ଭୁବନେଶ୍ୱର:୮/୩- ଶକ୍ତି, ସାମର୍ଥ୍ୟ ଏବଂ ଏକତାର ଏକ ଅନନ୍ୟ ପ୍ରଦର୍ଶନ ପୂର୍ବକ ଅନ୍ତର୍ଜାତୀୟ ମହିଳା ଦିବସ ଅବସରରେ କଳିଙ୍ଗ ଷ୍ଟାଡିୟମରେ ଶତାଧିକ ମହିଳା ଭୁବନେଶ୍ୱରର ରାଜପଥରେ ଏକାଠି ହୋଇଥିଲେ। ମହିଳାମାନଙ୍କ ସ୍ୱାସ୍ଥ୍ୟ, ସୁରକ୍ଷା ଏବଂ ନେତୃତ୍ୱକୁ ପ୍ରୋତ୍ସାହିତ କରିବା ପାଇଁ କ୍ରୀଡ଼ା ଓ ଯୁବ ସେବା ବିଭାଗ ଦ୍ୱାରା ଆୟୋଜିତ ଏହି ତିନି ଦିନିଆ ରାଜ୍ୟସ୍ତରୀୟ ଉତ୍ସବର ଏହି ମାରାଥନ୍ ଥିଲା ଏକ ଅନନ୍ୟ ଅଂଶ। କାର୍ଯ୍ୟକ୍ରମକୁ ଓଡ଼ିଶା ବିଧାନସଭାର ମାନ୍ୟବର ବାଚସ୍ପତି ସୁରମା ପାଢ଼ୀ ଶୁଭାରମ୍ଭ କରିଥିଲେ। ସେଠାରେ ଉପସ୍ଥିତ ମହିଳା କ୍ରୀଡ଼ାବିତ୍ ଏବଂ ଛାତ୍ରୀମାନଙ୍କୁ ସମ୍ବୋଧିତ କରି ଶ୍ରୀମତୀ ପାଢ଼ୀ କହିଥିଲେ ଯେ ମହିଳାମାନଙ୍କ ଶାରୀରିକ ସକ୍ଷମତା ହିଁ ସାମାଜିକ ପରିବର୍ତ୍ତନର ପ୍ରକୃତ କାଟାଲିଷ୍ଟ ବା ମାଧ୍ୟମ।
ଏହି ଯୁବତୀମାନଙ୍କ ମଧ୍ୟରେ ଥିବା ଆତ୍ମବିଶ୍ୱାସ ଏବଂ ସଂକଳ୍ପ ଆମ ସାମୂହିକ ଭବିଷ୍ୟତର ଏକ ପ୍ରତିଛବି। ଯେତେବେଳେ ଜଣେ ମହିଳା ନିଜର ସ୍ୱାସ୍ଥ୍ୟ ଓ ଶାରୀରିକ ସୁସ୍ଥତାକୁ ପ୍ରାଥମିକତା ଦିଅନ୍ତି ସେ ଏକ ମଜବୁତ ଏବଂ ସମାନତା ଭିତ୍ତିକ ସମାଜ ପାଇଁ ମୂଳଦୁଆ ପକାନ୍ତି ବୋଲି ସେ କହିଥିଲେ।ଏହି ମାରାଥନ୍ ପ୍ରତିଯୋଗିତାରେ ଓଡ଼ିଶାର କ୍ରୀଡ଼ା ଜଗତର ଉଦୀୟମାନ ତାରକାମାନଙ୍କ ପ୍ରତିଭା ଦେଖିବାକୁ ମିଳିଥିଲା।
ପ୍ରଥମ ସ୍ଥାନ: ଦୀପ୍ତିରାଣୀ ସାହୁ (ତିଗିରିଆ ଶାରୀରିକ ଶିକ୍ଷା ମହାବିଦ୍ୟାଳୟ)– ଅସାଧାରଣ ଧୈର୍ଯ୍ୟ ଏବଂ ଗତିର ପ୍ରଦର୍ଶନ କରି ସେ ଶୀର୍ଷ ସ୍ଥାନ ଅଧିକାର କରିଛନ୍ତି। ଦ୍ୱିତୀୟ ସ୍ଥାନ: ସୁନିତା ସାନ୍ତା (କଳିଙ୍ଗ ଇନଷ୍ଟିଚ୍ୟୁଟ୍ ଅଫ୍ ସୋସିଆଲ୍ ସାଇନ୍ସସ୍ – କିସ୍) – ନିଜର ଦୃଢ଼ ମନୋବଳ ଏବଂ କ୍ରୀଡ଼ା କୌଶଳ ପ୍ରଦର୍ଶନ କରି ଦ୍ୱିତୀୟ ସ୍ଥାନ ପାଇଛନ୍ତି।
ତୃତୀୟ ସ୍ଥାନ: ମାମିନା ମୁର୍ମୁ (ମହର୍ଷି କଲେଜ ଅଫ୍ ନାଚୁରାଲ୍ ଲ କଲେଜ) – ନିଜର ଚମତ୍କାର ପ୍ରଦର୍ଶନ ସହ ତୃତୀୟ ସ୍ଥାନ ହାସଲ କରିଛନ୍ତି।
ଆଧୁନିକ ନାରୀକୁ ସଶକ୍ତ କରିବା ପାଇଁ ଏହି ମାରାଥନ ଥିଲା ତିନି ଦିନିଆ ସୁଚିନ୍ତିତ କାର୍ଯ୍ୟକ୍ରମର ‘ଗ୍ରାଣ୍ଡ୍ ଫିନାଲେ’:
ପ୍ରଥମ ଦିନ (ଶକ୍ତି ସ୍ୱରୂପିଣୀ): ସମସ୍ତ ଜିଲ୍ଲାରେ ଗଣ-ଯୋଗ ଶିବିର ଆୟୋଜିତ ହୋଇଥିଲା, ଯାହା ମହିଳାମାନଙ୍କ ମାନସିକ ଏବଂ ଶାରୀରିକ ସୁସ୍ଥତା ପାଇଁ ଉଦ୍ଦିଷ୍ଟ ଥିଲା। ଦ୍ୱିତୀୟ ଦିନ (ସଶକ୍ତ ନାରୀ, ସଶକ୍ତ ରାଷ୍ଟ୍ର): ଯୁବତୀମାନଙ୍କୁ ସୁରକ୍ଷିତ ଓ ଆତ୍ମବିଶ୍ୱାସର ସହ ଚାଲିବା ପାଇଁ ଆତ୍ମରକ୍ଷା କୌଶଳର ପ୍ରଶିକ୍ଷଣ ଦିଆଯାଇଥିଲା। ତୃତୀୟ ଦିନ (ଶକ୍ତିର ଗତି, ରାଷ୍ଟ୍ରର ପ୍ରଗତି): ମହିଳା ମାରାଥନ୍, ଯେଉଁଠାରେ ଶତାଧିକ କ୍ରୀଡ଼ାବିତ୍ ଏବଂ ବୃତ୍ତିଧାରୀ ମହିଳା ‘ନାରୀର ପ୍ରଗତି, ଦେଶର ପ୍ରଗତି’ବାର୍ତ୍ତା ନେଇ ଦୌଡ଼ିଥିଲେ।
