ଭୁବନେଶ୍ୱର:୨୦/୩-ମଧ୍ୟପ୍ରାଚ୍ୟରେ ଚାଲିଥିବା ଯୁଦ୍ଧ ଯୋଗୁଁ ବିଶ୍ୱ ବଜାରରେ ଗ୍ୟାସ ଓ ତୈଲ ଯୋଗାଣ ବାଧାପ୍ରାପ୍ତ ହୋଇଛି। ରନ୍ଧନ ଗ୍ୟାସର ମୂଲ୍ୟବୃଦ୍ଧି ପରେ ଏହା ଉପରେ କଟକଣା ଯୋଗୁଁ ଏବେ ଗ୍ୟାସ ପାଇଁ ଲୋକେ ନାହିଁ ନଥିବା ଦୁର୍ଦ୍ଦଶା ଭୋଗୁଛନ୍ତି। ଶୁକ୍ରବାର ଭାରତରେ ପେଟ୍ରୋଲ ମହଙ୍ଗା ହୋଇଛି। ପ୍ରିମିୟମ ପେଟ୍ରୋଲ ଲିଟର ପିଛା ୨ ଟଙ୍କା ୩୫ ପର୍ଯ୍ୟନ୍ତ ବୃଦ୍ଧି ପାଇଛି।
ଭାରତର ପ୍ରମୁଖ ତୈଲ କମ୍ପାନୀଗୁଡ଼ିକ ପ୍ରିମିୟମ ପେଟ୍ରୋଲର ଦର ଲିଟର ପିଛା ୨ ଟଙ୍କା ୦୯ ପଇସାରୁ ୨ ଟଙ୍କା ୩୫ ପଇସା ପର୍ଯ୍ୟନ୍ତ ବଢ଼ାଇଛନ୍ତି। ସାଧାରଣ ପେଟ୍ରୋଲ ଅପରିବର୍ତ୍ତିତ ରହିଛି। ବର୍ତ୍ତମାନ ପାଇଁ କେବଳ ପ୍ରିମିୟମ୍ ପେଟ୍ରୋଲ ଦର ବଢ଼ିଛି। ସାଧାରଣ ପେଟ୍ରୋଲ ଦରରେ କୌଣସି ପରିବର୍ତ୍ତନ କରାଯାଇ ନାହିଁ। ଗତ ଫେବୃୟାରୀ୨୮ରେ ଆମେରିକା-ଇସ୍ରାଏଲର ଇରାନ ଉପରେ ଆକ୍ରମଣ ପରେ ସାରା ଗଲ୍ଫ ଅଞ୍ଚଳରେ ଯୁଦ୍ଧ ଜାରି ରହିଛି। ବିଶ୍ୱର ପ୍ରାୟ ୨୦% ତେଲ ପରିବହନ ହେଉଥିବା ‘ଷ୍ଟ୍ରେଟ ଅଫ ହର୍ମୁଜ’ ପଥ ପ୍ରାୟତଃ ବନ୍ଦ ହୋଇଯାଇଥିବାରୁ ଏଭଳି ସ୍ଥିତି ଉପୁଜିଛି।
