ଭୁବନେଶ୍ୱର:୧୫/୧୦-ଓଡ଼ିଶା ସଚିବାଳୟ ସେବାର ଅବସରପ୍ରାପ୍ତ କର୍ମଚାରୀ, ଜଣାଶୁଣା ସମାଜସେବୀ, ସ୍ୱେଚ୍ଛାସେବୀ ସଂଗଠନ ଭୈରବୀ କ୍ଲବର ପ୍ରମୁଖ କାର୍ଯ୍ୟକର୍ତ୍ତା ଏବଂ ନରଣଗଡ଼ ପଞ୍ଚାୟତର ପୂର୍ବତନ ସରପଞ୍ଚ ବୈକୁଣ୍ଠନାଥ ମାର୍ଥାଙ୍କର ବୁଧବାର ସକାଳେ ପରଲୋକ ହୋଇଯାଇଛି । ମୃତ୍ୟୁ ବେଳକୁ ତାଙ୍କୁ ୭୩ ବର୍ଷ ବୟସ ହୋଇଥିଲା ।
ଦୀର୍ଘଦିନ ଧରି ସେ ଏମ୍ସ ହସ୍ପିଟାଲରେ ଚିକିତ୍ସାଧୀନ ଥିଲେ । ସେ ଜଣେ ନିଷ୍ଠାପର, କର୍ତ୍ତବ୍ୟପରାୟଣ ଓ ଅମାୟିକ ବ୍ୟକ୍ତି ଥିଲେ । ତାଙ୍କ ମର ଶରୀରକୁ ଜନ୍ମସ୍ଥାନ ଖୋର୍ଦ୍ଧା ଜିଲା ନରଣଗଡ଼ ପଞ୍ଚାୟତର କୁରୁମପଡ଼ାକୁ ନିଆଯାଇଥିଲା । ବାଟରେ ଖୋର୍ଦ୍ଧା ସାମନ୍ତରାୟପୁର ଠାରେ ଥିବା ସ୍ୱେଚ୍ଛାସେବୀ ଅନୁଷ୍ଠାନର ଅନ୍ତେବାସୀମାନେ ତାଙ୍କର ଶେଷ ଦର୍ଶନ କରି ଅମର ଆତ୍ମା ପ୍ରତି ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ ।
ତାଙ୍କ ଗ୍ରାମରେ ଭୈରବୀ କ୍ଲବର ସହକର୍ମୀ, ବିଭିନ୍ନ ସ୍ୱେଚ୍ଛାସେବୀ ଅନୁଷ୍ଠାନର କର୍ମଚାରୀ, ଅନ୍ତେବାସୀ, ବହୁ ସଂଖ୍ୟାରେ ନିର୍ବାଚିତ ଲୋକ ପ୍ରତିନିଧି, ପୂର୍ବତନ ଲୋକ ପ୍ରତିନିଧିଙ୍କ ସମେତ ଅଞ୍ଚଳର ହଜାର ହଜାର ବ୍ୟକ୍ତି ତାଙ୍କର ଶେଷ ଦର୍ଶନ କରିଥିଲେ । ତାଙ୍କ ମରଶରୀରକୁ ଏକ ସୁସଜ୍ଜିତ ଯାନରେ ପଞ୍ଚାୟତ ପରିକ୍ରମା କରାଯାଇ ଶେଷକୃତ୍ୟ ସମ୍ପନ୍ନ କରାଯାଇଥିଲା ।
