ଚାଲିଛି ମେଣ୍ଢା ଲଢେଇ, ତାଳିମାରୁଛନ୍ତି ଜନତା

-ବିଜଡିରୁ ଭାସ୍କର ରାଓ, ଲାଲବିହାରୀ ଓ ଗଙ୍ଗାଧରଙ୍କ ଇସ୍ତଫା

ଭୁବନେଶ୍ୱର:୧୧/୯- ଦୀର୍ଘ ୨୪ ବର୍ଷ ଧରି ରାଜ୍ୟ ଶାସନ କ୍ଷମତାରେ ଥିବା ବିଜୁ ଜନତା ଦଳ ୨୦୨୪ ନିର୍ବାଚନରେ କ୍ଷମତାଚ୍ୟୁତ ହୋଇଥିଲା। ଯେଉଁ ପ୍ରମୁଖ କାରଣ ପାଇଁ ଦଳକୁ ବିପର୍ଯ୍ୟୟର ସାମ୍ନା କରିବାକୁ ପଡିଲା ତାହା ସମସ୍ତେ ଜାଣନ୍ତି। ତେବେ ଏହାକୁ ସାମ୍ନାସାମ୍ନି ବିରୋଧ କରିବାକୁ ଦଳରେ କାହାର ସାହସ ନାହିଁ। ଯୁଦ୍ଧ କ୍ଷେତ୍ରକୁ ନ ଆସି ପଛୁଆ ଆକ୍ରମଣ ପାଇଁ ସଜବାଜ ହେଉଛନ୍ତି ଦଳର କିଛି ନେତା। କେତେକ ସାମାଜିକ ଗଣ ମାଧ୍ୟମରେ ବୁଲେଇ ବଙ୍କେଇ ସମାଲୋଚନା କରିବା ଆରମ୍ଭ କଲେଣି। ନିଜର ସ୍ୱାର୍ଥ ବାଧାପ୍ରାପ୍ତ ହେବା ଏହାର ମୂଳ କାରଣ କହିଲେ ଅତ୍ୟୁକ୍ତି ହେବ ନାହିଁ।

ରାଜନୀତିରେ ଦଳ ବଦଳ ଇଛାଧିନ ବିଷୟ। ଦଳୀୟ ନେତୃତ୍ୱ ଦଳ ପରିଚାଳନାରେ ବିଫଳ ହେବା ଏବଂ ଦଳ ଭଲଲାଗୁ ନ ଥିବା ଅନୁଭବ କରୁଥିବା ନେତାମାନେ ସିଧାସଳଖ ଦଳ ତ୍ୟାଗ କରିବା ଭଳି ପଦକ୍ଷପ ନେବା ଆବଶ୍ୟକ। ଯେଉଁଭଳି ସାହସ ସଂଖ୍ୟାଧିକ ବିଜେଡି ନେତାଙ୍କ ଭିତରେ ନ ଥିବା ଲକ୍ଷ କରାଯାଇଛି। କେଉଁ କାରଣରୁ ଏବଂ ଏଭଳି କ’ଣ ରହସ୍ୟ ରହିଛି ଯେଉଁଥିପାଇଁ ସାମ୍ନା ଯୁଦ୍ଧକୁ ସେମାନେ ଭୟ କରୁଛନ୍ତି ତାହା ବି ରହସ୍ୟ ଘେରରେ। ଦଳରୁ ଅଧିକ ଫାଇଦା ନେଇଥିବା ଏହି ନେତାମାନେ କେରାଣ୍ଡି ମାଛ ପରି ଫଡଫଡ଼ ହେଲେଣି। ସରକାରରେ ଥିବାବେଳେ ସେମାନେ କଣ କରିଛନ୍ତି ତାହା ଲୋକେ ଜାଣନ୍ତି। କାହା ନାଁ ନ ନେଇ ବଙ୍କା ତେଢା କଥା କହି ଦେଖେଇ ଶିଖେଇ ସମାଲୋଚନା କରୁଥିବା ଦଳର କିଛି ନେତାଙ୍କ ବଦଳିଥିବା ଆଚରଣ ଉଚାରଣରୁ ବିଜେଡିରେ ଯୁଦ୍ଧ ବଦଳରେ ମେଣ୍ଢା ଲଢେଇ ଆରମ୍ଭ ହେଇଥିବା ରାଜ୍ୟବାସୀ କହିବା ଆରମ୍ଭ କଲେଣି। ଯେଉଁ ରାଜନେତାମାନଙ୍କର ନାଁ ନେଇ କହିବାର ସାହସ ନାହିଁ ଏବଂ ଯେଉଁମାନେ ସାମ୍ନା ଯୁଦ୍ଧକୁ ଡରନ୍ତି ସେମାନଙ୍କ ନାଁ ଖବରରେ ଉଲ୍ଲେଖ କରିବା ମଧ୍ୟ ଉଚିତ ନୁହେଁ।
ଅନେକଦିନ କଣଠେସା ହେଇ ରହିଥିବା ପୂର୍ବତନ ସାଂସଦ ଏନ୍‌. ଭାସ୍କର ରାଓ ଦଳୀୟ ପ୍ରାର୍ଥୀ ଭାବେ ରାଜ୍ୟସଭାକୁ ଯାଇଥିଲେ। ଏ ଭିତରେ ସେ ତାଙ୍କ ଇସ୍ତଫାପତ୍ର ଦଳର ସଭାପତିଙ୍କ ନିକଟକୁ ପଠାଇଛନ୍ତି। ତାଙ୍କ ସହିତ ରାୟଗଡ଼ାରୁ ପୂର୍ବତନ ମନ୍ତ୍ରୀ ଲାଲବିହାରୀ ହିମିରିକା ଓ ପୂର୍ବତନ ଜିଲ୍ଲା ପରିଷଦ ଅଧ୍ୟକ୍ଷ ଗଙ୍ଗାଧର ପୁଆଲା ମଧ୍ୟ ଇସ୍ତଫା ପତ୍ର ପଠାଇଛନ୍ତି। ଦଳରୁ ଇସ୍ତଫା ଦେଇଥିବା ଏନ୍‌. ଭାସ୍କର ରାଓ ସଭାପତିଙ୍କୁ ଜଣାଇଛନ୍ତି ଯେ କୌଣସି କାରଣ ପାଇଁ କାହାରି ବିରୋଧରେ ତାଙ୍କର କୌଣସି ପ୍ରକାର ଅଭିଯୋଗ ନାହିଁ। ବିଜେଡି ଛାଡ଼ିଥିବା ଭାସ୍କର ରାଓ ବିଜୁ ସ୍ୱାଭିମାନ ମଞ୍ଚର ଗଠନ କରିବା ନେଇ ସୂଚନା ଦେଇଛନ୍ତି। ଏହାର ସେ ଆବାହାକ ଅଛନ୍ତି। ଦଳ ଛାଡ଼ିଥିବା ଏହି ନେତାମାନେ ମଧ୍ୟ ଦଳ ଛାଡ଼ିବାର କାରଣ ସ୍ପଷ୍ଟ କରିବାକୁ ସାହାସ କରିନାହାନ୍ତି। ଏହାର କାରଣ କ’ଣ ତାହା କେବଳ ସେମାନେ ଓ ଦଳୀୟ ନେତୃତ୍ୱ ତଥା ଦଳ ପରିଚାଳନା କରୁଥିବା ମାମଲତକାର ମାନେ ଜାଣନ୍ତି ବୋଲି ଆଲୋଚନା ହେଉଛି। ବିଜେଡିରେ ଏଭଳି ଲଢ଼େଇ ଦେଖି ମଝିରେ ମଝିରେ ଲୋକେ ତାଳିମାରିବା ଆରମ୍ଭ କରିଛନ୍ତି।