-ଓଡ଼ିଶାରୁ ଅଧିକରୁ ଅଧିକ ପଞ୍ଜୀକରଣ ପାଇଁ ଆହ୍ୱାନ
-ଯୋଗ୍ୟ ଯୁବକ ଯୁବତୀଙ୍କୁ ନିଯୁକ୍ତି ସୁଯୋଗ ପ୍ରଦାନ କରିବ
-ଯେତେ ପଞ୍ଜୀକରଣ ସଂଖ୍ୟା ବୃଦ୍ଧି ପାଇବ, ସେହି ଅନୁସାରେ ଅଧିକ ପଦବୀ ସୃଷ୍ଟି ହେବ
-ଜିଲାସ୍ତରରେ ବ୍ୟାପକ ସୂଚନା ଓ ପଞ୍ଜୀକରଣ ପାଇଁ ଜିଲାପାଳମାନଙ୍କୁ ନିର୍ଦ୍ଦେଶ
ଭୁବନେଶ୍ୱର: ୫/୩- ଭାରତୀୟ ସେନା(ଇଣ୍ଡିଆନ ଆର୍ମି)’ରେ ଅଗ୍ନିବୀର’ ନିଯୁକ୍ତି-୨୦୨୬ ସଂପର୍କରେ ମୁଖ୍ୟ ଶାସନ ସଚିବ ଅନୁ ଗର୍ଗଙ୍କ ଅଧ୍ୟକ୍ଷତାରେ ଆୟୋଜିତ ଏକ ବୈଠକ ଅନୁଷ୍ଠିତ ହୋଇଯାଇଛି । ରାଜ୍ୟର ଯୁବକ ଯୁବତୀମାନଙ୍କୁ ଭାରତୀୟ ସେନା (ଇଣ୍ଡିଆନ୍ ଆର୍ମି)ରେ ଅଧିକରୁ ଅଧିକ ଯୋଗଦାନ କରିବା ସୁଯୋଗ ନେଇ ‘ଅଗ୍ନିବୀର’ ନିଯୁକ୍ତି ସମ୍ପର୍କିତ ସୂଚନାକୁ ବ୍ୟାପକ ଭାବେ ପ୍ରଚାର କରିବା ଏବଂ ଯୁବକ ଯୁବତୀମାନେ କିପରି ସୁବିଧାରେ ପଂଜୀକରଣ କରିପାରିବେ ସେ ସଂପର୍କରେ ବୈଠକରେ ବିସ୍ତୃତ ଆଲୋଚନା କରାଯାଇଥିଲା ।
ବୈଠକରେ ଭାରତୀୟ ସେନାରେ ଯୋଗଦାନ ପାଇଁ ସାଧାରଣ ପ୍ରବେଶିକା ପରୀକ୍ଷା, ପ୍ରଶିକ୍ଷଣ, ଦରମା ବ୍ୟବସ୍ଥା ସଂପର୍କିତ ଆଲୋଚନା କରାଯାଇଥିଲା । ସେନାରେ ବ୍ୟାପକ ନିଯୁକ୍ତି ରହିଥିବା ସ୍ଥଳେ ବିଭିନ୍ନ ପ୍ରଦେଶରେ ଅଧିକରୁ ଅଧିକ ଅଗ୍ନିବୀର ନିଯୁକ୍ତି ନେଇ ପଞ୍ଜୀକରଣ କରୁଥିବା ବେଳେ ଓଡ଼ିଶାରେ କିନ୍ତୁ ପଞ୍ଜୀକରଣ ସଂଖ୍ୟା କମ ରହୁଛି । ଅଗ୍ନିବୀର ନିଯୁକ୍ତି ପାଇଁ ପ୍ରତିବର୍ଷ କମ୍ ସଂଖ୍ୟକ ପ୍ରାର୍ଥୀ ପ୍ରାର୍ଥିନୀ ପଂଜୀକରଣ କରୁଥିବା କାରଣରୁ ସେନା ନିଯୁକ୍ତିରେ ନିୟମ ଅନୁସାରେ ଓଡ଼ିଶା ପାଇଁ ପଦବୀ ସଂଖ୍ୟ ବଢୁ ନାହିଁ । ରାଜ୍ୟରୁ ସେନା ଭର୍ତ୍ତି ପାଇଁ ଗତ ଦଶ ବର୍ଷର ତଥ୍ୟ ଏବଂ ଚଳିତ ବର୍ଷର ପଞ୍ଜୀକରଣ ସ୍ଥିତି ଉପରେ ସମୀକ୍ଷା କରାଯାଇଥିଲା । ଚଳିତ ବର୍ଷ ୫ ମାର୍ଚ୍ଚ ୨୦୨୬ ସୁଦ୍ଧା ଓଡ଼ିଶାରୁ ମୋଟ ୬୦୪୪ ଜଣ ଯୁବକ ଯୁବତୀ ପଞ୍ଜୀକରଣ କରିଛନ୍ତି । ଏଥିରୁ ରାଜ୍ୟର ଉତ୍ତରାଂଚଳ ଜିଲାରୁ ୧୭୭୦, ଉପକୂଳ ଜିଲାରୁ ୨୫୮୩ ଏବଂ ଦକ୍ଷିଣାଂଚଳ ଜିଲାରୁ ୧୬୯୧ ଜଣ ପଞ୍ଜୀକରଣ କରିଥିବା ଜଣାପଡ଼ିଛି ।
ଅଗ୍ନିବୀର ସେନାରେ ନିଯୁକ୍ତି ପାଇଁ ଜଏନ ଇଣ୍ଡିଆନ ଆର୍ମି ୱେବସାଇଟ ୧୩ ଫେବୃଆରୀରୁ ଖୋଲା ଯାଇଛି । ଏହା ୧ ଏପ୍ରିଲ ୨୦୨୬ ପର୍ଯ୍ୟନ୍ତ ଚାଲୁ ରହିବ। ୨୦୨୫-୨୬ ବର୍ଷରେ ୮୬୬୪ ଜଣ ଓଡ଼ିଶାରୁ ପ୍ରବେଶିକା ପରୀକ୍ଷାରେ ଉତ୍ତୀର୍ଣ୍ଣ ହୋଇଥିଲା ବେଳେ ସମୁଦାୟ ୧୪୭୭ ଜଣ ଅଗ୍ନିବୀର ନିଯୁକ୍ତି ପାଇଥିଲେ । ବୈଠକରେ ଓଡ଼ିଶାର ଗୌରବ ସରୋଜିନୀ ଦାସ, ସତ୍ୟବାନ ଦାସ ଓ ମନସ୍ୱିନୀ ଦାସଙ୍କ ଉଦାହରଣ ଦିଆଯାଇଥିଲା । ଏମାନେ ଓଡ଼ିଶାରୁ ଗୋଟିଏ ପରିବାରରୁ ୨ ଜଣ ଝିଅ ଏବଂ ଗୋଟିଏ ପୁଅ ଯୋଗଦାନ କରିଛନ୍ତି । ବୈଠକରେ ଆଲୋଚନା କରାଯାଇଥିଲା ଯେ ଓଡ଼ିଶାରେ ବ୍ୟାପକ କ୍ରୀଡା ସଂସ୍କୃତି ରହିଛି । କ୍ରୀଡାରେ ଭଲ ପ୍ରଦର୍ଶନ କରିଥିବା ଛାତ୍ରଛାତ୍ରୀମାନେ ଉପଯୁକ୍ତ ପ୍ରମାଣିତ ସଂସ୍ଥାର ପ୍ରମାଣ ପତ୍ର ଥିଲେ ସେନାରେ ଯୋଗଦାନ ସୁଯୋଗ ରହିଛି । ସେନାରେ ଅଧିକ ନିଯୁକ୍ତି ଆମର ସୁରକ୍ଷା ଓ ନିରାପତ୍ତାକୁ ବୃଦ୍ଧି କରିବ । ବର୍ତ୍ତମାନ ଆଉ ୧ ମାସରୁ କମ ରହିଥିବାରୁ ଅଧିକରୁ ଅଧିକ ପଞ୍ଜୀକରଣ ପାଇଁ ସୁବିଧା କରିବାକୁ ବୈଠକରେ ଆଲୋଚନା କରାଯାଇଥିଲା । ଜିଲ୍ଲା ନିୟୋଜନ ଅଧିକାରୀମାନେ ଗୁରୁତ୍ୱପୂର୍ଣ୍ଣ ଦାୟିତ୍ୱ ନିର୍ବାହ କରିବାକୁ ପରାମର୍ଶ ଦିଆଯାଇଛି । ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗ, ଉଚ୍ଚଶିକ୍ଷା, ବିଦ୍ୟାଳୟ ଓ ଗଣଶିକ୍ଷା, ପଂଚାୟତିରାଜ ଓ ପାନୀୟ ଜଳ ବିଭାଗ ଆଦିଙ୍କୁ ଅଧିକରୁ ଅଧିକ ପଂଜୀକରଣ ପାଇଁ ପଦକ୍ଷେପ ନେବାକୁ ମୁଖ୍ୟ ଶାସନ ସଚିବ ଗୁରୁତ୍ୱ ଦେଇଛନ୍ତି । ମୋ ସେବା କେନ୍ଦ୍ର ଏବଂ କମନ ସର୍ଭିସ୍ ସେଣ୍ଟରର ଗୁଡ଼ିକର ସୁବିଧା ନେବାକୁ ମଧ୍ୟ ବୈଠକରେ ଆଲୋଚନା କରାଯାଇଥିଲା ।
ଯୁବକ ଯୁବତୀମାନଙ୍କ ମଧ୍ୟରେ ସେନା ଭର୍ତ୍ତି ସମ୍ପର୍କିତ ସଚେତନତା ବଢ଼ାଇବା ପାଇଁ ସୋସିଆଲ ମିଡିଆ, ପ୍ରିଣ୍ଟ ଓ ଇଲେକ୍ଟ୍ରୋନିକ ମାଧ୍ୟମରେ ବ୍ୟାପକ ପ୍ରଚାର କରିବା ସହ ପ୍ରତ୍ୟେକ ତହସିଲ ସ୍ତରରେ ନିବନ୍ଧନ ସହାୟତା କିଓସ୍କ ସ୍ଥାପନ କରିବାକୁ ପରାମର୍ଶ ଦିଆଯାଇଛି ।
