ଭୁବନେଶ୍ୱର:୭/୧୦-ଶୈଳଶ୍ରୀବିହାର ସାଇ ମନ୍ଦିର ଛକରୁ ହନୁମାନ ମନ୍ଦିର ଛକ ପର୍ଯ୍ୟନ୍ତ ମାତ୍ର ୪୦୦ ମିଟରର ପ୍ରମୁଖ ରାସ୍ତା ଅବସ୍ଥା ଏମିତି । ରାସ୍ତାର ଗୋଟିଏ ପାର୍ଶ୍ୱରେ ଚାରିମାସ ହେଲା ଅଧାପନ୍ତରିଆ ହୋଇ ପଡ଼ିରହିଛି ଡ୍ରେନ କାମ । ଲୋକେ ନାହିଁ ନଥିବା ଦୁର୍ଦଶା ଭୋଗୁଛନ୍ତି। ସେପ୍ଟେମ୍ବର ୨୦ ତାରିଖ ସୁଦ୍ଧା ରାସ୍ତାକାମ ସାରିବାକୁ ପୂର୍ତ୍ତମନ୍ତ୍ରୀ ନିର୍ଦେଶ ଦେଇଥିଲେ । ଅଧା କାମ କରି ଇଞ୍ଜିନିୟର ଛୁ । ଠିକାଦାର କି ଇଞ୍ଜିନିୟର କାହାର ଦେଖା ନାହିଁ ।
ରାସ୍ତା କଡ଼ରେ ଖୋଳା ହେଇ ପଡ଼ିଥିବା ଡ୍ରେନ ମଣିଷ ଏବଂ ଗାଈଗୋରୁଙ୍କ ପାଇଁ ବିପଦପୂର୍ଣ୍ଣ ହୋଇପଡ଼ିଛି । କେତେକ ସ୍ଥାନରେ ଡ୍ରେନ ପାଇଁ ରାସ୍ତାର ଯେଉଁ ପାଶ୍ୱର୍ରେ କାମ କରାଯାଉଛି ତାହା ତ୍ରୁଟିପୂର୍ଣ୍ଣ ଥିବା ଦେଖାଯାଇଛି । ବିଭାଗୀୟ ଯନ୍ତ୍ରୀମାନଙ୍କ ଦୂରଦୃଷ୍ଟିର ଅଭାବରୁ ଡ୍ରେନ କାମରେ ସମସ୍ୟା ସୃଷ୍ଟି ହେବା ଆଶଙ୍କା କରାଗଲାଣି ।
ଖାଲୁଆ ଜାଗାରୁ ଉଚ୍ଚସ୍ଥାନ ଦେଇ ଡ୍ରେନ ନିଆଯିବ । ଯାହାର ସ୍ଥାୟିତ୍ୱକୁ ନେଇ ସନ୍ଦେହ ସୃଷ୍ଟି ହେଲାଣି । ସରକାରୀ ଅର୍ଥ ଅପବ୍ୟବହାରର ଏହା ନମୁନା ବୋଲି କହିଲେ ଅତ୍ୟୁକ୍ତି ହେବନାହିଁ । କେତେକ ସ୍ଥାନରେ ରାସ୍ତା ୧୫ ଫୁଟ ଉଚ୍ଚରେ ଥିବାରୁ ଡ୍ରେନ କାମ ଆରମ୍ଭ ହୋଇଥିବା ରାସ୍ତାର ଅପରପାଶ୍ୱର୍ରେ ବିନା ଡ୍ରେନରେ ଜଳ ନିଷ୍କାସିତ ହେଉଛି। ଅନ୍ୟପକ୍ଷରେ ଜଳ ନିଷ୍କାସନ ନେଇ ସମସ୍ୟା ଥିବା ରାସ୍ତା ପାଶ୍ୱର୍ରେ ଡ୍ରେନ ପାଇଁ ହେଉଛି କାମ ।
ମହାନଗର ନିଗମ ଏନଫୋର୍ସମେଣ୍ଟ ଦାୟିତ୍ୱରେ ଥିବା କର୍ମଚାରୀଙ୍କ ସହଯୋଗରେ ଡ୍ରେନ ଉପରେ ବେଧଡ଼କ ଚାଲିଛି ଦୋକାନ। ଦୁର୍ଗନ୍ଧଯୁକ୍ତ ଅପରିଷ୍କାର ଜଳ ବର୍ଷସାରା ପ୍ରମୁଖ ରାସ୍ତା ଉପରେ ପ୍ରବାହିତ ହେଉଛି । ଛକ ଜାଗାରେ ରାସ୍ତା ଅବରୋଧ ହେବା ଫଳରେ ଯାନବାହନ ଚଳାଚଳ ବାଧାପ୍ରାପ୍ତ ହେବା ସହ ଟ୍ରାଫିକ ସମସ୍ୟା ଗୁରୁତର ହେଲାଣି ।ପୂର୍ତ୍ତ ବିଭାଗ ସମେତ ବିଏମସି, ବିଡିଏ ଓ ପୁଲିସ ସବୁ ଦେଖି ନୀରବ।
କର୍ପୋରେଟର ସରକାରୀ ଦଳର । ସବୁ ଜାଣୁଛନ୍ତି । ରାସ୍ତା ଓ ଡ୍ରେନ ଜବରଦଖଲ ଉଛେଦ ନେଇ କାହିଁକି ପଦକ୍ଷେପ ନେଉ ନାହାନ୍ତି ତାହା ତାଙ୍କୁ ଜଣା। ବ୍ୟବସାୟ ପ୍ରତିଷ୍ଠାନର ଅଳିଆ ରାସ୍ତା କଡରେ ପୋଡା ଯାଉଛି । ନିକଟରେ ସେହି ବାଟ ଦେଇ ଯାଉଥିବା ବିଏମସିର ଜଣେ ଅଧିକାରୀ ଏହା ଦେଖିଥିଲେ ଏନ୍ଫୋର୍ସମେଣ୍ଟ ସ୍କ୍ୱାଡ଼ ପଠାଇ ତାଗିଦ କଲେ ହେଲେ ଫଳ କିଛି ହେଲାନି । ଅବସ୍ଥା ଅପରିବର୍ତ୍ତିତ। ଅଥଚ ବ୍ୟବସାୟୀଙ୍କ ଭାଇ , କେହି ଅଭିଯୋଗ କରିଥିବା ସନ୍ଦେହ କରି ହାଣିଦେବି ମାରିଦେବି କହି ନାଲିଆଖି ଦେଖେଇ ବୁଲୁଛନ୍ତି ।
ପାର୍ଶ୍ୱରେ ନୂଆ ରାସ୍ତା ।ରାସ୍ତା କଡ଼ ଡ୍ରେନକୁ ଲାଗି ଥିବା ସରକାରୀ ଜାଗା ବି ଲୋକେ ଦାଖଲକୁ ନେଲେଣି । ସ୍ଥାୟୀ ନିର୍ମାଣ କାର୍ଯ୍ୟ ଚାଲିଛି । ଏହାବ୍ୟତୀତ ଶସ୍ତାରେ ସାଧାରଣ ପ୍ରଶାସନ, ବିଡିଏ ଏବଂ ହାଉସିଂ ବୋର୍ଡ଼ ରୁ ଜାଗା ଓ ଘର ନେଇଥିବା ସର୍ବାଧିକ ବ୍ୟକ୍ତି ନିର୍ମାଣ କାର୍ଯ୍ୟ ବେଳେ ଡ୍ରେନ ଓ ରାସ୍ତା ଉପରେ ନିର୍ମାଣ କାର୍ଯ୍ୟ ଚଳାଇଛନ୍ତି।
ବଢିଚାଲିଛି ଜବରଦଖଲ। ଗୃହ ନିର୍ମାଣ ଯୋଜନାକୁ ଉଲ୍ଲଙ୍ଘନ କରାଯାଉଛି। ସମ୍ପୃକ୍ତ ବିଭାଗ ଓ ସଂସ୍ଥା ଚୁପ ହୋଇ ବସିଛନ୍ତି । ରାଜନେତା ଓ କର୍ମଚାରୀ ଉଠାଉଛନ୍ତି ଫାଇଦା।
