ଭୁବନେଶ୍ୱର:4/5-ଆଉ ଜଣେ ନେପାଳୀ ଛାତ୍ରୀ ପ୍ରିଶାଙ୍କ ହଷ୍ଟେଲରେ ଆତ୍ମହତ୍ୟାକୁ ନେଇ କିଟ୍ ବିଶ୍ୱବିଦ୍ୟାଳୟ ବିବାଦକୁ ଚାଲି ଆସିଛି। ତିନି ମାସ ମଧ୍ୟରେ ପୁଣି ଜଣେ ନେପାଳୀ ଛାତ୍ରୀଙ୍କ ଆତ୍ମହତ୍ୟା ସମସ୍ତଙ୍କୁ ବିସ୍ମିତ କରିଛି। ଗତ ଫେବୃୟାରୀରେ ଆତ୍ମହତ୍ୟା କରିଥିବା ନେପାଳୀ ଛାତ୍ରୀ ପ୍ରକୃତି ଲାମସଲଙ୍କ ଆତ୍ମହତ୍ୟା ଘଟଣାରେ ଗୃହସଚିବଙ୍କ ଅଧ୍ୟକ୍ଷତାରେ ଗଠିତ ଉଚ୍ଚସ୍ତରୀୟ ତଦନ୍ତ କମିଟିର ରିପୋର୍ଟ କ’ଣ ହେଲା ତାହା ଏବେ ବି ସ୍ପଷ୍ଟ ହୋଇ ନାହିଁ ।
ଚଳିତ ମାସ ୧ ତାରିଖରେ ଫ୍ୟାନରେ ଝୁଲି ଆତ୍ମହତ୍ୟା କରିଥିବା ପ୍ରିଶାଙ୍କର ଶନିବାର ପୁରୀ ସ୍ୱର୍ଗଦ୍ୱାରରେ ଅନ୍ତିମ ସଂସ୍କାର କାର୍ଯ୍ୟ ଶେଷ ହୋଇଛି। ନେପାଳରୁ ତାଙ୍କ ପିତାମାତା ଭୁବନେଶ୍ୱରରେ ଆସି ପହଂଚିବା ପରେ ଏମସ ହସ୍ପିଟାଲରେ ପ୍ରିଶାଙ୍କ ପୋଷ୍ଟମର୍ଟମ କରାଯାଇଥିଲା । ଏହାପରେ ପ୍ରଶାସନର ସହଯୋଗରେ ଅନ୍ତିମସଂସ୍କାର କରାଯାଇଥିଲା। ଏପର୍ଯ୍ୟନ୍ତ ମୃତ୍ୟୁ ପଛର ରହସ୍ୟ ଜଣାପଡ଼ିନାହିଁ। ପ୍ରିଶାଙ୍କ ଆତ୍ମହତ୍ୟାକୁ ପ୍ରେମଜନିତ ରଙ୍ଗ ଦେବା ନେଇ ଚାଲିଥିବା ଉଦ୍ୟମକୁ ତାଙ୍କ ପିତା ନାପସନ୍ଦ କରିଛନ୍ତି।
ଫେବୃୟାରୀ ୧୬ତାରିଖରେ ପ୍ରକୃତି ଲାମସଲ ଯେଭଳି ଢଙ୍ଗରେ ହଷ୍ଟେଲ ରୁମରେ ଆତ୍ମହତ୍ୟା କରିଥିଲେ ବି.ଟେକ୍ ପ୍ରଥମବର୍ଷ ଛାତ୍ରୀ ପ୍ରିଶା ମଧ୍ୟ ସେଭଳି ଢଙ୍ଗରେ ହଷ୍ଟେଲରେ ଆତ୍ମହତ୍ୟା କରିଥିଲେ।
ପ୍ରିଶାଙ୍କ ଆତ୍ମହତ୍ୟା ଘଟଣାକୁ ଜାତୀୟ ମାନବାଧିକାର କମିଶନରାଜ୍ୟ ମୁଖ୍ୟ ସଚିବ ଓ ପୁଲିସ ଡିଜିଙ୍କୁ ରିପୋର୍ଟ ତଲବ କରିଛନ୍ତି। ତଦନ୍ତର କାର୍ଯ୍ୟାନୁଷ୍ଠାନ ରିପୋର୍ଟ, ଏଫଆଇଆର କପି ଓ ପୋଷ୍ଟମର୍ଟମ ରିପୋର୍ଟ ସହ ପୋଷ୍ଟମର୍ଟମ ପ୍ରକ୍ରିୟାର ଭିଡିଓଗ୍ରାଫି କରିବାକୁ କମିଶନ ନିର୍ଦ୍ଦେଶ ଦେଇଛନ୍ତି। ଆସନ୍ତା ୯ ତାରିଖ ସୁଦ୍ଧା ରିପୋର୍ଟ ଦାଖଲ କରିବାକୁ କହିଛନ୍ତି । ସେହିପରି ୟୁଜିସି କର୍ତ୍ତୃପକ୍ଷ ମଧ୍ୟ ଏହି ମାମଲାରେ ଏକ ଉଚ୍ଚସ୍ତରୀୟ କମିଟି ଗଠନ କରିଛନ୍ତି।
ପ୍ରକୃତି ଲାମସଲ ଆତ୍ମହତ୍ୟା ମାମଲାରେ ଏନଏଚଆରସି ଯାଂଚ କରି କିଟ୍ ବିରୁଦ୍ଧରେ ଆବଶ୍ୟକ କାର୍ଯ୍ୟାନୁଷ୍ଠାନ ନେବା ପାଇଁ ରାଜ୍ୟ ସରକାର, ଖୋର୍ଦ୍ଧା ଜିଲ୍ଲାପାଳ ଓ ୟୁଜିସି କର୍ତ୍ତୃପକ୍ଷଙ୍କୁ ମାର୍ଚ୍ଚ ୨୭ତାରିଖରେ ନିର୍ଦ୍ଦେଶ ଦେବାପରେ ଏହାକୁ ଓଡ଼ିଶା ହାଇକୋର୍ଟରେ କିଟ୍ କର୍ତ୍ତୃପକ୍ଷ ଚ୍ୟାଲେଞ୍ଜ କରିଥିଲେ। ଦେଶର ନାମୀ ଓକିଲଙ୍କୁ ଆଣି କିଟ୍ ନିଜର ଏହି ମାମଲା ଲଢ଼ିଛି। ଏହି ମାମଲାର ପରବର୍ତ୍ତୀ ଶୁଣାଣି ଜୁନ୍ ୩୦ତାରିଖକୁ ଧାର୍ଯ୍ୟ କରାଯାଇଛି। ଇତିମଧ୍ୟରେ ଆଉଜଣେ ନେପାଳୀ ଛାତ୍ରୀ ଆତ୍ମହତ୍ୟା କରିଥିବାରୁ ରାଜ୍ୟ ସରକାର, ଜିଲ୍ଲା ପ୍ରଶାସନ, ୟୁଜିସି ଓ ଏନଏଚଆରସିଙ୍କ ଭୂମିକା ଉପରେ ସମସ୍ତଙ୍କ ଦୃଷ୍ଟି ରହିଛି।
