-ସମରେନ୍ଦ୍ର ବଳିଆରସିଂହଙ୍କ ଗଳ୍ପ ସଂକଳନ ‘ମତେ ନାୟିକା କରିନିଅ’ ଲୋକାର୍ପିତ
-ଅବଧୂତଙ୍କ ୨୪ ଗୁରୁ ଭଳି ସାଧାରଣ କଥାରୁ ଗପର ପ୍ଲଟ୍ ମିଳେ
ଖୋର୍ଦ୍ଧା: ୧୩/୭-ଗପର କିଛି ଭାଗ ମାପ ନ ଥାଏ। ଅବଧୂତଙ୍କ ଚବିଶ ଗୁରୁ ଭଳି ସାଧାରଣ କଥାରୁ ବି ଗପର ଖିଅ ବା ପ୍ଲଟ୍ ମିଳିଥାଏ । ଏଥିରେ ଦୃଷ୍ଟିକୋଣ ହେଉଛି ଗୁରୁତ୍ୱପୂର୍ଣ୍ଣ। ପୁଣି ବର୍ତ୍ତମାନର ପାଠକ ବା ନୂଆପିଢିଙ୍କୁ ଆକର୍ଷିତ କରିବା ପାଇଁ ସେହିଭଳି ଉପାଦାନ ଦେବାକୁ ପଡ଼ିବ। ରବିବାର ଅପରାହ୍ନରେ ଜଣାଶୁଣା ଗାଳ୍ପିକ ତଥା ସ୍ତମ୍ଭକାର ସମରେନ୍ଦ୍ର ବଳିଆରସିଂହଙ୍କ ଗଳ୍ପ ସଂକଳନ ‘ମତେ ନାୟିକା କରିନିଅ’ର ଲୋକାର୍ପଣ ଉତ୍ସବରେ ଏହିଭଳି ମତବ୍ୟକ୍ତ କରିଛନ୍ତି ଉପସ୍ଥିତ ଅତିଥିମାନେ ।
ତ୍ରିନାଥ ଚରଣ ସ୍ମୃତି କଳା ସାହିତ୍ୟ ସଂସଦ ପକ୍ଷରୁ ସ୍ଥାନୀୟ ଶ୍ୟାମ ମାଧବ- ବାସନ୍ତୀ ଦେବୀ ପାଠାଗାର ପ୍ରେକ୍ଷାଳୟରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ଯୋଗଦେଇ କେନ୍ଦ୍ର ସାହିତ୍ୟ ଏକାଡେମୀ ପୁରସ୍କାରପ୍ରାପ୍ତ ସାହିତ୍ୟିକ ତଥା ଅନୁବାଦକ ସୁଭାଷ ଶତପଥୀ ନିଜ ଅଭିଭାଷଣରେ କହିଥିଲେ , ଭଲ ବହି ଜନ୍ମ ହେଲେ ଅମର ହେଇଯାଏ। ସମରେନ୍ଦ୍ର ବଳିଆରସିଂହଙ୍କ ଗଳ୍ପ ସଂକଳନରେ ସେହିଭଳି ଉପାଦାନ ରହିଛି । ଏହା ସବୁ ବର୍ଗର ପାଠକଙ୍କୁ ଛୁଇଁବ। ସାବଲୀଳ ଭାଷାରେ ଆଧୁନିକତାର ଛିଟା ସେଥିରେ ଅଛି। ମୁଖ୍ୟବକ୍ତା ବିଶିଷ୍ଟ ଗାଳ୍ପିକ ତଥା ସାମ୍ବାଦିକ ଏ.ଆର୍. ଦୀପଙ୍କର ଦାସ ନିଜ ବକ୍ତବ୍ୟରେ ଗପର ବିଭିନ୍ନ ପରୀକ୍ଷା ନିରୀକ୍ଷା ସମ୍ବନ୍ଧରେ ବିଷ୍ଳେଷଣ କରିଥିଲେ । ସେ କହିଥିଲେ ଗପର ଚରିତ୍ରରେ ଭିଜିଗଲେ ଗପ କାଳଜୟୀ ହୋଇଥାଏ। ଅନ୍ୟତମ ଅତିଥି ରାଜ୍ୟପାଳ ପୁରସ୍କାରପ୍ରାପ୍ତ ଶିକ୍ଷକ ତଥା ସାହିତ୍ୟିକ ରାଜକିଶୋର ପାଣିଗ୍ରାହୀ ଗଳ୍ପ ସଂକଳନ ବାବଦରେ ମତ ଦେଇ କହିଥିଲେ ଯେ, ଜୀବନକୁ ନିରେଖି ଦେଖି ତାହାର ମନସ୍ତାତ୍ୱିକ ବିଶ୍ଳେଷଣ କରିବାରେ ଗାଳ୍ପିକ ସିଦ୍ଧହସ୍ତ। ବିଶିଷ୍ଟ ଗାଳ୍ପିକ ସୁନୀଲ କୁମାର ବୋଷ ଗଳ୍ପ ସଂକଳନର ସମୀକ୍ଷା କରି କହିଥିଲେ, ଯୁବ ଗାଳ୍ପିକଙ୍କ ଭିଡ଼ ଭିତରେ ବେଶ୍ ବାରି ହେଇପଡ଼େ ସମରେନ୍ଦ୍ରଙ୍କ ଗପ । ଆମ ସାଂପ୍ରତିକ ସମୟର ଚିତ୍ର ସେଥିରେ ବହୁଦା ଚିତ୍ରିତ। ପେଶା ସାମ୍ବାଦିକତା ହେତୁ ତାଜା ଖବର ଭଳି ଖୁବ ସତେଜ ତାଙ୍କ ଗପର ଜଗତ। ୨୦୧୯ ମସିହାରେ ସମରେନ୍ଦ୍ରଙ୍କ ପ୍ରଥମ ଗଳ୍ପ ସଂକଳନ ‘ମନେଅଛି ତ’ ପ୍ରକାଶ ପାଇଥିଲା ବେଳେ ଏହା ଦ୍ୱିତୀୟ ଗଳ୍ପ ସଂକଳନ।
ବିଶିଷ୍ଟ ଗାଳ୍ପିକ ଅଧ୍ୟାପକ କୈଳାସ ମହାରଣାଙ୍କ ସଂଯୋଜନାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଗାଳ୍ପିକ ସମରେନ୍ଦ୍ର ବଳିଆରସିଂହ ନିଜ ଅଭିବ୍ୟକ୍ତି ପ୍ରକାଶ କରି କହିଥିଲେ, ମତେ ନାୟିକା କରିନିଅ ଗଳ୍ପ ସଂକଳନରେ ସନ୍ନିବେଶିତ ଗପଗୁଡ଼ିକ ପଢିଲେ ଲାଗିବ, ଯେମିତି ଆପଣ କଥା ହେଉଛନ୍ତି, ଗପସପ କରୁଛନ୍ତି, ଗପରେ ସେହିଭଳି ବର୍ଣ୍ଣନା । କ୍ଲିଷ୍ଟ ଶବ୍ଦରେ ଭାରାକ୍ରାନ୍ତ ହେବାର ନାହିଁ, ହାଲ୍କା ଫୁଲ୍କା ଭାବେ ପାଠକ ଗପଗୁଡ଼ିକର ମଜା ନେଇପାରିବେ । କିଛି ଗପ ଭାବପ୍ରବଣ କରିପାରେ ା କାରଣ ଜୀବନର ନିଷ୍ଠୁର ସତ୍ୟ ବାବଦରେ ଗପର କାହାଣୀ ଗତିଶୀଳ ହୋଇଛି । ୧୧୨ ପୃଷ୍ଠାର ଏ ବହିରେ ସମୁଦାୟ ୪୦ଟି ଗପ ରହିଛି । ପ୍ରଥମ ଗପ ଶ୍ୟାମଳୀ ଘରେ ନାହିଁକି ? ଶେଷ ଗପ ନିର୍ଜୀବ। ଅନେକ ଗପର କାହାଣୀରେ ପ୍ରେମ ସଂପର୍କ ସହ ପରକୀୟା ପ୍ରସଙ୍ଗ ଅଛି। ଆଜିର ସ୍ମାର୍ଟଫୋନ୍ ଯୁଗରେ କିଭଳି ଅନାମ ସଂପର୍କ ବେଶୀ ବେଶୀ ଗଢିଉଠୁଛି, ତାହା ସେଥିରେ ରହିଛି । ସତ୍ୟତାର କାହାଣୀ ସହ କଳ୍ପନାର ସଂଯୋଗ ହୋଇଛି ଏହି ସଂକଳନରେ।
ବିଭିନ୍ନ ପତ୍ରପତ୍ରିକାରେ ପୂର୍ବରୁ ପ୍ରକାଶିତ ହୋଇଥିବା ଗପଗୁଡ଼ିକୁ ପୁସ୍ତକାକାରରେ ପ୍ରକାଶ କରିଛନ୍ତି ବିଶିଷ୍ଟ ଲେଖକ ତଥା ପ୍ରକାଶକ କନିଷ୍କ ଶ୍ରୀଚରଣ ପ୍ରତାପ । ଏହି ଅବସରରେ ବହିର ବିସ୍ତୁତ ସମୀକ୍ଷା କରିଥିଲେ ଖୋର୍ଦ୍ଧା ମହିଳା କଲେଜ ଓଡ଼ିଆ ବିଭାଗ ମୁଖ୍ୟ ଡ. ସସ୍ମିତା ପଟ୍ଟନାୟକ । ଏହି ଲୋକାର୍ପଣ କାର୍ଯ୍ୟକ୍ରମରେ ବିଶିଷ୍ଟ ଐତିହାସିକ ସତ୍ୟବାଦୀ ବଳିଆରସିଂହ, ଗାଳ୍ପିକ ତପନ ମହାପାତ୍ର, ସାହିତ୍ୟିକ ଗୋପାଳକୃଷ୍ଣ ଦାସ, ଡ. ପ୍ରମୋଦ ଚନ୍ଦ୍ର ଦାଶ, ସ୍ତମ୍ଭକାର ଉମାଶଙ୍କର ପ୍ରସାଦ, ସମାଜସେବୀ କୃଷ୍ଣଚନ୍ଦ୍ର ହରିଚନ୍ଦନ, କବି ଗୋବିନ୍ଦ ଚନ୍ଦ୍ର ମହାରଣା, ଗାଳ୍ପିକ ଚିନ୍ମୟ ରଂଜନ ସାହୁ, ବରିଷ୍ଠ ସାମ୍ବାଦିକ ତଥା ସାହିତ୍ୟିକ ଗୋପାଳ ଚନ୍ଦ୍ର ସାମନ୍ତରାୟ, ସାମ୍ବାଦିକ ଲୋହିତ ମହାପାତ୍ର, ଅନୁବାଦକ ଆଶିଷ କୁମାର ରାୟ, କବି ରଶ୍ମୀତା ନାୟକ, ଡ. ବୃନ୍ଦାବନ ପଣ୍ଡା, କବି ନିଶିକାନ୍ତ କହଲସିଂହ, ଗାଳ୍ପିକ ଚିନ୍ମୟ ରଂଜନ ସାହୁ, ଅଧ୍ୟାପିକା ପ୍ରିୟଦର୍ଶିନୀ ମହାରଣା ପ୍ରମୁଖ ଗଳ୍ପ ସଂକଳନ ସର୍ମ୍ପକରେ ନିଜର ସଂକ୍ଷିପ୍ତ ମତ ରଖିଥିଲେ। ଅବସରପ୍ରାପ୍ତ ଫ୍ଲାଇଟ୍ ଲେଫ୍ଟନାଂଟ ବିଦ୍ୟାଧର ଲେଙ୍କା, ଜ୍ୟୋତିରଂଜନ ସାହୁ, ଧର୍ମେନ୍ଦ୍ର ସାମନ୍ତରାୟ, ସମ୍ଭବ ବଳିଆରସିଂହ ପ୍ରମୁଖ କାର୍ଯ୍ୟକ୍ରମ ପରିଚାଳନା କରିଥିଲେ । ଶେଷରେ ତ୍ରିନାଥ ଚରଣ ସ୍ମୃତି କଳା ସାହିତ୍ୟ ସଂସଦର ସମ୍ପାଦିକା ସମାଜସେବୀ ଇତିଶ୍ରୀ ସାହୁ ଧନ୍ୟବାଦ ଅର୍ପଣ କରିଥିଲେ।
