ଲୋକଙ୍କ ସରକାର ଲୋକଙ୍କୁ ଜଣାଅ 

୧୫ ବର୍ଷରେ କେତେ ରାଜସ୍ୱ ପାଇଛି ଶ୍ରୀମନ୍ଦିର?

ଭୁବନେଶ୍ୱର: ୯/୩-(ପ୍ରସାଦ କୁମାର ପ୍ରଧାନ)ଶ୍ରୀଜଗନ୍ନାଥଙ୍କ ଜମିର ସୁରକ୍ଷା ଓ ପୁନରୁଦ୍ଧାର ନିମନ୍ତେ ୧୫ ବର୍ଷ ହେଲା ଶ୍ରୀମନ୍ଦିର ମୁଖ୍ୟ ପ୍ରଶାସକ ରାଜ୍ୟ ସରକାରଙ୍କ ଦ୍ୱାରା ଶ୍ରୀଜଗନ୍ନାଥଙ୍କ ଜମି କିଣାବିକାକୁ ଅସିଦ୍ଧ କରି ରଖିଛନ୍ତି। ଏଥିରେ ସରକାରଙ୍କର କୋଟି କୋଟି ଟଙ୍କାର ରାଜସ୍ୱ କ୍ଷତି ହେବା ସହିତ ଲକ୍ଷ ଲକ୍ଷ ଲୋକ ହନ୍ତସନ୍ତ ହେଉଛନ୍ତି। ଅନେକ ସ୍ଥାନରେ ସବ ରେଜିଷ୍ଟ୍ରାର ଜମି ପଞ୍ଜୀକରଣ କରୁନାହାନ୍ତି। ସ୍ଥିତିବାନ ପଟ୍ଟା ଥିବା ଜମି ବି କିଣାବିକା ହେଉନାହିଁ କି ବନ୍ଧକ ସୂତ୍ରରେ ବ୍ୟାଙ୍କରେ ରଖାଯାଇ ପାରୁନି। ଏହାର କିସମ ମଧ୍ୟ ପରିବର୍ତ୍ତନ କରାଯାଇ ପାରୁନି। ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ସ୍ୱାକ୍ଷରରେ ୨୦୧୨ରେ ପ୍ରକାଶିତ ବିଜ୍ଞପ୍ତି କିଣାବିକା ଉପରେ ଲଗାମ ଲଗାଇଥିବା ରାଜସ୍ୱ ଅଧିକାରୀମାନେ ପ୍ରକାଶ କରୁଛନ୍ତି। ସରକାରଙ୍କ କେଉଁ ନିର୍ଦେଶନାମା ବଳରେ ଜମି କିଣାବିକା ବନ୍ଦ ରହିଛି ସେ ନେଇ ସୂଚନା ଅଧିକାର ଆଇନରେ ରାଜସ୍ୱ ବିଭାଗକୁ ମଗାଯାଇଥିବା ତଥ୍ୟ ଉପରେ ତତ୍‍କାଳୀନ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ୨୦୧୨ର ବିଜ୍ଞପ୍ତି ମିଳିଥିବା ବେଳେ ଏହା ଉପରେ ଲୋକଙ୍କ ସମସ୍ୟା ସମାଧାନ ନେଇ ସରକାର କିମ୍ବା ଶ୍ରୀମନ୍ଦିର ପ୍ରଶାସନ କୌଣସି ପଦକ୍ଷେପ ନନେଇ କେବଳ ପ୍ରେସ ବିବୃତ୍ତିରେ ପଦକ୍ଷେପ ନିଆଯାଉଥିବା କହୁଛନ୍ତି। ମୌଖିକ ଭାବେ ଉଚ୍ଚସ୍ତରୀୟ କମିଟି ଗଠନ କରାଯିବା କଥା ରାଜସ୍ୱ ସଚିବ ଓ ମନ୍ତ୍ରୀମାନେ ବର୍ଷବର୍ଷ ଧରି କହି ଚାଲିଛନ୍ତି।

ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ରାଜସ୍ୱ ବିଭାଗ ନିୟମିତ ଭାବେ ଏହି ଜମି ଉପରୁ ଭୂ ରାଜସ୍ୱ ଆଦାୟ କରୁଛି।ସରକାରଙ୍କର ରୋଜଗାର ଅଛି ବୋଲି ଏଥିପ୍ରତି ଖାତିର ନାହିଁ। ଲୋକେ ନିଜ ଦୁଃଖ କହିବେ କାହାକୁ, ଶୁଣୁଚି ଅବା କିଏ! ଏହି ଜମି କେଳାଙ୍କାରୀର ସମାଧାନ ପ୍ରାୟ ଦୁଇମାସ ପରେ କାର୍ଯ୍ୟକାରୀ କରାଯିବା ଆରମ୍ଭ ହେବ ବୋଲି ସରକାରଙ୍କର ଜଣେ ବରିଷ୍ଠ ମନ୍ତ୍ରୀ ସାମ୍ବାଦିକମାନଙ୍କ ଆଗରେ କହିଥିଲେ। ସମୟ ବିତିଗଲାଣି। ସଂପୃକ୍ତ ନିର୍ବାଚନମଣ୍ଡଳୀର ବିଧାୟକ ଓ ସାଂସଦ ଜମି ସମସ୍ୟାର ସମାଧାନ ନେଇ ଲଢ଼େଇ କରିବେ ବୋଲି ସଭା ସମିତିରେ ପ୍ରତିଶ୍ରୁତି ଦେଇଥିଲେ। ଏବେ ପଛଘୁଞ୍ଚା ଦେଉଛନ୍ତି। ପ୍ରଭାବିତ ଅଞ୍ଚଳର ଜନସାଧାରଣଙ୍କ ଅନୁରୋଧ ସତ୍ତ୍ୱେ ପୂର୍ବ ସରକାର ସମୟରେ ଜମି କିଣାବିକା ସମସ୍ୟା ଉପରେ ବିଧାନସଭାରେ ଆଲୋଚନା ବେଳେ ନିର୍ବାଚିତ ବିଧାୟକମାନେ ପାଟି ଖୋଲି ନଥିଲେ।

ଅରବିନ୍ଦ ପାଢ଼ୀ ସେତେବେଳେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଥିଲେ। ତାଙ୍କ ସ୍ୱାକ୍ଷରରେ ବିଜ୍ଞପ୍ତି ପ୍ରକାଶ ପାଇଥିଲା। ଏବେ ସେ ରାଜସ୍ୱ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ଏବଂ ଶ୍ରୀମନ୍ଦିରର ମୁଖ୍ୟ ପ୍ରଶାସକ ଅଛନ୍ତି। ଶ୍ରୀଜଗନ୍ନାଥଙ୍କ ସମ୍ପତ୍ତିିର ସୁରକ୍ଷା ଓ ପୁନରୁଦ୍ଧାର କରିବା ସହିତ ଲୋକଙ୍କ ଦୁଃଖ ଦୂର କରିବା ଲାଗି ଚେଷ୍ଟା ଚଳାଇଥିବା କହୁଛନ୍ତି। ଏହାର ସମାଧାନର ସୂତ୍ର ବାହାର କରିବାକୁ ୧୫ବର୍ଷ ହେଲା ଗବେଷଣା ଚାଲିଛି। ଗବେଷଣା ସରିଲେ ଲୋକଙ୍କ କଥା ବିଚାରକୁ ଆସିବ!

ଏଠାରେ ପ୍ରଶ୍ନ ଉଠୁଚି ଜମି କିଣାବିକା ସିନା ବନ୍ଦ ରହିଛି କିନ୍ତୁ ୧୫ ବର୍ଷ ଧରି ଜଗନ୍ନାଥଙ୍କ ଜମିରୁ ସରକାର ଖଜଣା ଆଦାୟ କରୁଛନ୍ତି। ଏହି ବାବଦରେ ଯେଉଁ ରାଜସ୍ୱ ଆଦାୟ କରାଯାଇଛି ସେ ଅର୍ଥ ଶ୍ରୀମନ୍ଦିରକୁ ପ୍ରଦାନ କରାଯିବା ଆବଶ୍ୟକ। ଯେହେତୁ ଶ୍ରୀମନ୍ଦିରର ମୁଖ୍ୟ ପ୍ରଶାସକ ରାଜ୍ୟ ସରକାରଙ୍କର ରାଜସ୍ୱ ବିଭାଗର ଦାୟିତ୍ୱରେ ରହିଛନ୍ତି ତେଣୁ କେତେ ରାଜସ୍ୱ ଆଦାୟ ହୋଇଛି ନିଶ୍ଚୟ ଅବଗତ ଥିବେ। ସେହି ଅର୍ଥକୁ ଶ୍ରୀମନ୍ଦିର ଉଦ୍ଦେଶ୍ୟରେ ମୁଖ୍ୟ ପ୍ରଶାସକଙ୍କୁ ପ୍ରଦାନ କରାଯାଇଛି କି ନାହିଁ ଅବଗତ କରାଇବା ଉଚିତ୍ ମନେହୁଏ। ଯେହେତୁ ଏହି ଅର୍ଥ ପ୍ରଭୁଙ୍କର ପ୍ରାପ୍ୟ ତେଣୁ ଯଦି ପ୍ରଦାନ କରାଯାଇ ନଥାଏ ତେବେ ତାହା ତୁରନ୍ତ ପ୍ରଦାନ କରାଯିବାର ବ୍ୟବସ୍ଥା କରାଯିବା ଉଚିତ୍‌। ଏହାବ୍ୟତୀତ ଶ୍ରୀ ଜଗନ୍ନାଥଙ୍କ ମାଲିକାନାରେ ଥିବା ଯେଉଁ ଜମିର ପଟ୍ଟା ସଂଶୋଧନ କରାଯାଇ ନୂଆ ପଟ୍ଟାରେ ରାଜ୍ୟ ସରକାର ମାଲିକ ଓ ଶ୍ରୀଜଗନ୍ନାଥଙ୍କୁ ପ୍ରଜା ଭାବେ ଉଲ୍ଳେଖ କରିଛନ୍ତି ତାକୁ ନିଲାମ କରି ଦେଇଛନ୍ତି। ସେଥିରୁ ସରକାର ଖଣି ନିଗମରୁ କେତେ ଅର୍ଥ ପାଉଛନ୍ତି ଓ ଶ୍ରୀମନ୍ଦିରକୁ କେତେ ଦେଉଛନ୍ତି ତାହା ମଧ୍ୟ ଜନସାଧାରଣଙ୍କର ଜାଣିବା ଅଧିକାର ରହିଛି। ରାଜସ୍ୱ ବିଭାଗ ସଚିବ, ମନ୍ତ୍ରୀ ଏସମ୍ପର୍କରେ ଜନସାଧାରଣଙ୍କୁ ଅବଗତ କରିବା ଆବଶ୍ୟକ।