ଭୁବନେଶ୍ୱର:୧୯/୧୨- ବିଧାୟକଙ୍କ ଦରମା ବଢ଼େଇ ମୋହନ ସରକାରକୁ ବେଜିତ୍ ହେବାକୁ ପଡ଼ିଛି । ଦରମା ବୃଦ୍ଧି ନିଷ୍ପତ୍ତିର ପୁନର୍ବିଚାର ପାଇଁ ବିଜେପି ବିଧାୟକ ଦଳ ବୈଠକ ବସି ଗତ ୧୮ ତାରିଖରେ ମୁଖ୍ୟମନ୍ତ୍ରୀଙ୍କୁ ପ୍ରସ୍ତାବ ଦେଇଥବା ମନ୍ତ୍ରୀ ମୁକେଶ ମହାଲିଙ୍ଗ କହିଛନ୍ତି ।
ବିଧାନସଭାର ଶୀତ ଅଧିବେଶନ ୧୮ଟି କାର୍ଯ୍ୟ ଦିବସ ପୂର୍ବରୁ ସାରି ଦିଆଯାଇଥିଲା । ଶେଷଦିନ ବିଧାୟକଙ୍କ ଦରମା ବୃଦ୍ଧି ସଂକ୍ରାନ୍ତ ଚାରିଟି ବିଧେୟକକୁ ଗୃହରେ ପାରିତ କରାଯାଇଥିଲା । ଏହାକୁ କେହି ବିରୋଧ କରିନଥିଲେ । ବିଧାୟକଙ୍କ ଦରମା ସାଢ଼େ ତିନିଗୁଣା ବୃଦ୍ଧି କରାଯାଇଥିଲା । ୯୦ ହଜାରରୁ ବଢ଼ି ୩ ଲକ୍ଷ ୪୫ ହଜାର ହୋଇଥିଲା । ଅଧିକ ଦରମା ଓ ଭତ୍ତା ପାଇବାରେ ଓଡ଼ିଶାର ବିଧାୟକମାନେ ଦେଶରେ ପ୍ରଥମ ସ୍ଥାନ ହାସଲ କରିଥିଲେ । ଏଭଳି ବ୍ୟବସ୍ଥାକୁ ନେଇ ସାଧାରଣରେ ତୀବ୍ର ଅସେନ୍ତାଷ ସୃଷ୍ଟି ହୋଇଥିଲା । ଏହା ଦେଶବ୍ୟାପୀ ଚର୍ଚ୍ଚାକୁ ଆସିଥିଲା ।
ବିଧାନସଭାରେ ବିଧେୟକ ପାରିତ ହେବା ଭୁବନେଶ୍ୱର ଆସିଥିବା ବିଜେପିର ସାଧାରଣ ସମ୍ପାଦକ ବି.ଏଲ ସନ୍ତୋଷ ଏକ ଦଳୀୟ ବୈଠକରେ ବିଧାୟକଙ୍କ ଦରମା ବୃଦ୍ଧିକୁ ନେଇ ଅସନ୍ତୋଷ ପ୍ରକାଶ କରିିଥିଲେ । ବିଧାନସଭାରେ ପାରିତ ହୋଇଥିବା ଏ ସଂକ୍ରାନ୍ତୀୟ ବିଧେୟକ ଅନୁମୋଦନ ପାଇଁ ରାଜ୍ୟପାଳଙ୍କ ନିକଟକୁ ଯାଇଥିଲା । ରାଜ୍ୟପାଳ ଏହାକୁ ଅନୁମତି ନ ଦେଇ ରଖିଛନ୍ତି । ଅମିତ ଶାହାଙ୍କ ପରି କେନ୍ଦ୍ରୀୟ ନେତାଙ୍କ ଅସନ୍ତୋଷ ଆଲୋଡ଼ନ ସୃଷ୍ଟି କରିଥିଲା । ନିଷ୍ପତ୍ତିର ପୁନଃବିଚାର ପାଇଁ ଦଳର ମନ୍ତ୍ରୀ ବିଧାୟକ ବାଟ ଖୋଜିଥିଲେ ।
ଗୁରୁବାର ବିଧାୟକମାନଙ୍କ ବୈଠକରେ ରାଜ୍ୟ ସଭାପତି ମନମୋହନ ସାମଲ, ଉପ ମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା, ସଂଗଠନ ସମ୍ପାଦକ ମାନସ ମହାନ୍ତି ପ୍ରମୁଖ ଉପସ୍ଥିତ ଥିଲେ । ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ପୂର୍ବରୁ ପ୍ରସ୍ତୁତ ହୋଇଥିବା ଏକ ପ୍ରସ୍ତାବ ବିଧାୟକମାନଙ୍କୁ ପଢ଼ି ଶୁଣାଇ ଦିଆଗଲା । କେନ୍ଦ୍ରୀୟ ନେତୃତ୍ୱଙ୍କ ଆଭିମୁଖ୍ୟ ମଧ୍ୟ ଜଣାଇ ଦିଆଗଲା । ଗଣମାଧ୍ୟମକୁ ସଂସଦୀୟ ବ୍ୟାପର ମନ୍ତ୍ରୀ ମୁକେଶ ମହାଲିଙ୍ଗ ନିଷ୍ପତ୍ତି ଜଣାଇଲେ ।
ଜନସେବକଙ୍କ ଦରମା ତିନିଗୁଣ ବଢ଼ାଇଥିବା ମୋହନ ସରକାର, ସରକାରଙ୍କ ଚାବିକାଠି ପାଇ ନିଜ ପାଇଁ ଭଣ୍ଡାର ଖୋଲି ଦେଇଥଲେ। ଏବେ ହଟ୍ଟହଟ୍ଟା ହେବାକୁ ପଡିଥିବା ବେଳେ ଲୋକମତକୁ ଆଧାର କରି ଦରମା ବୃଦ୍ଧି ସଂକ୍ରାନ୍ତ ପାରିତ ବିଧେୟକର ପୁନର୍ବିଚାର କରିବାକୁ ବିଧାୟକ ଦଳ ନିଷ୍ପତ୍ତି ନେଇଥିବା ଶ୍ରୀ ମହାଲିଙ୍ଗ ଗଣମାଧ୍ୟମକୁ କହିଛନ୍ତି। ତେବେ ଏହାର ଭିତିରି କଥା ଗୋପନୀୟ ରଖିଛି ବିଜେପି। ବିଜେପି ବିଧାୟକଙ୍କ ନିଷ୍ପତ୍ତି ପରେ ଏବେ ବିଜେଡି ପକ୍ଷରୁ ଏହାର ପୁନର୍ବିଚାର ପାଇଁ ମୁଖ୍ୟମନ୍ତ୍ରୀଙ୍କୁ ନିବେଦନ କରାଯାଇଛି।
