ଭୁବନେଶ୍ୱର:୪/୧- ରାଜ୍ୟରେ ୭ଟି ନୂଆ ପୌରପାଳିକା ଓ ୨୮ଟି ଏନଏସି ପାଇଁ ବିଜ୍ଞପ୍ତି ଜାରି ହୋଇଛି । ନୂଆ ଏନଏସି ପାଇଁ ସମସ୍ତ ବିଡିଓଙ୍କୁ ପ୍ରଶାସନିକ ଅଧିକାରୀ ଭାବେ ଦାୟିତ୍ୱ ହସ୍ତାନ୍ତର ହୋଇଛି । ସବୁ ଏନଏସିର ନୂତନ କାର୍ଯ୍ୟାଳୟ ପାଇଁ ୬କୋଟି, ରାସ୍ତା ପାଇଁ ୫୦ଲକ୍ଷ ଓ ଲାଇଟ ପାଇଁ ୫୦ଲକ୍ଷ ଟଙ୍କା ପ୍ରଦାନ କରାଯାଇଛି। ଏନଏସି ରୁ ଉନ୍ନୀତ ହୋଇଥିବା ୭ଟି ମ୍ୟୁନିସିପାଲିଟି ପାଇଁ ମଧ୍ୟ ଅର୍ଥ ଦିଆଯାଇଛି । ସାନିଟେସନ, ଅଲୋକୀକରଣ ଭଳି ବିଭିନ୍ନ କାମ ପାଇଁ ଦେଢ଼ କୋଟି ଲେଖାଏଁ ପ୍ରଦାନ କରାଯାଇଛି । ପୁରୀକୁ ମହାନଗର ନିଗମ ମାନ୍ୟତା ମିଳିଛି । ପୁରୀ ନିକଟସ୍ଥ ବିଭିନ୍ନ ଅଞ୍ଚଳକୁ ମିଶାଇ କଳେବର ବଢ଼ିଛି । ଏଥିରେ ପିକେଡିଏ ପରିସୀମା ବଢିବା ସହ ଟିପି ସ୍କିମ କରାଯିବାକୁ ସ୍ଥିର ହୋଇଛି ।
ପୁରୀରେ ମଲ୍ଟି ପରପୋଜ ମାର୍କେଟ କମ୍ପେ୍ଲକ୍ସ ହେବ । ପୁରୀ-କଟକ-ପାରାଦୀପକୁ ନେଇ ଇକୋନୋମିକ ରିଜନ କରାଯିବ। ଏଥିସହ ବୃହତ ଭୁବନେଶ୍ୱରର ପରିକଳ୍ପନା ମଧ୍ୟ ହୋଇଛି । ୨୬ଟି ରାଜସ୍ୱ ଗ୍ରାମ ଏବଂ ୭ଟି ପଂଚାୟତକୁ ଭୁବନେଶ୍ୱରରେ ମିଶାଯିବ । ସିଜୁଆ, ସିଜିପୁଟ, ସହଜପୁର, ବିଜିପୁର, ତମାଣ୍ଡୋ, ବେଗୁନିଆ, ଶିଶୁପାଳଗଡ଼, କେସୁରା, ବାଙ୍କୁଆଳ, ରଘୁନାଥପୁର, ଲିଙ୍ଗିପୁର, ଚୂନକୋଳି ଭଳି ୨୬ଟି ଗାଁ ଭୁବନେଶ୍ୱର ମହାନଗର ନିଗମରେ ମିଶିବ ବୋଲି ନଗର ଉନ୍ନୟନ ମନ୍ତ୍ରୀ ସୂଚନା ଦେଇଛନ୍ତି ।
