ନୟାହାଟ:୫/୯-ସର୍ବଧର୍ମ ସସମନ୍ୱୟ ପୀଠ ପ୍ରାଚୀ ଗୁରୁ ଧର୍ମ କ୍ଷେତ୍ର ପରିସରରେ ଭଗବାନ ଶ୍ରୀକୃଷ୍ଣଙ୍କ ନାମକରଣ ଉତ୍ସବ ଆଶ୍ରମର ମୁଖ୍ୟ ବାବାଜୀ ଦାମୋଦର ଦାସଙ୍କ ତତ୍ତ୍ୱାବଧାନରେ ମହା ଆନନ୍ଦ ଓ ଉଲ୍ଲାସ ମଧ୍ୟରେ ପାଳନ କରାଯାଇଥିଲା। ଶ୍ରୀ କୃଷ୍ଣ ନାଟ ମନ୍ଦିରରୁ ଶହ ଶହ ଭକ୍ତ ପ୍ରଭୁ ବାଳ ଗୋପାଳଙ୍କୁ ହୁଳ ହୁଳି, ହରି ବୋଲ, ନାମ କୀର୍ତ୍ତନ କରି ପ୍ରଥମେ କଦମ୍ବ ଗଛ ବେଢ଼ା ପରିକ୍ରମା ପରେ ସ୍ଵତନ୍ତ୍ର ପୂଜା ମଣ୍ଡପକୁ ପାଛୋଟି ନେଇଥିଲେ।
ସେଠାରେ ଷୋଡ଼ଶ ଉପଚାରରେ ପ୍ରଭୁଙ୍କୁ ପୂଜା ଅର୍ଚ୍ଚନା, ବନ୍ଦାପନା ଓ ବାତ୍ସଲ୍ୟ ମମତା ସହିତ ଝୁଲଣ ଆରମ୍ଭ ହୋଇଥିଲା। ଶ୍ରୀ କୃଷ୍ଣଙ୍କ ଜନ୍ମ ଉତ୍ସବ ପାଳନ ପରେ ପଞ୍ଚୁୟାତି ପୂଜା, ସଠି ପୂଜା ପରେ ୨୧ଦିନରେ ବ୍ରାହ୍ମଣ ଦେବତାଙ୍କ ଦ୍ଵାରା ଝୁଲଣ ମଣ୍ଡପରେ ନାମକରଣ ଉତ୍ସବ ଅନୁଷ୍ଠିତ ହୋଇଥିଲା। ପ୍ରେମାଚାର୍ଯ୍ୟ ବାବା ମଧୁସୂଦନ ରାଧା କୃଷ୍ଣ ପ୍ରେମ ଉପାସକ ହୋଇଥିବାରୁ ଏହି ପୀଠରେ ବୃନ୍ଦାବନ ଭଳି ସମସ୍ତ ପ୍ରକାରର ଉତ୍ସବ ଦେଖିବାକୁ ମିଳେ ବୋଲି ସେବକ ପ୍ରୀତି ରଞ୍ଜନ ଦାସ ସୂଚନା ଦେଇଛନ୍ତି। ବର୍ଷକରେ ପ୍ରାୟ ୩୦ଗୋଟି ରୁ ଅଧିକ ପର୍ବ ପାଳନ କରାଯାଏ। ଏହି ଉତ୍ସବରେ ବହୁ ଶ୍ରଦ୍ଧାଳୁ, ଭକ୍ତମାନେ ଏକାଠି ହୋଇଥିଲେ। ଶେଷରେ ସମସ୍ତ ଭକ୍ତ ସତ୍ୟ ନାରାୟଣ ପୂଜାର ପ୍ରସାଦ ପାଇଥିଲେ।
ଅଖଣ୍ଡ ନାମ ଯଜ୍ଞର ୪୫ବର୍ଷ ପୂର୍ତ୍ତି
ନୟାହାଟ:୬/୯, ବିଶ୍ଵର ମଙ୍ଗଳ ପାଇଁ ମହା ବିପତ୍ତି ନାଶନ ମହାମନ୍ତ୍ର ଓଁ କୃଷ୍ଣ ମଧୁସୂଦନ ବାସୁଦେବ ଜନାର୍ଦ୍ଦନର ଅଖଣ୍ଡ ନାମ ଯଜ୍ଞର ୪୫ ବର୍ଷ ପୂର୍ତ୍ତି ଉତ୍ସବ ପୁରୀ ଜିଲ୍ଲା ମୟାହାଟସ୍ଥିତ ପ୍ରାଚୀ ଗୁରୁ ଧର୍ମ କ୍ଷେତ୍ର ପରିସରରେ ମହା ସମାରୋହରେ ଅନନ୍ତ ବ୍ରତ ତିଥିରେ ଆଶ୍ରମର ମୁଖ୍ୟ ବାବାଜୀ ଦାମୋଦର ଦାସଙ୍କ ତତ୍ତ୍ୱାବଧାନରେ ପାଳିତ ହୋଇଯାଇଛି।
ପ୍ରେମାଚାର୍ୟ ବାବା ମଧୁସୂଦନ ୧୯୮୦ ମସିହା ଅନନ୍ତ ବ୍ରତ ତିଥିରେ ଏହି ବିପତ୍ତି ନାଶନ ମହାମନ୍ତ୍ର ସ୍ଥାପନ କରିଥିଲେ, ଯାହାକି ଅଦ୍ୟାବଧି ଭକ୍ତ, ଶ୍ରଦ୍ଧାଳୁମାନଙ୍କ ଦ୍ଵାରା ଅଖଣ୍ଡ ନାମ ଚାଲୁରହିଛି। ପ୍ରେମାଚାର୍ୟ ବାବା ମଧୁସୂଦନ ସର୍ବ ଧର୍ମ ସମନ୍ୱୟର ପ୍ରଚାରକ ଥିଲେ। ଚାଲୁଥିବା ଏହି ମହା ମାନବ ମନ୍ଦିରରେ ଅଖଣ୍ଡ ନାମ ଯଜ୍ଞରେ ସମସ୍ତ ମହାପୁରୁଷଙ୍କ ଫଟୋ ଚିତ୍ର ପୂଜା ପାଉଛନ୍ତି। ଏହି କ୍ରମରେ ଆଜି ବିଶ୍ଵ ଗୁରୁ ବାୟା ବାବାଙ୍କ ଜନ୍ମ ଉତ୍ସବ ପାଳିତ ହୋଇଥିଲା।
ଏହି ଅଖଣ୍ଡ ନାମ ଯଜ୍ଞରେ ଖିରଭାଇ, ନଚି ଭାଇ, ବ୍ରଜ ଭାଇ, ସୁରିଆ ଭାଇ, ଧୋବେଇ ଭାଇ, ଟୁନିଆ ଭାଇ, ଟୁଲୁ ଭାଇ, ପାଗଳ ଭାଇ,ସବିତା ମା, ଅନୁ ମା, ଶାନ୍ତି ମା,ମୀନା ମା, ହର୍ଷ ମା, ନନ୍ଦୀ ମା, ପ୍ରମୁଖ ଭାଗ ନେଇଥିଲେ। ନୀଳମଣି ସାହୁ, ପ୍ରୀତି ରଞ୍ଜନ ଦାସ, ରମେଶ ବିଟି, ମହେଶ ସାହୁ ପ୍ରମୁଖ ପରିଚାଳନା କରିଥିଲେ। ଗୁରୁଦେବଙ୍କୁ ଷୋଡ଼ଶ ଉପଚାରରେ ପୂଜା ଅର୍ଚ୍ଚନା, ବନ୍ଦାପନା କରାଯାଇଥିଲା।
