ଭୁବନେଶ୍ୱର:୨୨/୭- ଜାତୀୟ ମାନବାଧିକାର ଆୟୋଗଙ୍କ ଦୁଇ ଦିନିଆ ଜନଶୁଣାଣି ଶିବିର ଉଦଯାପିତ ହୋଇଯାଇଛି। ଏଥିରେ ମୋଟ୍ ୧୪୪ଟି ମାମଲାର ଶୁଣାଣି କରାଯିବା ସହିତ ରାଜ୍ୟରେ ମାନବାଧିକାର ଉଲ୍ଲଂଘନ ପୀଡ଼ିତମାନଙ୍କୁ ପ୍ରାୟ ୨୮ ଲକ୍ଷ ଟଙ୍କାର ସହାୟତା ପ୍ରଦାନ ନିମନ୍ତେ ସୁପାରିସ କରାଯାଇଛି। ଶିବିରରେ ଜାତୀୟ ମାନବାଧିକାର ଆୟୋଗ (ଏନଏଚଆରସି) ଅଧ୍ୟକ୍ଷ ନ୍ୟାୟମୂର୍ତ୍ତି ଭି. ରାମସୁବ୍ରମଣ୍ୟନ୍, ସଦସ୍ୟ ନ୍ୟାୟମୂର୍ତ୍ତି ବିଦ୍ୟୁତ୍ ରଞ୍ଜନ ଷଢ଼ଙ୍ଗୀ ଏବଂ ବିଜୟା ଭାରତୀ ସାୟାନିମାମଲାଗୁଡ଼ିକର ଶୁଣାଣି କରିଥିଲେ। ଏହି ଅବସରରେ ମହାସଚିବ, ଶ୍ରୀ ଭରତ ଲାଲ, ରେଜିଷ୍ଟ୍ରାର (ଆଇନ) ଯୋଗିନ୍ଦର ସିଂହଙ୍କ ସମେତ ଅନ୍ୟ ବରିଷ୍ଠ ଅଧିକାରୀ, ରାଜ୍ୟସରକାରଙ୍କ ସମ୍ପୃକ୍ତ ଅଧିକାରୀ ଏବଂ ଅଭିଯୋଗକାରୀ ଉପସ୍ଥିତ ଥିଲେ।
ମାନବାଧିକାର ଆୟୋଗ ଏହି ଶିବିରରେ ହାଜତ ମୃତ୍ୟୁ, ସରକାରୀ ଆଶ୍ରୟ ଗୃହରେ ମୃତ୍ୟୁ, ଡାକ୍ତରଖାନାରେ ଅଗ୍ନିକାଣ୍ଡ ଯୋଗୁଁ ଶିଶୁ ମୃତ୍ୟୁ, ବୁଡ଼ି ଜନିତ ମୃତ୍ୟୁ, ବୁଲା କୁକୁର କାମୁଡ଼ା, ଶିଶୁ ଚାଲାଣ, ମୌଳିକ ମାନବିକ ସୁବିଧାରୁ ବଞ୍ଚିତ ହେବା ମାମଲା, ନାବାଳିକା ଦୁଷ୍କର୍ମ, ଅପରାଧ ସମେତ ନାରୀ ନିର୍ଯାତନା, ନିଖୋଜ ବ୍ୟକ୍ତିଙ୍କ ମାମଲା, ପୁଲିସ ଅତ୍ୟାଚାର, ଆତ୍ମହତ୍ୟା ମୃତ୍ୟୁ, ପୁଲିସ ଦ୍ୱାରା ଏଫଆଇଆର ପଞ୍ଜିକରଣ ନ କରିବା, ବିଦ୍ୟୁତ ଆଘାତ ମାମଲା ଇତ୍ୟାଦି ବିଭିନ୍ନ ମାମଲାର ବିଚାର କରିଥିଲେ।
ବିଭିନ୍ନ ମାମଲାରେ ଉପଯୁକ୍ତ ନିର୍ଦ୍ଦେଶ ଦିଆଯାଇଥିଲା। ଉଦାହରଣ ସ୍ୱରୂପ ଜଣେ ବରିଷ୍ଠ ଆଦିବାସୀ ମହିଳାଙ୍କୁ ଭତ୍ତା, ୧୫,୦୦୦ ଟଙ୍କାର ମଧ୍ୟବର୍ତ୍ତୀକାଳୀନ ସହାୟତା ଏବଂ ଅନ୍ୟାନ୍ୟ ସାମାଜିକ କଲ୍ୟାଣ ସୁବିଧା ପ୍ରଦାନ କରିବାକୁ ଆୟୋଗ ନିର୍ଦ୍ଦେଶ ଦେଇଥିଲେ। ବିଭିନ୍ନ ମାମଲାରେ ପୁଲିସ ତଦନ୍ତ ତ୍ୱରାନ୍ୱିତ କରିବା ଏବଂ କୋର୍ଟରେ ଚାର୍ଜସିଟ୍ ଦାଖଲ କରିବାକୁ କୁହାଯାଇଥିଲା। ଗୋଟିଏ ବିପଦପୂର୍ଣ୍ଣ ବାଣ କାରଖାନାରେ କାମ କରୁଥିବା ସମୟରେ ମୃତ୍ୟୁବରଣ କରିଥିବା ପାଞ୍ଚ ଜଣ ଶ୍ରମିକଙ୍କ ନିକଟ ସମ୍ପର୍କୀୟଙ୍କୁ ୪ ଲକ୍ଷ ଟଙ୍କା କ୍ଷତିପୂରଣ ପ୍ରଦାନ ଲାଗି ମଧ୍ୟ ନିର୍ଦ୍ଦେଶ ଦିଆଯାଇଥିଲା ।
ଅଭିଯୋଗକାରୀ ଏବଂ ସମ୍ପୃକ୍ତ ଅଧିକାରୀଙ୍କ ଶୁଣାଣି ପରେ ଆୟୋଗ ୩୮ଟି ମାମଲା ବନ୍ଦ କରିଛନ୍ତି। ଏହା ସହିତ, ଆୟୋଗଙ୍କ ସୁପାରିସ ଅନୁଯାୟୀ ସମ୍ପୃକ୍ତ ଅଧିକାରୀମାନେ ଦେୟ ପ୍ରମାଣ ସହିତ ଅନୁପାଳନ ରିପୋର୍ଟ ଦାଖଲ କରିବା ପରେ ତିନୋଟି ମାମଲା ବନ୍ଦ କରାଯାଇଛି। ‘ପିଡ଼ିତ କ୍ଷତିପୂରଣ ଯୋଜନା’ ଅଧୀନରେ ୨୫ଟି ମାମଲାରେ ୧ କୋଟି ଟଙ୍କାର କ୍ଷତିପୂରଣ ରାଶି ବାକି ରହିଛି ବୋଲି ଆୟୋଗ ଜାଣିବାକୁ ପାଇଥିଲେ। ଏ ନେଇ ରାଜ୍ୟ ଆଇନ ସେବାର ସଦସ୍ୟ ସଚିବଙ୍କ ସହ ଆଲୋଚନା କରାଯାଇଥିଲା ଏବଂ କ୍ଷତିପୂରଣ ପ୍ରଦାନ ପରେ ମାମଲାଗୁଡ଼ିକର ସମାଧାନ ସୁନିଶ୍ଚିତ ହୋଇଥିଲା।
ଶୁଣାଣି ପରେ, ଆୟୋଗ ରାଜ୍ୟର ମୁଖ୍ୟ ସଚିବ, ପୁଲିସ ମହାନିର୍ଦ୍ଦେଶକ ଏବଂ ଓଡ଼ିଶା ସରକାରଙ୍କ ବରିଷ୍ଠ ଅଧିକାରୀଙ୍କ ସହିତ ମାନବାଧିକାରର ବିଭିନ୍ନ ଦିଗ ଉପରେ ଏକ ବୈଠକ କରିଥିଲେ। ମହିଳା ଓ ଶିଶୁଙ୍କ ବିରୋଧରେ ଅପରାଧ, ସାପ କାମୁଡ଼ା ଯୋଗୁଁ ମୃତ୍ୟୁ, କୋଭିଡ ସମୟରେ ମାନବ ଚାଲାଣ, ଓଡ଼ିଶାର କିଛି ସ୍ଥାନରେ ବନ୍ୟା ପରିସ୍ଥିତି ଯୋଗୁଁ ସମସ୍ୟା, ଡାହାଣୀ ଓ ଗୁଣିଗାରେଡ଼ି ଯୋଗୁଁ ମାନବାଧିକାର ଉଲ୍ଲଂଘନ ଇତ୍ୟାଦି ପ୍ରସଙ୍ଗରେ ଆଲୋଚନା ହୋଇଥିଲା। ମାନସିକ ସ୍ୱାସ୍ଥ୍ୟ, ଗୋତି ଖଟିବା, ଖାଦ୍ୟ ଓ ସୁରକ୍ଷା ଅଧିକାର ଇତ୍ୟାଦି ପ୍ରସଙ୍ଗରେ ଆୟୋଗଙ୍କ ଦ୍ୱାରା ଜାରି କରାଯାଇଥିବା ବିଭିନ୍ନ ପରାମର୍ଶ ଉପରେ କାର୍ଯ୍ୟାନୁଷ୍ଠାନ ରିପୋର୍ଟ ଦାଖଲ କରିବା ଓ ମାନବାଧିକାର ଉଲ୍ଲଂଘନର ପୀଡିତମାନଙ୍କୁ ନ୍ୟାୟ ପ୍ରଦାନ କରିବା ପାଇଁ ଆୟୋଗଙ୍କ ନିକଟରେ ସମୟସୀମା ମଧ୍ୟରେ ରିପୋର୍ଟ ଦାଖଲ କରିବାକୁ ସେମାନଙ୍କୁ ନିର୍ଦ୍ଦେଶ ଦିଆଯାଇଥିଲା। ମୁଖ୍ୟ ସଚିବ ଏହାର ପୂର୍ଣ୍ଣ ଅନୁପାଳନ ପାଇଁ ପ୍ରତିଶ୍ରୁତି ଦେଇଥିଲେ। ପରେ, ଆୟୋଗ ନାଗରିକ ସମାଜର ପ୍ରତିନିଧି, ଏନଜିଓ ଏବଂ ମାନବାଧିକାର କର୍ମୀ ଓ ରକ୍ଷାକାରୀ ସଂସ୍ଥାଗୁଡ଼ିକର ପଦାଧିକାରୀଙ୍କ ସହିତ ମଧ୍ୟ ଆଲୋଚନା କରିଥିଲେ।
ଓଡ଼ିଶାର ମାନବାଧିକାର କର୍ମୀ ଏବଂ ଆଇନଜୀବୀ ରାଧାକାନ୍ତ ତ୍ରିପାଠୀଙ୍କ ଅକାଳ ବିୟୋଗରେ ଦୁଇ ମିନିଟ୍ ନୀରବ ପ୍ରାର୍ଥନା କରାଯାଇଥିଲା। ଏହାସହିତ ସମଗ୍ର ଓଡ଼ିଶାରେ ଅଗଣିତ ଜୀବନରେ ସୁଧାର ଆଣିବା ଲାଗି ନ୍ୟାୟ, ମର୍ଯ୍ୟାଦା ଏବଂ ସମାନତା ପ୍ରତି ତାଙ୍କର ଅଟଳ ପ୍ରତିବଦ୍ଧତାକୁ ସ୍ୱୀକାର କରି ଏକ ଶୋକବାର୍ତ୍ତା ଜାରି କରାଯାଇଥିଲା।
ମାନବାଧିକାର ଶିକ୍ଷା, ପୁଲିସ ସଂସ୍କାର, ଶିକ୍ଷା ଓ ପରିଚୟ ପତ୍ର ସମସ୍ୟା ସମ୍ପର୍କରେ ତୃତୀୟ ଲିଙ୍ଗିଙ୍କ ସମସ୍ୟା ଇତ୍ୟାଦି ବିଭିନ୍ନ ପ୍ରସଙ୍ଗ ଉପରେ ମାନବାଧିକାର କର୍ମୀମାନେ ଆଲୋକପାତ କରିଥିଲେ। ଦେଶରେ ମାନବାଧିକାରକୁ ଆହୁରି ସୁଦୃଢ଼ କରିବା ପାଇଁ ଏନଏଚଆରସିଙ୍କ ନିକଟରେ ପହଞ୍ଚିବା ଏବଂ ମତ ବିନିମୟ କରିବା ପାଇଁ ଏହି ପଦକ୍ଷେପକୁ ଏନଜିଓ ଏବଂ ମାନବାଧିକାର କର୍ମୀମାନେ ସ୍ୱାଗତ କରିଥିଲେ। ଏନଏଚଆରସି ଅଧ୍ୟକ୍ଷ ନ୍ୟାୟମୂର୍ତ୍ତି ଭି. ରାମସୁବ୍ରମଣ୍ୟନ୍ କହିଥିଲେ, ଆୟୋଗ ସହିତ ଏନଜିଓ ଏବଂ ମାନବାଧିକାର ରକ୍ଷାକାରୀ ସଂସ୍ଥାଗୁଡ଼ିକର ନିରନ୍ତର ସହଭାଗୀତା ଦେଶରେ ମାନବାଧିକାରକୁ ସୁଦୃଢ଼ କରିବାରେ ବହୁତ ସାହାଯ୍ୟ କରିବ। ସେମାନଙ୍କୁ ଏହା ମଧ୍ୟ ସୂଚନା ଦିଆଯାଇଥିଲା ଯେ ସେମାନେ hrcnet.nic.in ମାଧ୍ୟମରେ ଅନଲାଇନରେ ମାନବାଧିକାର ଉଲ୍ଲଂଘନର ଅଭିଯୋଗ ଦାଖଲ କରିପାରିବେ। ଆୟୋଗ ରାଜ୍ୟରେ ସେମାନଙ୍କର କାର୍ଯ୍ୟକୁ ପ୍ରଶଂସା କରିଥିଲେ ଏବଂ ଭୟ କିମ୍ବା ପକ୍ଷପାତିତା ବିନା ଏପରି କରିବାକୁ ସେମାନଙ୍କୁ ଉତ୍ସାହିତ କରିଥିଲେ।
