ୍ତ୍ରୀ ଘୋଷଣା କରିଥିଲେ।

ସେ କହିଥିଲେ, ପିଏମ ଜନମନ ଯୋଜନା ଅଧୀନରେ, ଓଡ଼ିଶାରେ ଆଦିବାସୀ ପରିବାର ପାଇଁ ଚାଳିଶ ହଜାରରୁ ଅଧିକ ଘର ମଞ୍ଜୁର କରାଯାଇଛି। ଏହା ଆଦିବାସୀମାନଙ୍କ ମଧ୍ୟରୁ ସବୁଠାରୁ ଅବହେଳିତଙ୍କ ଏକ ପ୍ରମୁଖ ଆକାଂକ୍ଷା ପୂରଣ କରିଛି। ସେ ସମସ୍ତ ହିତାଧିକାରୀ ପରିବାରଙ୍କୁ ଶୁଭକାମନା ଜଣାଇଥିଲେ । ଓଡ଼ିଶାବାସୀଙ୍କ ଦକ୍ଷତା ଏବଂ ପ୍ରତିଭା ଉପରେ ଦୃଢ଼ ବିଶ୍ୱାସ ପ୍ରକାଶ କରି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ପ୍ରକୃତି ଓଡ଼ିଶାକୁ ପ୍ରଚୁର ପରିମାଣରେ ଆଶୀର୍ବାଦ ଦେଇଛି। ଓଡ଼ିଶା ଦଶନ୍ଧି ଧରି ଦାରିଦ୍ର୍ୟ ସହିଆସିଛି ବୋଲି ସ୍ୱୀକାର କରିବା ସହିତ, ସେ ଦୃଢ଼ୋକ୍ତି କରିଥିଲେ ଯେ ଆଗାମୀ ଦଶନ୍ଧି ରାଜ୍ୟବାସୀଙ୍କ ପାଇଁ ସମୃଦ୍ଧି ଆଣିବ। ଏହାକୁ ହାସଲ କରିବା ପାଇଁ, ସରକାର ରାଜ୍ୟକୁ ବହୁ ଗୁରୁତ୍ୱପୂର୍ଣ୍ଣ ପ୍ରକଳ୍ପ ଆଣୁଛନ୍ତି। କେନ୍ଦ୍ର ସରକାର ସମ୍ପ୍ରତି ଓଡ଼ିଶା ପାଇଁ ଦୁଇଟି ସେମିକଣ୍ଡକ୍ଟର ୟୁନିଟ୍ ମମଞ୍ଜୁର କରିଛନ୍ତି ଏବଂ ଗୋଟିଏ ସେମିକଣ୍ଡକ୍ଟର ପାର୍କ ମଧ୍ୟ ପ୍ରତିଷ୍ଠା ହେବାକୁ ଯାଉଛି। ଯାହା ଓଡ଼ିଶାର ଯୁବପିଢ଼ିଙ୍କ ଶକ୍ତି ଏବଂ ସମ୍ଭାବନାକୁ ବଢ଼ାଇବ। ଶ୍ରୀ ମୋଦୀ ଏପରି ଏକ ଭବିଷ୍ୟତର କଳ୍ପନା କରିଥିଲେ ଯେଉଁଠାରେ ଫୋନ୍, ଟେଲିଭିଜନ, ରେଫ୍ରିଜରେଟର, କମ୍ପ୍ୟୁଟର, କାର ଏବଂ ଅନ୍ୟାନ୍ୟ ଅନେକ ଉପକରଣରେ ବ୍ୟବହୃତ ଛୋଟ ଚିପ୍ ଓଡ଼ିଶାରେ ନିର୍ମିତ ହେବ।
ପ୍ରଧାନମନ୍ତ୍ରୀ ଚିପ୍ସ ଠାରୁ ଜାହାଜ ପର୍ଯ୍ୟନ୍ତ ପ୍ରତ୍ୟେକ କ୍ଷେତ୍ରରେ ଆତ୍ମନିର୍ଭରଶୀଳତା ହାସଲ ପାଇଁ ସରକାରଙ୍କ ସଂକଳ୍ପକୁ ପୁନଃ ଦୋହରାଇଥିଲେ। ସେ କହିଥିଲେ, ପାରାଦୀପରୁ ଝାରସୁଗୁଡା ପର୍ଯ୍ୟନ୍ତ ଏକ ବିଶାଳ ଶିଳ୍ପ କରିଡର ବିକଶିତ ହେଉଛି। ଜାହାଜ ନିର୍ମାଣର ରଣନୀତିକ ଗୁରୁତ୍ୱ ଉପରେ ଆଲୋକପାତ କରି ସେ ଉଲ୍ଲେଖ କରିଥିଲେ ଯେ ଆର୍ଥିକ ଶକ୍ତି ପାଇଁ ଆକାଂକ୍ଷୀ ଯେକୌଣସି ରାଷ୍ଟ୍ର ଏହି କ୍ଷେତ୍ରରେ ନିବେଶ କରିବା ଉଚିତ, କାରଣ ଏହା ବାଣିଜ୍ୟ, ପ୍ରଯୁକ୍ତିବିଦ୍ୟା ଏବଂ ଜାତୀୟ ସୁରକ୍ଷାକୁ ଲାଭ ପ୍ରଦାନ କରିଥାଏ। ଶ୍ରୀ ମୋଦୀ କହିଥିଲେ, ସ୍ୱଦେଶୀ ଜାହାଜ ରହିବା ବିଶ୍ୱ ସଙ୍କଟ ସମୟରେ ମଧ୍ୟ ନିରବଚ୍ଛିନ୍ନ ଆମଦାନୀ-ରପ୍ତାନି କାର୍ଯ୍ୟକୁ ସୁନିଶ୍ଚିତ କରେ। ପ୍ରଧାନମନ୍ତ୍ରୀ ସେମାନଙ୍କ ସରକାରଙ୍କ ଦ୍ୱାରା ଏକ ପ୍ରମୁଖ ପଦକ୍ଷେପ ସ୍ୱରୂପ ଭାରତରେ ଜାହାଜ ନିର୍ମାଣ ପାଇଁ 70,000 କୋଟି ଟଙ୍କାର ପ୍ୟାକେଜ୍ ଘୋଷଣା କରିଥିଲେ। ସେ ଆକଳନ କରି କହିଥିଲେ, ଏହା 4.5 ଲକ୍ଷ କୋଟି ଟଙ୍କାର ନିବେଶକୁ ଆକର୍ଷିତ କରିବ ଯାହା ଇସ୍ପାତ, ଯନ୍ତ୍ରପାତି, ଇଲେକ୍ଟ୍ରୋନିକ୍ସ ଏବଂ ଉତ୍ପାଦନ ଭଳି କ୍ଷେତ୍ର ପର୍ଯ୍ୟନ୍ତ ପହଞ୍ଚିବ; ବିଶେଷକରି ଏହା କ୍ଷୁଦ୍ର ଏବଂ କୁଟୀର ଶିଳ୍ପକୁ ଲାଭଦାୟକ କରିବ। ଏହା ଲକ୍ଷ ଲକ୍ଷ ନୂତନ ନିଯୁକ୍ତି ସୃଷ୍ଟି କରିବ ଏବଂ ଓଡ଼ିଶାର ଶିଳ୍ପ ଏବଂ ଯୁବପିଢ଼ି ପାଇଁ ଗୁରୁତ୍ୱପୂର୍ଣ୍ଣ ଲାଭ ଆଣିବ ବୋଲି ସେ କହିଥିଲେ।

ଭାରତ ଆତ୍ମନିର୍ଭରଶୀଳତା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛି ବୋଲି ଉଲ୍ଲେଖ କରି ଶ୍ରୀ ମୋଦୀ କହିଥିଲେ, ପୂର୍ବରୁ ଯେତେବେଳେ 2ଜି, 3 ଜି ଏବଂ 4 ଜି ଭଳି ଦୂରସଞ୍ଚାର ସେବା ବିଶ୍ୱ ସ୍ତରରେ ପ୍ରଚଳନ କରାଯାଇଥିଲା, ସେତେବେଳେ ଭାରତ ପଛରେ ପଡ଼ିଯାଇଥିଲା ଏବଂ ଏହି ସେବା ପାଇଁ ବିଦେଶୀ ପ୍ରଯୁକ୍ତିବିଦ୍ୟା ଉପରେ ନିର୍ଭରଶୀଳ ରହିଥିଲା। ଏପରି ପରିସ୍ଥିତି ଦେଶ ପାଇଁ ଉପଯୁକ୍ତ ନୁହେଁ ବୋଲି ହୃଦୟଙ୍ଗମ କରି ଭାରତ ସ୍ୱଦେଶୀ ଭାବରେ ଅତ୍ୟାବଶ୍ୟକ ଦୂରସଞ୍ଚାର ପ୍ରଯୁକ୍ତିବିଦ୍ୟା ବିକଶିତ କରିବା ପାଇଁ ଏକ ଜାତୀୟ ସଂକଳ୍ପ ନେଇଥିଲା। ବିଏସଏନଏଲ ଭାରତରେ ଏକ ସ୍ୱଦେଶୀ 4ଜି ପ୍ରଯୁକ୍ତିବିଦ୍ୟା ସଫଳତାର ସହିତ ବିକଶିତ କରିଛି ବୋଲି ସେ ଗର୍ବର ସହିତ କହିଥିଲେ। ଏହି ମାଇଲଖୁଣ୍ଟ ସୃଷ୍ଟି କରିବାରେ ସେ ବିଏସଏନଏଲର ନିଷ୍ଠା, ଦୃଢ଼ତା ଏବଂ ବିଶେଷଜ୍ଞତାକୁ ପ୍ରଶଂସା କରିଥିଲେ। ସେ ଆହୁରି ମଧ୍ୟ କହିଥିଲେ, ଭାରତୀୟ କମ୍ପାନୀଗୁଡ଼ିକ ଏବେ ବିଶ୍ୱର ପାଞ୍ଚଟି ମନୋନୀତ ଦେଶ ମଧ୍ୟରେ ଭାରତକୁ ସ୍ଥାନିତ କରିଛନ୍ତି ଯେଉଁଠାରେ 4ଜି ସେବା ଆରମ୍ଭ କରିବା ପାଇଁ ସମ୍ପୂର୍ଣ୍ଣ ସ୍ୱଦେଶୀ ପ୍ରଯୁକ୍ତିବିଦ୍ୟା ଅଛି।

ପ୍ରଧାନମନ୍ତ୍ରୀ ଆଜି ବିଏସଏନଏଲର 25ତମ ବାର୍ଷିକୀ ପାଳନର ସଂଯୋଗ ବିଷୟରେ ଉଲ୍ଲେଖ କରିଥିଲେ। ଏହି ଐତିହାସିକ ଅବସରରେ, ସେ ଆଲୋକପାତ କରି କହିଥିଲେ ଯେ ବିଏସଏନଏଲ ଏବଂ ଏହାର ଅଂଶୀଦାରମାନଙ୍କ ଉତ୍ସର୍ଗୀକୃତ ପ୍ରୟାସ ମାଧ୍ୟମରେ ଭାରତ ଏକ ବିଶ୍ୱସ୍ତରୀୟ ଦୂରସଞ୍ଚାର ଉତ୍ପାଦନ କେନ୍ଦ୍ର ହେବା ଦିଗରେ ଅଗ୍ରସର ହେଉଛି। ସେ କହିଥିଲେ ଯେ ଏହା ଓଡ଼ିଶା ପାଇଁ ଗର୍ବର ବିଷୟ ଯେ ବିଏସଏନଏଲର ସ୍ୱଦେଶୀ 4ଜି ନେଟୱାର୍କ ଝାରସୁଗୁଡାରୁ ଆରମ୍ଭ ହେଉଛି, ଯେଉଁଥିରେ ପ୍ରାୟ ଏକ ଲକ୍ଷ 4ଜି ଟାୱାର ଅନ୍ତର୍ଭୁକ୍ତ। ଏହି ଟାୱାରଗୁଡ଼ିକ ଦେଶର ଦୂରଦୂରାନ୍ତ ଅଞ୍ଚଳରେ ସଂଯୋଗର ଏକ ନୂତନ ଯୁଗ ଆରମ୍ଭ କରିବାକୁ ପ୍ରସ୍ତୁତ। ଶ୍ରୀ ମୋଦୀ ଗୁରୁତ୍ୱାରୋପ କରିଥିଲେ ଯେ 4ଜି ପ୍ରଯୁକ୍ତିର ବିସ୍ତାର ଦେଶବ୍ୟାପୀ ଦୁଇ କୋଟିରୁ ଅଧିକ ଲୋକଙ୍କୁ ସିଧାସଳଖ ଲାଭ ଦେବ। ସେ ଆହୁରି ମଧ୍ୟ କହିଥିଲେ, ପୂର୍ବରୁ ହାଇ-ସ୍ପିଡ୍ ଇଣ୍ଟରନେଟ୍ ସୁବିଧା ନଥିବା ପ୍ରାୟ ତିରିଶ ହଜାର ଗ୍ରାମକୁ ଏହି ପଦକ୍ଷେପ ମାଧ୍ୟମରେ ସଂଯୋଗ କରାଯିବ।

ପ୍ରଧାନମନ୍ତ୍ରୀ କହିଥିଲେ, ହଜାର ହଜାର ଗ୍ରାମ ଏହି ଐତିହାସିକ ଦିନକୁ ସାକ୍ଷୀ ରଖିବା ପାଇଁ ଆଭାସୀ ମାଧ୍ୟମରେ ଯୋଡ଼ି ହୋଇଛନ୍ତି । ହାଇ-ସ୍ପିଡ୍ ଇଣ୍ଟରନେଟ୍ ମାଧ୍ୟମରେ ସେମାନେ ଏହି କାର୍ଯ୍ୟକ୍ରମକୁ ଶୁଣି ଏବଂ ଦେଖିପାରୁଛନ୍ତି । କେନ୍ଦ୍ର ସଞ୍ଚାର ମନ୍ତ୍ରୀ  ଜ୍ୟୋତିରାଦିତ୍ୟ ସିନ୍ଧିଆ ମଧ୍ୟ ଆସାମରୁ ଯୋଡ଼ି ହୋଇଥିବା ସେ କହିଥିଲେ । ବିଏସଏନଏଲର ସ୍ୱଦେଶୀ 4ଜି ସେବା ଆଦିବାସୀ ଅଞ୍ଚଳ, ଦୁର୍ଗମ ଗ୍ରାମ ଏବଂ ପାହାଡ଼ିଆ ଅଞ୍ଚଳ ପାଇଁ ସର୍ବାଧିକ ଲାଭଦାୟକ ହେବ ବୋଲି ଶ୍ରୀ ମୋଦୀ ଉଲ୍ଲେଖ କରିଥିଲେ। ଏହି ଅଞ୍ଚଳର ଲୋକମାନେ ଏବେ ଗୁଣାତ୍ମକ ଡିଜିଟାଲ୍ ସେବା ପାଇପାରିବେ ବୋଲି ସେ ଦୃଢ଼ୋକ୍ତି ପ୍ରକାଶ କରିଥିଲେ । ପ୍ରଧାନମନ୍ତ୍ରୀ କହିଥିଲେ, ଗ୍ରାମାଞ୍ଚଳର ପିଲାମାନେ ଅନଲାଇନ୍ ଶ୍ରେଣୀରେ ପାଠ ପଢ଼ିପାରିବେ। ଦୂରବର୍ତ୍ତୀ ଅଞ୍ଚଳର ଚାଷୀମାନେ ଫସଲ ମୂଲ୍ୟ ଯାଞ୍ଚ କରିପାରିବେ ଏବଂ ରୋଗୀମାନେ ଟେଲିମେଡିସିନ୍ ମାଧ୍ୟମରେ ଡାକ୍ତରଙ୍କ ସହିତ ପରାମର୍ଶ କରିବାକୁ ସହଜ ପାଇବେ। ଏହି ପଦକ୍ଷେପ ଆମର ସଶସ୍ତ୍ର ବାହିନୀ କର୍ମଚାରୀମାନଙ୍କୁ ମଧ୍ୟ ବହୁତ ଲାଭ ଦେବ, ସେମାନଙ୍କୁ ଉନ୍ନତ ସଂଯୋଗୀକରଣ ମାଧ୍ୟମରେ ସୁରକ୍ଷିତ ଭାବରେ ଯୋଗାଯୋଗ କରିବାକୁ ସକ୍ଷମ କରିବ ବୋଲି ପ୍ରଧାନମନ୍ତ୍ରୀ କହିଥିଲେ ।

ଭାରତ କିଛିଦିନ ପୂର୍ବରୁ ଦ୍ରୁତତମ 5ଜି ସେବା ଆରମ୍ଭ କରିସାରିଛି ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ, ଆଜି ଉଦଘାଟନ ହୋଇଥିବା ବିଏସଏନଏଲ ଟାୱାରଗୁଡ଼ିକ 5ଜିସେବାକୁ ସମର୍ଥନ କରିବା ପାଇଁ ପ୍ରସ୍ତୁତ। ଏହି ଐତିହାସିକ ଅବସରରେ ସେ ବିଏସଏନଏଲ ଏବଂ ଦେଶର ସମସ୍ତ ନାଗରିକଙ୍କୁ ହାର୍ଦ୍ଦିକ ଅଭିନନ୍ଦନ ଜଣାଇଥିଲେ। ଆତ୍ମନିର୍ଭର ଭାରତ ଗଠନ ପାଇଁ ଦକ୍ଷ ଯୁବପିଢ଼ି ଏବଂ ଏକ ଦୃଢ଼ ଗବେଷଣା ଇକୋସିଷ୍ଟମ ଅତ୍ୟନ୍ତ ଜରୁରୀ ବୋଲି ଗୁରୁତ୍ୱାରୋପ କରି ଶ୍ରୀ ମୋଦୀ କହିଥିଲେ, ଏହା ସେମାନଙ୍କ ସରକାରଙ୍କ ପାଇଁ ଏକ ପ୍ରମୁଖ ପ୍ରାଥମିକତା। ସେ ଓଡ଼ିଶା ସମେତ ଦେଶବ୍ୟାପୀ ଶିକ୍ଷା ଏବଂ ଦକ୍ଷତା ବିକାଶରେ ହେଉଥିବା ଅଭୂତପୂର୍ବ ନିବେଶ ଉପରେ ଆଲୋକପାତ କରିଥିଲେ। ପ୍ରଧାନମନ୍ତ୍ରୀ ଘୋଷଣା କରିଥିଲେ ଯେ ଇଞ୍ଜିନିୟରିଂ କଲେଜ ଏବଂ ପଲିଟେକ୍ନିକ୍ ଆଧୁନିକୀକରଣ କରାଯାଉଛି। ଏହି ପ୍ରୟାସକୁ ସମର୍ଥନ କରିବା ପାଇଁ ମେରିଟ ନାମକ ଏକ ନୂତନ ଯୋଜନା ଆରମ୍ଭ କରାଯାଇଛି । ଏହି ଯୋଜନା ଅଧୀନରେ, ବୈଷୟିକ ଶିକ୍ଷା ପ୍ରତିଷ୍ଠାନରେ ହଜାର ହଜାର କୋଟି ଟଙ୍କା ବିନିଯୋଗ କରାଯିବ। ଏହା ଯୁବପିଢ଼ିଙ୍କୁ ଗୁଣାତ୍ମକ ବୈଷୟିକ ଶିକ୍ଷା ପାଇଁ ବଡ଼ ସହରକୁ ସ୍ଥାନାନ୍ତରିତ ହେବାର ବାଧ୍ୟତାକୁ ଦୂର କରିବ। ଏହା ବଦଳରେ, ସେମାନଙ୍କ ପାଖରେ ନିଜ ସହର ମଧ୍ୟରେ ଆଧୁନିକ ପ୍ରୟୋଗଶାଳା, ବିଶ୍ୱସ୍ତରୀୟ ଦକ୍ଷତା ତାଲିମ ଏବଂ ଷ୍ଟାର୍ଟଅପ୍ ସୁଯୋଗ ଉପଲବ୍ଧ ହେବ।

ପ୍ରଧାନମନ୍ତ୍ରୀ କହିଥିଲେ ଯେ ଦେଶର ପ୍ରତ୍ୟେକ କ୍ଷେତ୍ର, ପ୍ରତ୍ୟେକ ସମ୍ପ୍ରଦାୟ ଏବଂ ପ୍ରତ୍ୟେକ ନାଗରିକଙ୍କ ପାଖରେ ସୁବିଧା ଉପଲବ୍ଧତା ନିଶ୍ଚିତ କରିବା ପାଇଁ ଅଭୂତପୂର୍ବ ପ୍ରୟାସ ଚାଲିଛି। ଏହା ହାସଲ କରିବା ପାଇଁ ରେକର୍ଡ ସ୍ତରର ନିବେଶ କରାଯାଉଛି। ଅତୀତକୁ ପ୍ରତିଫଳିତ କରି, ସେ ମନ୍ତବ୍ୟ ଦେଇଥିଲେ ଯେ ଲୋକମାନେ ପୂର୍ବ ପରିସ୍ଥିତି ବିଷୟରେ ଭଲ ଭାବରେ ଜାଣନ୍ତି। ବିରୋଧୀ ଜନତାଙ୍କୁ ଶୋଷଣ କରିବାର ସୁଯୋଗ କେବେ ହାତଛଡ଼ା କରିନାହାଁନ୍ତି ବୋଲି ସେ ଦୃଢ଼ ଭାବରେ କହିଥିଲେ। ଶ୍ରୀ ମୋଦୀ କହିଥିଲେ ଯେ 2014 ମସିହାରେ, ଯେତେବେଳେ ଲୋକମାନେ ତାଙ୍କ ସରକାରଙ୍କୁ ସେବା କରିବାର ସୁଯୋଗ ଦେଇଥିଲେ, ତାଙ୍କର ସୁଶାସନ ବିରୋଧୀଙ୍କ ଶୋଷଣକାରୀ ବ୍ୟବସ୍ଥା କବଳରୁ ଦେଶକୁ ସଫଳତାର ସହିତ ମୁକ୍ତ କରିଥିଲା। ତାଙ୍କ ସରକାର ଅଧୀନରେ, ଦ୍ୱିଗୁଣିତ ସଞ୍ଚୟ ଏବଂ ଦ୍ୱିଗୁଣିତ ରୋଜଗାରର ଏକ ନୂତନ ଯୁଗ ଆରମ୍ଭ ହୋଇଛି। ସେ ଅତୀତର ତୁଳନା କରି ଉଲ୍ଲେଖ କରିଥିଲେ ଯେ ପୂର୍ବ ବ୍ୟବସ୍ଥା ଶାସନ ସମୟରେ, କର୍ମଚାରୀ ଏବଂ ବ୍ୟବସାୟୀମାନଙ୍କୁ 2 ଲକ୍ଷ ଟଙ୍କା ପର୍ଯ୍ୟନ୍ତ ଆୟ ଉପରେ ମଧ୍ୟ ଟିକସ ଦେବାକୁ ପଡୁଥିଲା। ଆଜି, ବାର୍ଷିକ 12 ଲକ୍ଷ ଟଙ୍କା ପର୍ଯ୍ୟନ୍ତ ଆୟ କରୁଥିବା ବ୍ୟକ୍ତିମାନଙ୍କୁ ଆୟକରରେ ଗୋଟିଏ ଟଙ୍କା ମଧ୍ୟ ଦେବାକୁ ପଡ଼ିବ ନାହିଁ ବୋଲି ସେ କହିଥିଲେ । 22 ସେପ୍ଟେମ୍ବର 2025 ଠାରୁ ଓଡ଼ିଶା ସମେତ ସାରା ଦେଶରେ ନୂତନ ଜିଏସଟି ସଂସ୍କାର କାର୍ଯ୍ୟକାରୀ ହୋଇଛି ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ, ଏହି ସଂସ୍କାରଗୁଡ଼ିକୁ ସମସ୍ତଙ୍କ ପାଇଁ ସଞ୍ଚୟର ଉପହାର । ବିଶେଷକରି ମା’ ଏବଂ ଭଉଣୀମାନଙ୍କ ପାଇଁ ରୋଷେଇ ଘର ଖର୍ଚ୍ଚକୁ ଅଧିକ ସୁଲଭ କରାଯାଇଛି । ସେ କହିଥିଲେ, ଅଧିକାଂଶ ଅତ୍ୟାବଶ୍ୟକ ଜିନିଷର ମୂଲ୍ୟ ଯଥେଷ୍ଟ ହ୍ରାସ ପାଇଛି। ଓଡ଼ିଶାରେ ଗୋଟିଏ ପରିବାର ପ୍ରତିବର୍ଷ ତେଜରାତି ସାମଗ୍ରୀ ଏବଂ ଅନ୍ୟାନ୍ୟ ଅତ୍ୟାବଶ୍ୟକ ଜିନିଷପତ୍ର ପାଇଁ 1 ଲକ୍ଷ ଟଙ୍କା ଖର୍ଚ୍ଚ କରୁଥିଲେ। ଏମାନେ 2014 ପୂର୍ବରୁ ତତ୍କାଳୀନ ଶାସକ ସରକାରଙ୍କ ସମୟରେ 20,000-25,000 ଟଙ୍କାର ଟିକସ ଦେଉଥିଲେ। 2017ରେ ସେମାନଙ୍କ ସରକାର ଦ୍ୱାରା ଜିଏସଟି ପ୍ରଚଳନ ପରେ ଏହି ଟିକସ ପରିମାଣ ହ୍ରାସ ପାଇଥିଲା। ବର୍ତ୍ତମାନ, ଟିକସ ବୋଝ ଯଥେଷ୍ଟ ହ୍ରାସ ପାଇଛି, ପରିବାରଗୁଡ଼ିକ ବାର୍ଷିକ ମାତ୍ର 5,000-6,000 ଟଙ୍କାର ଟିକସ ଦେଉଛନ୍ତି। ବିରୋଧୀ ଯୁଗ ତୁଳନାରେ, ପରିବାରଗୁଡ଼ିକ ଏବେ ପ୍ରତିବର୍ଷ ଏପରି ଖର୍ଚ୍ଚ ପାଇଁ 15,000-20,000 ସଞ୍ଚୟ କରୁଛନ୍ତି ବୋଲି ସେ ଜୋର ଦେଇ କହିଥିଲେ ।
ପ୍ରଧାନମନ୍ତ୍ରୀ କହିଥିଲେ, ଓଡ଼ିଶା ଚାଷୀମାନଙ୍କର ଭୂମି । ଜିଏସଟି ସଞ୍ଚୟ ମହୋତ୍ସବ ସେମାନଙ୍କ ପାଇଁ ଅତ୍ୟନ୍ତ ଲାଭଦାୟକ ହେବ। ପ୍ରଧାନମନ୍ତ୍ରୀ ପୂର୍ବ କଥା ମନେ ପକାଇ କହିଥିଲେ, ବିରୋଧୀ ଦଳ ସମୟରେ ଚାଷୀମାନଙ୍କୁ ଟ୍ରାକ୍ଟର କିଣିବା ସମୟରେ 70,000 ଟଙ୍କାର ଟିକସ ଦେବାକୁ ପଡୁଥିଲା। ଜିଏସଟି ପ୍ରଚଳନ ସହିତ ଟିକସ ହ୍ରାସ କରାଯାଇଥିଲା ଏବଂ ନୂତନ ଜିଏସଟି ଢାଞ୍ଚା ଅଧୀନରେ ଚାଷୀମାନେ ବର୍ତ୍ତମାନ ସମାନ ଟ୍ରାକ୍ଟରରେ ପ୍ରାୟ 40,000 ଟଙ୍କା ସଞ୍ଚୟ କରୁଛନ୍ତି। ସେ ଆହୁରି ମଧ୍ୟ କହିଥିଲେ, ଧାନ ବିହନ ପାଇଁ ବ୍ୟବହୃତ ମେସିନଗୁଡ଼ିକ ବର୍ତ୍ତମାନ 15,000, ପାୱାର ଟିଲର୍ 10,000 ଏବଂ ଥ୍ରେଶର 25,000 ଟଙ୍କା ପର୍ଯ୍ୟନ୍ତ ଶସ୍ତା ହୋଇଛି । ତାଙ୍କ ସରକାର ଅନେକ କୃଷି ଉପକରଣ ଏବଂ ଉପକରଣ ଉପରେ ଟିକସକୁ ଯଥେଷ୍ଟ ହ୍ରାସ କରିଛନ୍ତି ବୋଲି ପ୍ରଧାନମନ୍ତ୍ରୀ ଜୋର ଦେଇ କହିଥିଲେ । ଓଡ଼ିଶାରେ ବହୁ ସଂଖ୍ୟାରେ ଆଦିବାସୀ ଜନସଂଖ୍ୟା ବସବାସ କରନ୍ତି । ଯେଉଁମାନେ ଜୀବିକା ପାଇଁ ଜଙ୍ଗଲ ଉତ୍ପାଦ ଉପରେ ନିର୍ଭର କରନ୍ତି। ସରକାର ପୂର୍ବରୁ କେନ୍ଦୁ ପତ୍ର ସଂଗ୍ରହକାରୀଙ୍କ ପାଇଁ କାମ କରିଆସୁଛନ୍ତି ଏବଂ ବର୍ତ୍ତମାନ ଏହି ସାମଗ୍ରୀ ଉପରେ ଜିଏସଟି ଯଥେଷ୍ଟ ହ୍ରାସ କରିଛନ୍ତି, ଯାହା ସଂଗ୍ରହକାରୀଙ୍କ ପାଇଁ ଭଲ ମୂଲ୍ୟ ସୁନିଶ୍ଚିତ କରୁଛି ବୋଲି ସେ କହିଥିଲେ । ପ୍ରଧାନମନ୍ତ୍ରୀ ଜୋର ଦେଇ କହିଥିଲେ, ତାଙ୍କ ସରକାର ନିରନ୍ତର ଟିକସ ରିହାତି ପ୍ରଦାନ କରୁଛି ଏବଂ ନାଗରିକମାନଙ୍କ ପାଇଁ ସଞ୍ଚୟ ବୃଦ୍ଧି କରୁଛି। ଅନ୍ୟପକ୍ଷରେ ବିରୋଧୀମାନେ ଶୋଷଣମୂଳକ ପ୍ରଥା ଜାରି ରଖିଥିଲେ ବୋଲି ସେ ଅଭିଯୋଗ କରିଥିଲେ ।

ଶ୍ରୀ ମୋଦୀ ସମାଲୋଚନା କରି କହିଥିଲେ, ବିରୋଧୀ ନେତୃତ୍ୱାଧୀନ ସରକାରଗୁଡ଼ିକ ଏବେ ବି ଜନସାଧାରଣଙ୍କୁ ଲୁଟ କରିବାରେ ନିୟୋଜିତ ଅଛନ୍ତି। ନୂତନ ଜିଏସଟି ହାର ଲାଗୁ
କରାଯିବା ସମୟରେ ଘର ନିର୍ମାଣ ଏବଂ ମରାମତିକୁ ଅଧିକ ସୁଲଭ କରିବା ପାଇଁ ସିମେଣ୍ଟ ଉପରେ ଟିକସ ମଧ୍ୟ ହ୍ରାସ କରାଯାଇଥିଲା। 22 ସେପ୍ଟେମ୍ବର ପରେ ହିମାଚଳ ପ୍ରଦେଶରେ ମଧ୍ୟ ସିମେଣ୍ଟ ମୂଲ୍ୟ ହ୍ରାସ ପାଇଥିଲା। ତଥାପି, ହିମାଚଳ ସରକାର ସିମେଣ୍ଟ ଉପରେ ଅତିରିକ୍ତ ଟିକସ ଲାଗୁ କରିଥିଲେ, ଯାହା ଲୋକଙ୍କୁ ଏହି ଲାଭରୁ ବଞ୍ଚିତ କରିଥିବା ପ୍ରଧାନମନ୍ତ୍ରୀ ଦାବି କରିଥିଲେ । ସେ ଚେତାଇ ଦେଇ କହିଥିଲେ, ବିରୋଧୀ ଦଳ ଯେଉଁଠାରେ ଶାସନ କରେ, ସେଠାରେ ଶୋଷଣ ହୁଏ । ନାଗରିକମାନଙ୍କୁ ଏହି ଦଳ ପ୍ରତି ସତର୍କ ରହିବାକୁ ଅନୁରୋଧ କରିଥିଲେ। ଶ୍ରୀ ମୋଦୀ କହିଥିଲେ ଯେ ଜିଏସଟି ସଞ୍ଚୟ ମହୋତ୍ସବ ମା’ ଏବଂ ଭଉଣୀମାନଙ୍କ ପାଇଁ ସର୍ବୋତ୍ତମ ଆନନ୍ଦ ଆଣିଛି। ମହିଳା ଏବଂ ଝିଅମାନଙ୍କର ସେବା କରିବା ସରକାରଙ୍କ ପାଇଁ ସର୍ବୋଚ୍ଚ ପ୍ରାଥମିକତା। ସେମାନଙ୍କ ସ୍ୱାସ୍ଥ୍ୟ ଉପରେ ଦୃଢ଼ ଧ୍ୟାନ ଦିଆଯାଉଛି। ପରିବାର ଲାଗି ମା’ମାନଙ୍କର ବଳିଦାନକୁ ସ୍ୱୀକାର କରି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ, ମା’ମାନେ ସେମାନଙ୍କ ପିଲାମାନଙ୍କୁ ସୁରକ୍ଷା ଦେବା ପାଇଁ ପ୍ରତ୍ୟେକ କଷ୍ଟ ସହିଥାନ୍ତି । ସେମାନେ ପ୍ରାୟତଃ ନିଜର ରୋଗକୁ ଲୁଚାଇଥା’ନ୍ତି । ପରିବାର ଉପରେ ଚିକିତ୍ସା ଖର୍ଚ୍ଚର ଭାର ନ ପକାଇବା ପାଇଁ ମା’ମାନେ ନିଜର ରୋଗକୁ ଲୁଚାଇ ରଖନ୍ତି। ଏହାକୁ ଦୃଷ୍ଟିରେ ରଖି ଆୟୁଷ୍ମାନ ଭାରତ ଯୋଜନା ଆରମ୍ଭ କରାଯାଇଥିଲା, ଯାହା 5 ଲକ୍ଷ ଟଙ୍କା ପର୍ଯ୍ୟନ୍ତ ମାଗଣା ଚିକିତ୍ସା ଯୋଗାଇ ଦେଇ ମହିଳାଙ୍କୁ ଯଥେଷ୍ଟ ଲାଭ ଦେଇଛି। ଜଣେ ସୁସ୍ଥ ମା’ ଏକ ସୁଦୃଢ଼ ​​ପରିବାର ଗଠନ କରନ୍ତି ବୋଲି ଗୁରୁତ୍ୱାରୋପ କରି ଶ୍ରୀ ମୋଦୀ ୧୭ ସେପ୍ଟେମ୍ବର ୨୦୨୫ ରୁ ଦେଶବ୍ୟାପୀ ଆରମ୍ଭ ହୋଇଥିବା “ସ୍ୱସ୍ଥ ନାରୀ, ସଶକ୍ତ ପରିବାର” ଅଭିଯାନ ଉପରେ ଆଲୋକପାତ କରିଥିଲେ। ସେ ସୂଚନା ଦେଇଥିଲେ ଯେ ଏହି ପଦକ୍ଷେପ ଅଧୀନରେ ସାରା ଦେଶରେ ଆଠ ଲକ୍ଷରୁ ଅଧିକ ସ୍ୱାସ୍ଥ୍ୟ ଶିବିର ଆୟୋଜନ କରାଯାଇଛି, ଯେଉଁଥିରେ ତିନି କୋଟିରୁ ଅଧିକ ମହିଳା ସ୍ୱାସ୍ଥ୍ୟ ପରୀକ୍ଷା କରିଛନ୍ତି। ଏହି ଶିବିରଗୁଡ଼ିକ ମଧୁମେହ, ସ୍ତନ କର୍କଟ, ଯକ୍ଷ୍ମା ଏବଂ ସିକଲ୍ ସେଲ୍ ଏନିମିଆ ଭଳି ରୋଗ ନିର୍ଣ୍ଣୟକୁ ସହଜ କରୁଛି। ସେ ଓଡ଼ିଶାର ସମସ୍ତ ମା’, ଭଉଣୀ ଏବଂ ଝିଅମାନଙ୍କୁ ସେମାନଙ୍କର ସ୍ୱାସ୍ଥ୍ୟ ପରୀକ୍ଷା ନିଶ୍ଚିତ କରିବାକୁ ଅନୁରୋଧ କରିଥିଲେ।

ପ୍ରଧାନମନ୍ତ୍ରୀ କହିଥିଲେ, ତାଙ୍କ ସରକାର ଟିକସ ରିହାତି ଏବଂ ଆଧୁନିକ ସଂଯୋଗୀକରଣ ସହିତ ସୁବିଧା ଓ ସମୃଦ୍ଧିର ପଥ ପ୍ରଶସ୍ତ କରିମାଧ୍ୟମରେ ଦେଶ ଏହାର ନାଗରିକମାନଙ୍କର ସାମର୍ଥ୍ୟ ବୃଦ୍ଧି କରିବା ପାଇଁ ନିରନ୍ତର କାର୍ଯ୍ୟ କରୁଛି । ଓଡ଼ିଶା ଏହି ପ୍ରୟାସରୁ ଗୁରୁତ୍ୱପୂର୍ଣ୍ଣ ଲାଭ ପାଉଛି, ରାଜ୍ୟରେ ବର୍ତ୍ତମାନ ଛଅଟି ବନ୍ଦେ ଭାରତ ଟ୍ରେନ୍ ଚାଲୁଛି ଏବଂ ପ୍ରାୟ ଷାଠିଏଟି ରେଳ ଷ୍ଟେସନରେ ଆଧୁନିକୀକରଣ ଚାଲିଛି। ଝାରସୁଗୁଡ଼ାର ବୀର ସୁରେନ୍ଦ୍ର ସାଏ ବିମାନବନ୍ଦର ବର୍ତ୍ତମାନ ଭାରତର ଅନେକ ପ୍ରମୁଖ ସହର ସହିତ ଯୋଡ଼ି ହୋଇଛି । ଖଣିଜ ପଦାର୍ଥ ଏବଂ ଖଣି ଖନନରୁ ଓଡ଼ିଶା ମଧ୍ୟ ଯଥେଷ୍ଟ ଅଧିକ ରାଜସ୍ୱ ପାଉଛି। ସୁଭଦ୍ରା ଯୋଜନା ନିରନ୍ତର ଭାବରେ ଓଡ଼ିଶାର ମହିଳାମାନଙ୍କୁ ସମର୍ଥନ କରୁଛି ବୋଲି ଶ୍ରୀ ମୋଦୀ ଉଲ୍ଲେଖ କରିଥିଲେ । ଓଡ଼ିଶା ପ୍ରଗତି ପଥରେ ଦୃଢ଼ ଭାବରେ ଆଗେଇ ଚାଲିଛି ଏବଂ ବିକାଶର ଗତି ଆହୁରି ତ୍ୱରାନ୍ୱିତ ହେବ ବୋଲି ସେ ଆଶ୍ୱାସନା ଦେଇଥିଲେ। ଶେଷରେ ସେ ସମସ୍ତଙ୍କୁ ଶୁଭକାମନା ଜଣାଇଥିଲେ। କାର୍ଯ୍ୟକ୍ରମରେ ଓଡ଼ିଶାର ରାଜ୍ୟପାଳ ଡକ୍ଟର ହରି ବାବୁ କମ୍ଭମପାଟି, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, କେନ୍ଦ୍ରମନ୍ତ୍ରୀ ଜୁଏଲ ଓରାମ ପ୍ରମୁଖ ଉପସ୍ଥିତ ଥିଲେ। ଭିଡିଓ କନଫରେନ୍ସିଂ ମାଧ୍ୟମରେ ଆଜିର କାର୍ଯ୍ୟକ୍ରମରେ ଦେଶବ୍ୟାପୀ ଅନେକ କେନ୍ଦ୍ର ମନ୍ତ୍ରୀ ଏବଂ ମୁଖ୍ୟମନ୍ତ୍ରୀମାନେ ଯୋଗ ଦେଇଥିଲେ।

ପୃଷ୍ଠଭୂମି

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଝାରସୁଗୁଡାଠାରେ 60,000 କୋଟି ଟଙ୍କାରୁ ଅଧିକ ମୂଲ୍ୟର ବିଭିନ୍ନ ଉନ୍ନୟନ ପ୍ରକଳ୍ପର ଶିଳାନ୍ୟାସ ଏବଂ ଉଦଘାଟନ କରିଛନ୍ତି। ଏହି ପ୍ରକଳ୍ପଗୁଡ଼ିକ ଦୂରସଞ୍ଚାର, ରେଳବାଇ, ଉଚ୍ଚଶିକ୍ଷା, ସ୍ୱାସ୍ଥ୍ୟସେବା, ଦକ୍ଷତା ବିକାଶ, ଗ୍ରାମୀଣ ଗୃହ ନିର୍ମାଣ କ୍ଷେତ୍ର ସମେତ ଅନ୍ୟାନ୍ୟ କ୍ଷେତ୍ର ସହ ଜଡ଼ିତ। ଦୂରସଞ୍ଚାର ସଂଯୋଗ କ୍ଷେତ୍ରରେ, ପ୍ରଧାନମନ୍ତ୍ରୀ ସ୍ୱଦେଶୀ ପ୍ରଯୁକ୍ତିବିଦ୍ୟା ସହିତ ପ୍ରାୟ 37,000 କୋଟି ଟଙ୍କା ବ୍ୟୟରେ ନିର୍ମିତ 97,500ରୁ ଅଧିକ ମୋବାଇଲ୍ 4ଜି ଟାୱାରକୁ ଲୋକାର୍ପଣ କରିଛନ୍ତି। ଏଥିରେ ବିଏସଏନଏଲ ଦ୍ୱାରା 92,600ରୁ ଅଧିକ 4ଜି ଟେକ୍ନୋଲୋଜି ସାଇଟ୍ ଅନ୍ତର୍ଭୁକ୍ତ। ଡିଜିଟାଲ୍ ଭାରତ ନିଧି ଅଧୀନରେ 18,900ରୁ ଅଧିକ 4ଜି ସାଇଟ୍ ପାଇଁ ପାଣ୍ଠି ଯୋଗାଇ ଦିଆଯାଇଛି ଯାହା ଦୂରଦୂରାନ୍ତ, ସୀମାନ୍ତ ଏବଂ ବାମପନ୍ଥୀ ଉଗ୍ରବାଦ ପ୍ରଭାବିତ ଅଞ୍ଚଳର ପ୍ରାୟ 26,700 ଅପହଞ୍ଚ ଗ୍ରାମକୁ ସଂଯୋଗ କରିବ। ଏଥିସହିତ 20 ଲକ୍ଷରୁ ଅଧିକ ନୂତନ ଗ୍ରାହକଙ୍କୁ ସେବା ଯୋଗାଇବ। ଏହି ଟାୱାରଗୁଡ଼ିକ ସୌରଶକ୍ତି ଦ୍ୱାରା ପରିଚାଳିତ, ଯାହାଫଳରେ ଏଗୁଡ଼ିକ ଭାରତର ସର୍ବବୃହତ ସବୁଜ ଦୂରସଞ୍ଚାର ସାଇଟ୍ କ୍ଲଷ୍ଟର ନିର୍ମାଣ କରିବ ଏବଂ ଦୀର୍ଘସ୍ଥାୟୀ ଭିତ୍ତିଭୂମିକୁ ସୁଦୃଢ କରିବ।

ପ୍ରଧାନମନ୍ତ୍ରୀ ଏହି ଅବସରରେ ଗୁରୁତ୍ୱପୂର୍ଣ୍ଣ ରେଳ ପ୍ରକଳ୍ପଗୁଡ଼ିକର ଶିଳାନ୍ୟାସ ଏବଂ ଦେଶକୁ ଉତ୍ସର୍ଗ କରିଛନ୍ତି ଯାହା ଯୋଗାଯୋଗ ଏବଂ ଆଞ୍ଚଳିକ ବିକାଶକୁ ତ୍ୱରାନ୍ୱିତ କରିବ। ଏଥିରେ ସମ୍ବଲପୁର-ସରଲାରେ ରେଳ ଫ୍ଲାଏଓଭର ପାଇଁ ଶିଳାନ୍ୟାସ, କୋରାପୁଟ-ବୈଗୁଡ଼ା ଲାଇନର ଦୋହରୀକରଣ ଏବଂ ମାନାବାର-କୋରାପୁଟ-ଗୋରାପୁର ଲାଇନକୁ ରାଷ୍ଟ୍ର ଉଦ୍ଦେଶ୍ୟରେ ଲୋକର୍ପଣ ସାମିଲ ରହିଛି । ଏହି ପ୍ରକଳ୍ପଗୁଡ଼ିକ ଓଡ଼ିଶା ଏବଂ ପଡ଼ୋଶୀ ରାଜ୍ୟଗୁଡ଼ିକରେ ମାଲ ପରିବହନ ଏବଂ ଯାତ୍ରୀ ପରିବହନରେ ଉଲ୍ଲେଖନୀୟ ଉନ୍ନତି ଆଣିବ, ସ୍ଥାନୀୟ ଶିଳ୍ପ ଏବଂ ବାଣିଜ୍ୟକୁ ସୁଦୃଢ଼ ​​କରିବ। ଏହି ଅବସରରେ, ପ୍ରଧାନମନ୍ତ୍ରୀ ବ୍ରହ୍ମପୁର ଏବଂ ଉଧନା (ସୁରଟ) ମଧ୍ୟରେ ଅମୃତ ଭାରତ ଏକ୍ସପ୍ରେସକୁ ମଧ୍ୟ ପତାକା ଦେଖାଇ ଶୁଭାରମ୍ଭ କରିଛନ୍ତି ।
ଏହି ଟ୍ରେନ ବିଭିନ୍ନ ରାଜ୍ୟ ମଧ୍ୟରେ ସୁଲଭ ଏବଂ ଆରାମଦାୟକ ଯୋଗାଯୋଗ ପ୍ରଦାନ କରିବ, ପର୍ଯ୍ୟଟନକୁ ସମର୍ଥନ କରିବ, ନିଯୁକ୍ତି ସୁଯୋଗ ସୃଷ୍ଟି କରିବ ଏବଂ ପ୍ରମୁଖ ଆର୍ଥିକ ଜିଲ୍ଲାଗୁଡ଼ିକୁ ସଂଯୋଗ କରିବ। ପ୍ରଧାନମନ୍ତ୍ରୀ ପ୍ରାୟ 11,000କୋଟି ଟଙ୍କା ନିବେଶରେ ଆଠଟି ଆଇଆଇଟି -ତିରୁପତି, ପଲକଡ଼, ଭିଲାଇ, ଜମ୍ମୁ, ଧାରୱାଡ, ଯୋଧପୁର, ପାଟନା ଏବଂ ଇନ୍ଦୋରର ସମ୍ପ୍ରସାରଣ ପାଇଁ ଭିତ୍ତିପ୍ରସ୍ତର ସ୍ଥାପନ କରିଛନ୍ତି । ଏହି ସମ୍ପ୍ରସାରଣ ଆଗାମୀ ଚାରି ବର୍ଷ ମଧ୍ୟରେ 10,000 ନୂତନ ଛାତ୍ରଛାତ୍ରୀଙ୍କ ପାଇଁ କ୍ଷମତା ସୃଷ୍ଟି କରିବ ଏବଂ ଆଠଟି ଅତ୍ୟାଧୁନିକ ଗବେଷଣା ପାର୍କ ପ୍ରତିଷ୍ଠା କରିବ, ଯାହା ଦ୍ୱାରା ଭାରତର ନବସୃଜନ ଇକୋସିଷ୍ଟମ ସୁଦୃଢ଼ ​​ହେବ ଏବଂ ଗବେଷଣା ଓ ବିକାଶକୁ ବଡ଼ ପ୍ରୋତ୍ସାହନ ମିଳିବ। ପ୍ରଧାନମନ୍ତ୍ରୀ ଦେଶବ୍ୟାପୀ 275ଟି ରାଜ୍ୟ ଇଞ୍ଜିନିୟରିଂ ଏବଂ ପଲିଟେକ୍ନିକ୍ ପ୍ରତିଷ୍ଠାନରେ ଗୁଣବତ୍ତା, ସମାନତା, ଗବେଷଣା ଏବଂ ନବସୃଜନକୁ ଉନ୍ନତ କରିବା ପାଇଁ ଡିଜାଇନ୍ କରାଯାଇଥିବା ମେରିଟ ଯୋଜନାର ଶୁଭାରମ୍ଭ କରିଛନ୍ତି । ପ୍ରଧାନମନ୍ତ୍ରୀ ଓଡ଼ିଶା ଦକ୍ଷତା ବିକାଶ ପ୍ରକଳ୍ପର ଦ୍ୱିତୀୟ ପର୍ଯ୍ୟାୟ ମଧ୍ୟ ଆରମ୍ଭ କରିଛନ୍ତି ଯାହା ମାଧ୍ୟମରେ ସମ୍ବଲପୁର ଏବଂ ବ୍ରହ୍ମପୁରରେ ବିଶ୍ୱ ଦକ୍ଷତା କେନ୍ଦ୍ର ପ୍ରତିଷ୍ଠା କରାଯିବ। ଏଥିରେ କୃଷିପ୍ରଯୁକ୍ତି, ଅକ୍ଷୟ ଶକ୍ତି, ସାମୁଦ୍ରିକ କ୍ଷେତ୍ର ଏବଂ ଆତିଥେୟ ଭଳି ପ୍ରଗତିଶୀଳ କ୍ଷେତ୍ରଗୁଡ଼ିକ ସାମିଲ ହେବ। ଏହା ବ୍ୟତୀତ, ପାଞ୍ଚଟି ଆଇଟିଆଇକୁ ଉତ୍କର୍ଷ ଆଇଟିଆଇରେ ଉନ୍ନୀତ କରାଯିବ, 25ଟି ଆଇଟିଆଇକୁ ଉତ୍କର୍ଷ କେନ୍ଦ୍ର ଭାବରେ ବିକଶିତ କରାଯିବ ଏବଂ ବୈଷୟିକ ତାଲିମ ପ୍ରଦାନ ଲାଗି ଏକ ନୂତନ ପ୍ରିସିସନ୍ ଇଞ୍ଜିନିୟରିଂ ଭବନ ପ୍ରତିଷ୍ଠା କରାଯିବ ।

ରାଜ୍ୟରେ ଡିଜିଟାଲ ଶିକ୍ଷାକୁ ଉନ୍ନତ କରିବା ପାଇଁ, ପ୍ରଧାନମନ୍ତ୍ରୀ 130ଟି ଉଚ୍ଚଶିକ୍ଷା ପ୍ରତିଷ୍ଠାନରେ ୱାଇ-ଫାଇ ସୁବିଧାର ଲୋକାର୍ପଣ କରିଛନ୍ତି, ଯାହା ମାଗଣା ଦୈନିକ ଡାଟା ପ୍ରଦାନ କରି ଅଢ଼େଇ ଲକ୍ଷରୁ ଅଧିକ ଛାତ୍ରଛାତ୍ରୀଙ୍କୁ ଉପକୃତ କରିବ। ପ୍ରଧାନମନ୍ତ୍ରୀଙ୍କ ଗସ୍ତ ସମୟରେ ଓଡ଼ିଶାରେ ସ୍ୱାସ୍ଥ୍ୟସେବା ଭିତ୍ତିଭୂମିକୁ ମଧ୍ୟ ଏକ ଗୁରୁତ୍ୱପୂର୍ଣ୍ଣ ପ୍ରୋତ୍ସାହନ ମିଳିଛି। ସେ ବ୍ରହ୍ମପୁରର ଏମକେସିଜି ମେଡିକାଲ କଲେଜ ଏବଂ ସମ୍ବଲପୁରର ଭିମସାରକୁ ବିଶ୍ୱସ୍ତରୀୟ ସୁପର-ସ୍ପେଶାଲିଟି ହସ୍ପିଟାଲ ରୂପେ ଉନ୍ନତିକରଣ କରିବା ପାଇଁ ଭିତ୍ତିପ୍ରସ୍ତର ସ୍ଥାପନ କରିଛନ୍ତି । ଉନ୍ନତ ସୁବିଧାଗୁଡ଼ିକରେ ବର୍ଦ୍ଧିତ ଶଯ୍ୟା କ୍ଷମତା, ଟ୍ରମା କେୟାର ୟୁନିଟ୍, ଡେଣ୍ଟାଲ୍ କଲେଜ, ମାତୃ ଏବଂ ଶିଶୁ ଯତ୍ନ ସେବା ଏବଂ ବିସ୍ତାରିତ ଶୈକ୍ଷିକ ଭିତ୍ତିଭୂମି ଅନ୍ତର୍ଭୁକ୍ତ ହେବ, ଯାହା ଓଡ଼ିଶାର ଲୋକଙ୍କ ପାଇଁ ବ୍ୟାପକ ସ୍ୱାସ୍ଥ୍ୟ ସେବା ସୁନିଶ୍ଚିତ କରିବ। ଏହା ସହିତ, ପ୍ରଧାନମନ୍ତ୍ରୀ ଶ୍ରୀ ମୋଦୀ ଅନ୍ତ୍ୟୋଦୟ ଗୃହ ଯୋଜନା ଅଧୀନରେ 50,000 ହିତାଧିକାରୀଙ୍କୁ ମଞ୍ଜୁରୀ ଆଦେଶ ବଣ୍ଟନ କରିଛନ୍ତି। ଏହି ଯୋଜନା ପକ୍କା ଘର ଯୋଗାଇ ଦେବା ସହିତ ଭିନ୍ନକ୍ଷମ ବ୍ୟକ୍ତି, ବିଧବା, ଦୂରାରୋଗ୍ୟ ବ୍ୟାଧିରେ ପୀଡିତ ବ୍ୟକ୍ତି ଏବଂ ପ୍ରାକୃତିକ ବିପର୍ଯ୍ୟୟର ଶିକାର ବ୍ୟକ୍ତିଙ୍କ ଭଳି ଦୁର୍ବଳ ଗ୍ରାମୀଣ ପରିବାରଗୁଡ଼ିକୁ ଆର୍ଥିକ ସହାୟତା ପ୍ରଦାନ କରିଥାଏ । ଏହି ପଦକ୍ଷେପ ସମାଜର ସବୁଠାରୁ ପଛୁଆ ବର୍ଗର ସାମାଜିକ କଲ୍ୟାଣ ଏବଂ ମର୍ଯ୍ୟାଦା ସୁନିଶ୍ଚିତ କରିବା ପାଇଁ ସରକାରଙ୍କ ପ୍ରତିବଦ୍ଧତାକୁ ପ୍ରତିଫଳିତ କରେ।