ବିଜେପି ସରକାରରେ ଦଣ୍ଡିଆ କାରବାର

ଭୁବନେଶ୍ୱର:୬/୧୧- ବିଜୁ ଜନତା ଦଳ ସରକାରରେ ବିଭିନ୍ନ ସରକାରୀ କାର୍ଯ୍ୟ ସମେତ ଅନ୍ୟାନ୍ୟ କାର୍ଯ୍ୟ ଯେପରି ଦଣ୍ଡିଆମାନଙ୍କ ଦ୍ୱାରା ହେଉଥିଲା ଏବେ ବିଜେପି ସରକାରରେ ସେହି ବ୍ୟବସ୍ଥା ପୁନର୍ବାର ଆରମ୍ଭ ହୋଇଥିବା ଦେଖାଯାଇଛି। ବେପାରୀଙ୍କ ଦ୍ୱାରା ସବୁ କାର୍ଯ୍ୟ ସମ୍ପାଦନ ହେଉଛି। ଏଥିରେ ବେପାରୀ ଓ ସରକାରୀ ପଦାଧିକାରୀମାନେ ବେଶ ଫାଇଦା ଉଠାଉଛନ୍ତି। ଦଣ୍ଡିଆଙ୍କୁ ନିର୍ବାଚତ ଲୋକପ୍ରତିନିଧି ପାଳି ପୋଷି ନିୟନ୍ତ୍ରଣରେ ରଖିଛନ୍ତି।

ଯେମିତି ବିଜେଡି ଶାସନ ସମୟରେ ସମସ୍ତ ସରକାରୀ ଠିକା କାମ ପଞ୍ଚାୟତ, ଜିଲା ପରିଷଦ, ବିଜ୍ଞାପିତ ଅଞ୍ଚଳ ପରିଷଦ, ପୌର ମହାନଗର ନିଗମର ନିର୍ବାଚିତ ଲୋକ ପ୍ରତିନିଧିଙ୍କ ମାଧ୍ୟମରେ ବେପାରୀ ବା ଦଣ୍ଡିଆଙ୍କୁ ବଣ୍ଟା ଯାଉଥିଲା ଏବେ ସେୟା ଚାଲିଛି। ଅନେକ ସ୍ଥାନରେ ବିଜେଡିର ପୂର୍ବତନ ଲୋକ ପ୍ରତିନିଧିମାନେ ବିଜେପିର ସୁନାପୁଅ ପାଲଟିଛନ୍ତି।
ସେହିପରି ସରକାରଙ୍କ ବିଭିନ୍ନ ବିଭାଗର କାର୍ଯ୍ୟ ମଧ୍ୟ ଦଣ୍ଡିଆମାନଙ୍କ ଦ୍ୱାରା କରାଯାଉଛି।

ବିଶେଷ କରି ରାସ୍ତାଘାଟ, କୋଠାବାଡ଼ି ନିର୍ମାଣ ଓ ମରାମତି ସମେତ ସବୁ ନିର୍ମାଣ କାର୍ଯ୍ୟର ଦାୟିତ୍ୱ ଦଣ୍ଡିଆଙ୍କ ହାତରେ ରହିଛି। ସରକାରୀ କାର୍ଯ୍ୟାଳୟରେ କାଯ୍ୟରତ ହଜାର ହଜାର କର୍ମଚାରୀଙ୍କୁ ବସେଇ ରଖି ଦଣ୍ଡିଆଙ୍କ ଦ୍ୱାରା କାର୍ଯ୍ୟ ସମ୍ପାଦନ କରାଯାଉଛି।
ଦଣ୍ଡିଆଙ୍କ ପାଇଁ ସରକାରୀ କର୍ମଚାରୀମାନେ ଅନେକ ସମୟରେ ଅପଦସ୍ତ ହେଉଛନ୍ତି। ସେମାନଙ୍କୁ ଏକରକମ ସ୍ଥାଣୁ କରିଦେଇଛନ୍ତି ସରକାର। ପାଟି ଫିଟେଇ ପାରୁନାହାନ୍ତି। ନିଜର ଅସହାୟତା ପ୍ରକାଶ କରୁଛନ୍ତି।

ବିଜେପି ସରକାରରେ ଦଣ୍ଡିଆ କାରବାରର ଏକ ଦୃଷ୍ଟାନ୍ତ ଦେବା ଉଚିତ ମନେ କରୁଛୁ। ସୂଚନାଯୋଗ୍ୟ ଯେ, ନଭେମ୍ବର ୭ରୁ ୧୦ ତାରିଖ ପର୍ଯ୍ୟନ୍ତ ଭୁବନେଶ୍ୱରରେ ହେବାକୁ ଥିବା ଇଣ୍ଡିଆନ ରୋଡ୍ସ କଂଗ୍ରେସର ୮୪ ତମ ବାର୍ଷିକ ସମାବେଶ ପାଇଁ ସଦସ୍ୟ ପଞ୍ଜିକରଣ, ବୈଷୟିକ ପ୍ରଦର୍ଶନୀର ଉଦଘାଟନ ଓ ସାମ୍ବାଦିକ ସମ୍ମିଳନୀର ବ୍ୟବସ୍ଥା କରାଯାଇଥିଲା।
ରାଜ୍ୟ ସରକାରଙ୍କ ସୂଚନା ଓ ଲୋକସମ୍ପର୍କ ବିଭାଗକୁ ଏଥିରେ ସାମିଲ ନକରି ସାମ୍ବାଦିକମାନଙ୍କୁ ଏକ ସଂସ୍ଥା ମାଧ୍ୟମରେ ଡକାଗଲା। ସୂଚନା ଓ ଲୋକସମ୍ପର୍କ ବିଭାଗରୁ ସାମ୍ବାଦିକଙ୍କ ତାଲିକା ନେଇ ଅନେକ ରାଜ୍ୟସ୍ତରୀୟ ସ୍ୱୀକୃତି ପ୍ରାପ୍ତ ସାମ୍ବାଦିକଙ୍କୁ ବାଦ ଦିଆଗଲା। ସୂଚନା ଓ ଲୋକସମ୍ପର୍କ ବିଭାଗରୁ ବେସରକରୀ ଭାବେ ତଥ୍ୟ ପାଇ ଅଧିସ୍ୱୀକୃତିପ୍ରାପ୍ତ ସାମ୍ବାଦିକମାନେ ସେଠାରେ ପହଞ୍ôଚଥିଲେ। ତେବେ ଅନେକଙ୍କ ନାମ ନଥିବାରୁ ସେମାନଙ୍କୁ ପ୍ରବେଶ ଅନୁମତି ନଥିଲା। ବିଭାଗର ଅଧିକାରୀମାନେ ନିଜ ଅସହାୟତା ପ୍ରକାଶ କରିଥିଲେ।

ପୂର୍ତ୍ତ ବିଭାଗ ଏହି ଦାୟିତ୍ୱ ସଂପୃକ୍ତ ସଂସ୍ଥାକୁ ଦେଇଥିବା କୁହାଯାଇଥିଲା। ସାମ୍ବାଦିକ ସମ୍ମିଳନୀକୁ ପୂର୍ତ୍ତ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ଯେଉଁ ସମୟରେ ଆସିବା କଥା ତାଠାରୁ ଯଥେଷ୍ଟ ବିଳମ୍ବରେ ପହଞ୍ôଚ ଯଥାକଥା ସାମ୍ବାଦିକ ସମ୍ମିଳନୀରେ ଦି ପଦ କହି ଚାଲି ଯାଇଥିଲେ। ସାମ୍ବାଦିକମାନଙ୍କ ସମସ୍ୟା କେହି ବୁଝିନ ଥିଲେ। ବହୁ ବରିଷ୍ଠ ସାମ୍ବାଦିକ ଏଭଳି ଦଣ୍ଡିଆ କାରବାରରେ କ୍ଷୋଭ ପ୍ରକାଶ କରିଥିଲେ।
ସଂପୃକ୍ତ ବେପାରୀ ସଂସ୍ଥାକୁ ସରକାରୀ ତାଲିକାରୁ ନାମ ବାଦ ଦେବା ଅଧିକାର କିଏ ଦେଲା ତାର ତଦନ୍ତ ଆବଶ୍ୟକ ପଡୁଛି। ଏକ ଜାତୀୟସ୍ତରୀୟ କାର୍ଯ୍ୟକ୍ରମରେ ଏଭଳି ଘଟଣା ବିଜେପି ସରକାର ଠାରୁ ସାମ୍ବାଦିକମାନେ ଆଦୌ ଆଶା କରି ନଥିଲେ। ସୂଚନା ଓ ଲୋକସମ୍ପର୍କ ବିଭାଗକୁ ସାମ୍ବାଦିକମାନଙ୍କ ପଞ୍ଜିକରଣ ଦାୟିତ୍ୱରୁ ବାଦ ଦେବା ପଛରେ ରହସ୍ୟ କ’ଣ ତାହା ଉନ୍ମୋଚିତ ହେବା ଆବଶ୍ୟକ। ମୁଖ୍ୟମନ୍ତ୍ରୀ ଏହାର ଉପଯୁକ୍ତ ତଦନ୍ତ ନିର୍ଦେଶ ଦେବା ସହ କାହା ଇଙ୍ଗିତରେ ଏଭଳି କରାଯାଇଛି ଓ କିଏ କରିଛି ତାହା ସର୍ବସମ୍ମୁଖରେ ପ୍ରକାଶ କରିବାକୁ ସାମ୍ବାଦିକ ମହଲରେ ମତ ପ୍ରକାଶ ପାଇଛି।